លោក ហ៊ុន សែន ប្រកាសទទួលស្គាល់តែរបាយការណ៍ក្រសួងសុខាភិបាលករណីពុលមនុស្សស្លាប់នៅក្រចេះ
លោកនាយករដ្ឋមន្ត្រី ហ៊ុន សែន នៅថ្ងៃសុក្រនេះ បានប្រើប្រាស់វេទិកាកិច្ចប្រជុំគណៈរដ្ឋមន្ត្រីស្ដីបន្ទោសរដ្ឋមន្ត្រី ដែលចេញផ្សាយលទ្ធផលផ្សេងគ្នា ទាក់ទងករណីពុលបណ្តាលឲ្យមនុស្ស១៣នាក់ស្លាប់នៅក្រចេះ។ លោក ហ៊ុន សែន បានគូសបញ្ជាក់ថា ករណីមនុស្សស្លាប់នៅក្រចេះ គឺលោកទទួលស្គាល់តែរបាយការណ៍របស់ក្រសួងសុខាភិបាលប៉ុណ្ណោះ។ របាយការណ៍ក្រសួងសុខាភិបាលដែលបង្ហាញថា មនុស្សស្លាប់នៅក្រចេះ បណ្ដាលមកពីការផឹកស្រាស បូករួមនឹងការប្រើប្រាស់ទឹកព្រែក។
ចុះផ្សាយនៅថ្ងៃ៖
ស្តាប់ - ០២:៣២
លោកនាយករដ្ឋមន្ត្រី ហ៊ុន សែន អះអាងនៅក្នុងកិច្ចប្រជុំគណៈរដ្ឋមន្ត្រី នៅថ្ងៃសុក្រនេះថា មូលហេតុដែលលោកទទួលស្គាល់តែរបាយការណ៍ក្រសួងសុខាភិបាលទាក់ទងករណីមនុស្ស១៣នាក់ ពុលស្រាស្លាប់នៅក្រចេះ ដោយសារតែរូបលោកផ្ទាល់បានធ្វើការងារនេះ ជាមួយក្រសួងសុខាភិបាលតាំងតែពីដើមរហូតមក។ ក្រសួងសុខាភិបាល ចំពោះ លោកនាយករដ្ឋមន្ត្រី គឺបានធ្វើការងារនេះស្និទ្ធជាមួយនឹងពលរដ្ឋជាងក្រសួងឯទៀត តាមរយៈការដឹកអ្នកជំងឺមកសង្គ្រោះដល់មន្ទីរពេទ្យនៅភ្នំពេញ។ ចំណែករបាយការណ៍ចេញពីក្រសួងឧស្សាហកម្មនិងសិប្បកម្ម លោកមិនទទួលស្គាល់ឡើយព្រោះការចេញផ្សាយនេះ មិនបានឆ្លងកាត់ការឯកភាពពីលោក។
ទាក់ទងទៅនឹងករណីមនុស្សស្លាប់១៣នាក់នៅក្រចេះនេះ ដំបូងឡើយ ក្រសួងសុខាភិបាលរកឃើញថា ករណីនេះ បណ្តាលមកពីការពុលស្រា និងមួយចំនួនទៀតសង្ស័យថាពុលទឹកព្រែក ដែលប្រជាពលរដ្ឋបានប្រើប្រាស់ប្រចាំថ្ងៃ។ ក៏ប៉ុន្តែក្រោយមកលោក ចម ប្រសិទ្ធ ដែលជារដ្ឋមន្ត្រីក្រសួងឧស្សាហកម្ម និងសិប្បកម្ម បានចេញមកអះអាងថា ករណីពុលស្លាប់នៅក្នុងខេត្តក្រចេះនេះ គឺបណ្តាលមកពីសារធាតុហ្សានីដ ដែលគេប្រើប្រាស់សម្រាប់លាងរ៉ែមាសទៅវិញ។ តែមូលហេតុរបស់លោកចម ប្រសិទ្ធនេះ ត្រូវបានលោកលោកស៊ុយ សែម រដ្ឋមន្ត្រីក្រសួងរ៉ែ និងថាមពលទាត់ចោល។ សម្រាប់លោកស៊ុយ សែមវិញ ករណីពុលនេះ គឺបណ្តាលមកពីថ្នាំពុលសម្លាប់សត្វល្អិត ថ្នាំសម្លាប់ស្មៅ និងករណីមួយចំនួនទៀត គឺបណ្តាលមកពីពុលស្រា ។
ប៉ុន្តែយ៉ាងណាក៏ដោយលោកនាយករដ្ឋមន្ត្រី ក៏បានប្រកាសទទួលស្គាល់បន្ថែមទៀតចំពោះលទ្ធផលចេញផ្សាយរួមគ្នារបស់ក្រសួងទាំងបីនៅថ្ងៃសុក្រនេះ ដែលថា ពលរដ្ឋស្លាប់ដោយសារពុលស្រាស ដែលមានសារធាតុមេតាណុលខ្ពស់។ ហើយមួយចំណែកទៀតបង្កឡើងដោយការប្រើប្រាស់ ទឹកព្រែក មានសារធាតុគីមី ដែលមានកំហាប់ខ្ពស់បណ្តាលមកពីថ្នាំសម្លាប់ស្មៅ និងថ្នាំសម្លាប់សត្វល្អិត។
ទាក់ទងការចេញផ្សាយរបាយការណ៍ ដែលលោកនាយករដ្ឋមន្ត្រីទទួលស្គាល់ថា ជាការ សាចទឹកដាក់គ្នានេះ លោកក៏ព្រមានបណ្ដេញរដ្ឋមន្ត្រីចេញពីតួនាទីផងដែរ។ ក្រោយផ្ទុះករណីនេះ សមាគមចិននៅកម្ពុជាបានឧបត្ថម្ភថវិកា៨ម៉ឺនដុល្លារ ជួយដល់អាជ្ញាធរខេត្តក្រចេះ។ នេះបើតាមលោកនាយករដ្ឋមន្ត្រី។
ខណៈមានការចោទសួរអំពីការទទួលខុសត្រូវចំពោះការស្លាប់របស់ពលរដ្ឋចំនួន១៣នាក់នេះ អនុរដ្ឋលេខាធិការក្រសួងឧស្សាហកម្ម និងសិប្បកម្ម លោក អ៊ុំ សុថា បញ្ជាក់ថា នេះជាការទទួលខុសត្រូវរួមគ្នា។ តាមរយៈការស្វែងរកអ្នកបង្កហេតុដូចជា អ្នកផលិតស្រា និងអ្នកប្រើប្រាស់សាធាតុគីមីជាដើម មកទទួលខុសត្រូវនៅចំពោះមុខច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ