បក្សយុវជនកម្ពុជានិងបក្សមហាសាមគ្គីជាតិខ្មែរ ចែកផ្លូវគ្នាដើរ ក្រោយពេលរួបរួមគ្នាបានមិនដល់មួយសប្ដាហ៍!
គណបក្សយុវជនកម្ពុជានិងគណបក្សមហាសាមគ្គីជាតិខ្មែរ បានសម្រេចចែកផ្លូវគ្នាដើរហើយ បន្ទាប់ពីរួបរួមគ្នាបានមិនដល់មួយសប្ដាហ៍ផង។ មូលហេតុនៃការចែកផ្លូវគ្នាដើរនេះ ត្រូវបានគណបក្សទាំងពីរពន្យល់ថា គឺដោយសារតែបក្សទាំងពីរ មិនអាចអនុវត្តតាមកិច្ចព្រមព្រៀងដែលចុះហត្ថលេខារួមគ្នា កាលពីថ្ងៃទី២៧មករាបាន។
ចុះផ្សាយនៅថ្ងៃ៖
ស្តាប់ - ០២:០៨
លោក ពេជ្រ ស្រស់ ប្រធានគណបក្សយុវជនកម្ពុជា ថ្លែងប្រាប់វិទ្យុបារាំងអន្ដរជាតិនៅថ្ងៃព្រហស្បតិ៍នេះថា ការចែកផ្លូវគ្នាជាមួយគណបក្សមហាសាមគ្គីជាតិខ្មែរ ធ្វើឡើងតាមគោលការណ៍ស្ម័គ្រចិត្តរៀងៗខ្លួន ដោយសារតែបក្សទាំងពីរមិនទុកចិត្តគ្នា មិនអាចធ្វើការរួមគ្នាបាន។
ប្រធានគណបក្សមហាសាមគ្គីជាតិខ្មែរ លោក ញ៉ែម វណ្ណថន បានទទួលស្គាល់ថា បញ្ហាមិនទុកចិត្តគ្នា គឺជាញញួរវាយបំបែកសម្ព័ន្ធភាពដែលបក្សទាំងពីរចងភ្ជាប់គ្នាកាលពីថ្ងៃទី២៧មករា។ ប៉ុន្តែវាមិនមែនជាបញ្ហាតែមួយនោះឡើយ។ ការរៀបចំរចនាសម្ព័ន្ធនៅតាមមូលដ្ឋានដើម្បីឈានទៅកាន់ការបោះឆ្នោតខាងមុខ ក៏ជារឿងចម្រូងចម្រាស់ដែលគណបក្សទាំងពីរនិយាយមិនចុះសម្រុងគ្នាដែរ។ គណបក្សយុវជនកម្ពុជាចង់ផ្ដោតតែទៅលើខេត្តត្បូងឃ្មុំដូចផែនការដែលដាក់ចេញពីដំបូង ចំណែកគណបក្សមហាសាមគ្គីជាតិខ្មែរចង់ពង្រីកទៅដល់មូលដ្ឋានរឹងមាំរបស់ខ្លួន ដែលមាននៅខេត្តតាកែវ ខេត្តកំពង់ស្ពឺ និងខេត្តកណ្ដាល។ ក្រៅពីនោះ ទស្សនៈនយោបាយមិនស្របគ្នា និងរបៀបធ្វើការមិនសូវស៊ីសង្វាក់គ្នាល្អអំពីរចនាសម្ព័ន្ធ ក៏ជាមូលហេតុធ្វើឲ្យបក្សទាំងពីរបែកបាក់ផងដែរ។ នេះបើតាមលោក ញ៉ែម វណ្ណថន។
លោកសារភាពថា ការបែកបាក់គ្នាលើកនេះ ផ្ដើមចេញពីគណបក្សមហាសាមគ្គីជាតិខ្មែរមិនទុកចិត្តគណបក្សយុជនកម្ពុជា ហើយមិនអាចធ្វើការរួមគ្នាបាន។ ប្រធានបក្សមហាសាមគ្គីជាតិខ្មែររូបនេះ សម្ដែងការសោកស្ដាយ។ សោកស្ដាយព្រោះគណបក្សលោកផ្ដល់តម្លៃដល់កម្លាំងនៃការរួបរួមគ្នា។ ប៉ុន្តែប្រសិនបើការរួមរួមគ្នានោះជួបបញ្ហាតាំងពីដំបូងទៅហើយ គេគួរចែកផ្លូវគ្នាដើរដោយសន្តិវិធី។
គួរជម្រាបជូនថា គណបក្សយុវជនកម្ពុជានិងគណបក្សមហាសាមគ្គីជាតិខ្មែរ បានចុះហត្ថលេខាព្រមព្រៀងរួបរួមគ្នានៅថ្ងៃទី២៧មករា។ គណបក្សទាំងពីរចាត់ទុកការរួបរួមគ្នានោះថា ជាគំរូនៃការធ្វើការរួមគ្នារវាងអ្នកនយោបាយ ដើម្បីផលប្រយោជន៍ជាតិ។ ប៉ុន្តែអ្នកវិភាគនយោបាយបានមើលឃើញតាំងពីដំបូងរួចហើយថា ការរួបរួមនេះ ទំនងជាឈរលើផលប្រយោជន៍បក្ស ច្រើនជាងប្រយោជន៍ជាតិ ហើយមិនអាចគង់វង្សស្ថិតស្ថេរយូរអង្វែងឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ