សម្តេចក្រុមព្រះគាំទ្រការរួបរួមគ្នាតែហៅ ម៉ម សូណង់ដូ ថាជាបក្សប្រឆំាងថ្មី
បន្ទាប់ពីជំនួបជាមួយមេដឹកនាំបក្សកុម្មុយនិស្ត ចិននៅទីក្រុងប៉េកាំង សម្តេចក្រុមព្រះបាន សម្តែងព្រះទ័យគាំទ្រដល់សិទ្ធិរបស់លោកម៉ម សូណង់ដូ ក្នុងការបង្កើតគណបក្សសំបុកឃ្មុំសង្គមប្រជាធិបតេយ្យរបស់លោកឡើងវិញ។ លើសពីនេះមេបក្សហ្វុនស៊ីនប៉ិចដែលបានមកដល់ប្រទេសកម្ពុជាកាលពីល្ងាចថ្ងៃ២២មេសាម្សិលមិញ បានហៅគណបក្សរបស់លោក ម៉ម សូណង់ដូ ថាជាគណបក្សប្រឆាំងថ្មីមួយជំនួសគណបក្សប្រឆាំងសព្វថ្ងៃដែលដឹកនាំដោយលោក សម រង្សី និង លោកកឹម សុខា។មិនមានការឆ្លើយតបយ៉ាងណានៅឡើយទាក់ទងទៅនឹងបន្ទូលរបស់សម្តេចក្រុមព្រះបែបនេះ ពីសំណាក់គណបក្សសង្គ្រោះជាតិ។
ចុះផ្សាយនៅថ្ងៃ៖
ស្តាប់ - ០១:៤៨
ក្រៅពីមានបន្ទូលលើកឡើងពីព្រះរាជសុខភាពព្រះមហាក្សត្រ និងសម្តេចម៉ែ ដែលបានគង់នៅទីក្រុងប៉េកាំងប្រទេសចិនមួយរយៈ ដើម្បីឲ្យគ្រូពេទ្យចិន ពិនិត្យព្រះរាជសុខភាព សម្តេច ក្រុមព្រះនរោត្តម រណឫទ្ធិ ប្រធានគណបក្សហ្វុនស៊ីនប៉ិច បានថ្លែងទៅកាន់អ្នកកាសែតនៅព្រលានយន្តហោះ អន្តរជាតិ ភ្នំពេញកាលពីល្ងាចម្សិលមិញទាក់ទងទៅនឹងការបង្កើតគណបក្សឡើងវិញរបស់ លោក ម៉ម សូណង់ដូថា វាជាសិទ្ធិរបស់ខ្មែរម្នាក់ៗ។
សម្តេចក្រុមព្រះដែលចំណាយពេលវេលាពីរថ្ងៃគឺថ្ងៃពីថ្ងៃទី២១ដល់២២ មេសា ដឹកនាំគណៈប្រតិភូគណបក្សហ្វុនស៊ីនប៉ិច ទៅទស្សនកិច្ច និងជួបមេដឹកនាំបក្សកុម្មុយនិស្ត ចិន មានបន្ទូលបញ្ជាក់ថាលោកម៉ម សូណង់ដូ ប្រធានវិទ្យុសំបុកឃ្មុំ មើលឃើញថា លោកសម រង្ស៊ី មេដឹកនាំគណបក្សប្រឆាំង ទំនងលែងប្រឆាំងហើយតាមរយៈភាពល្អូកល្អើនជាមួយនឹងលោកនាយករដ្ឋមន្ត្រី ហ៊ុន សែន កន្លងមក។
ក៏ប៉ុន្តែមេបក្សរាជានិយមរូបនេះ បានបន្តលើកឡើងពីបន្ទូលរបស់សម្តេចឪកាលពីឆ្នាំ២០០៣ថា លោកចង់ឲ្យខ្មែរទាំងអស់គ្នារួមគ្នា ដោយពេលនេះសម្តេចក្រុមព្រះសម្តែងនូវការសប្បាយព្រះទ័យប្រសិនបើគណបក្សទាំងអស់ធ្វើរដ្ឋាភិបាលរួមគ្នា។
ដោយមិនមានជំនឿថាគណបក្សសំបុកឃ្មុំសង្គមប្រជាធិបតេយ្យរបស់លោកម៉ម សូណង់ដូចដែលអវត្តមានពីសង្វៀនប្រកួតជាច្រើនអាណត្តិទៅហើយនោះ រួមជាមួយនឹងហ្វុនស៊ីនប៉ិច សម្តេចក្រុមព្រះបានហៅគណបក្សលោកម៉ម សូណង់ដូ ថាជាគណបក្សប្រឆាំងមួយថ្មី ហើយដែលលោកស្វាគមន៍ក្នុងការជួបជជែកជាមួយលោក សូណង់ដូ។
គណបក្សសង្គ្រោះជាតិមិនអាចទាក់ទងសុំអត្ថាធិប្បាយបានទេ នៅថ្ងៃនេះទាក់ទងទៅនឹងបន្ទូលរបស់សម្តេចក្រុមព្រះ។ជាការកត់សម្គាល់ ការបង្ហើបន្ទូលរបស់មេបក្សហ្វុនស៊ីនប៉ិចនៅពេលនេះ បានធ្វើឡើងបន្ទាប់ពីមានការលើកតម្កើនវប្បធម៌សន្ទនា រវាងលោកនាយករដ្ឋមន្ត្រី ហ៊ុន សែន និងលោកសម រង្ស៊ី ប្រធានគណបក្សសង្គ្រោះជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ