អ្នកនាំពាក្យ គជប៖ ឥទ្ធិពលនយោបាយ មិនប៉ះពាល់ដល់ការចុះឈ្មោះបោះឆ្នោតថ្មីទេ
គិតត្រឹមរយៈពេល៧ថ្ងៃ មានប្រជាពលរដ្ឋប្រមាណជា៤ម៉ឺន៣ពាន់នាក់ ដែលបានទៅចុះឈ្មោះបោះឆ្នោតថ្មីនៅតាមឃុំសង្កាត់ទាំង ១៦៤៦នៅទូទាំងប្រទេស។ ចំនួននេះ បានថយចុះ បើប្រៀបធៀបនឹងការចុះឈ្មោះបោះឆ្នោតកាលពីឆ្នាំ២០១៦ ខណៈដែលអង្គការសង្គមស៊ីវិលបារម្ភថា ឥទ្ធិពលបរិយាកាសនយោបាយ បានធ្វើឲ្យប្រជាពលរដ្ឋ មិនចង់ទៅចុះឈ្មោះបោះឆ្នោត។ ប៉ុន្តែអ្នកនាំពាក្យ គជប បានបដិសេធ។
ចុះផ្សាយនៅថ្ងៃ៖
ស្តាប់ - ០២:៣៧
គិតត្រឹមរយៈពេល៧ថ្ងៃ គឺមានប្រជាពលរដ្ឋប្រមាណជា៤៣៤៦១នាក់ ឬមិនដល់៣ភាគរយផង (២.៦៧%) ដែលបានទៅចុះឈ្មោះបោះឆ្នោតថ្មីក្នុងចំណោមប្រជាពលរដ្ឋដែលត្រូវបានប៉ាន់ស្មានប្រមាណជា ១លាន៦សែននាក់។ ចំនួននេះបានថយចុះ បើប្រៀបធៀបទៅនឹងរយៈពេលដូចគ្នា នៃការចុះឈ្មោះបោះឆ្នោត កាលពីឆ្នាំ២០១៦។ ប៉ុន្តែលោក ហង្ស ពុទ្ធា អ្នកនាំពាក្យ គជប បានលើកឡើងថា ការថយចុះ មិនមែនដោយសារតែឥទ្ធិពលនៃបរិយាកាសនយោបាយនោះទេ តែគឺដោយសារការចុះឈ្មោះបោះឆ្នោតលើកទី២នេះ មានប្រជាពលរដ្ឋតិចតួចប៉ុណ្ណោះ បើប្រៀបធៀបនឹងឆ្នាំ២០១៦ ខណៈដែលតួលេខប៉ាន់ប្រមាណថ្មី ត្រឹមតែជាង១លាន៤សែននាក់ប៉ុណ្ណោះ។
ខណៈដែលដំណើរការចុះឈ្មោះបោះឆ្នោតថ្មីនៅតែបន្ត ប៉ុន្តែមន្រ្តីអង្គការសង្គមស៊ីវិលមួយចំនួនបានព្រួយបារម្ភថា បរិយាកាសនយោបាយក្នុងពេលបច្ចុប្បន្ននេះ បានធ្វើឲ្យប្រជាពលរដ្ឋមិនចង់ទៅចុះឈ្មោះបោះឆ្នោត ជាពិសេសក្រោយពីការចាប់ខ្លួនប្រធានគណបក្សប្រឆាំងលោក កឹម សុខា មក។ លោក សម គន្ធាមី ប្រធានអង្គការឃ្លាំមើលការបោះឆ្នោតហៅថា និចហ្វិច បានលើកឡើងពីកត្តាចំនួន៥ ដែលធ្វើចំនួនអ្នកទៅចុះឈ្មោះបោះឆ្នោតមិនបានដល់៣% នេះ ក្នុងនោះក៏មានដែរបញ្ហាបរិយាកាសនយោបាយ។ បន្ទាប់មក គឺកតា្តប្រព័ន្ធផ្សព្វផ្សាយដែលកាន់តែតូចចង្អៀត បញ្ហាធាតុអាកាស បញ្ហាឯកសារ និងបញ្ហាផ្នត់គំនិតរបស់ប្រជាពលរដ្ឋខ្មែរជាដើម។ ប្រជាពលរដ្ឋខ្មែរ ដែលតែងតែគិតថា ចាំដល់គៀកថ្ងៃចុងក្រោយ ទើបបានទៅចុះឈ្មោះបោះឆ្នោត។
យ៉ាងណាក៏ដោយ កាលពីថ្ងៃទី ៧ កញ្ញា កូនស្រីទី២របស់លោក កឹម សុខា គឺ កញ្ញា កឹម សម្មាធីតា បានអំពាវនាវឲ្យប្រជាពលរដ្ឋចេញទៅចុះឈ្មោះបោះឆ្នោត ខណៈមានសេចក្តីរាយការណ៍ថា នៅក្នុងខេត្តបាត់ដំបង ប្រជាពលរដ្ឋទៅចុះឈ្មោះបោះឆ្នោតមិនបាន៥០%ផង។ សារអំពាវនាវរបស់កញ្ញាបានលើកឡើងថា ការចាប់ខ្លួនឳពុករបស់នាង រួមទាំងការធ្វើទុក្ខបុកម្នេញទៅលើសារពត៌មាន និងសង្គមស៊ីវិល ប្រាកដណាស់ នឹងធ្វើឲ្យការបោះឆ្នោះជាតិនៅឆ្នាំ២០១៨ខាងមុខមិនអាចទទួលយកបានទេ។ ប៉ុន្តែប្រជាពលរដ្ឋខ្មែរដែលមានសិទ្ធិបោះឆ្នោតទាំងអស់គួរអញ្ជើញទៅចុះឈ្មោះបោះឆ្នោត ព្រោះនាងជឿជាក់ថា ស្ថានការណ៍នយោបាយនេះ អាចប្រែប្រួលក្នុងពេលឆាប់ៗ ហើយឳពុករបស់នាងនឹងត្រូវបានដោះលែងជាក់ជាមិនខាន។
សូមជម្រាបជូនថា ការចុះឈ្មោះបោះឆ្នោត និងធ្វើបច្ចុប្បន្នភាពបញ្ជីបោះឆ្នោតថ្មី បានចាប់ផ្តើមពីថ្ងៃទី០១ ខែកញ្ញា នឹងបញ្ចប់នៅថ្ងៃទី០៩ ខែវិច្ឆិកា។ ហើយក្នុងរយៈពេល៧ថ្ងៃមកនេះ គជប ក៏បានសម្រេចលុបឈ្មោះប្រជាពលរដ្ឋចំនួន១៦២នាក់ ចេញពីបញ្ជីឈ្មោះបោះឆ្នោត ដែលភាគច្រើនដោយសារពួកគេបានទទួលមរណភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ