គជប ពន្យារពេលការចុះឈ្មោះបោះឆ្នោត នៅខែ មីនា ទៅខែ កក្កដា ឆ្នាំ ២០១៦ វិញ
គណៈកម្មាការជាតិរៀបចំការបោះឆ្នោត (គជប) នៅថ្ងៃទី ១២ នេះ បានបញ្ជាក់ថា ការចុះឈ្មោះបោះឆ្នោតសម្រាប់ការបោះឆ្នោតនាពេលខាងមុខនេះ ដែលគ្រោងនឹងធ្វើនៅខែ មីនា នេះ នឹង ត្រូវពន្យារពេលរហូតដល់ខែ កក្កដា ឆ្នាំ ២០១៦ វិញ។ ការពន្យារពេលចុះឈ្មោះបោះឆ្នោតទូទាំងប្រទេសនេះ ត្រូវបាន គជប ពន្យល់ថា ដោយសារតែមិនទាន់ទទួលបានសម្ភារៈពីម្ចាស់ជំនួយ។ ទោះបីជាយ៉ាងណាក៏ដោយ គជប អះអាងថា ការពន្យាពេលចុះឈ្មោះបោះឆ្នោតនេះ នឹងមិនប៉ះពាល់ដល់ដំណើការ ការបោះឆ្នោតនាពេលខាងមុខនោះទេ។
ចុះផ្សាយនៅថ្ងៃ៖
ស្តាប់ - ០១:៣៨
ការចុះឈ្មោះសម្រាប់ការបោះឆ្នោតនាពេលខាងមុខ ដែលគ្រោងនឹងរៀបចំនៅខែ មីនា នេះ នឹងត្រូវលើកទៅធ្វើនៅខែ កក្កដា ឆ្នាំ ២០១៦ ជំនួសវិញ។ បើតាមគម្រោង គណៈកម្មការជាតិរៀបចំការបោះឆ្នោត (គជប) ត្រូវផ្លាស់ប្តូរការរៀបចំចុះឈ្មោះបោះឆ្នោតនៅខែ មីនា ទៅ ខែ ឧសភា ប៉ុន្តែ ដោយសារតែ សម្ភារៈដែលត្រូវពឹងផ្អែកលើជំនួយរបស់សហភាពអ៊ឺរ៉ុប និង ជប៉ុន មិនទទួលបានទាន់ពេលវេលា ដែលធ្វើឲ្យគណៈកម្មាការជាតិរៀបចំការបោះឆ្នោត ចាំបាច់ត្រូវពន្យារពេលសារជាថ្មីទៀត រហូតដល់ ខែ ចុងខែ កក្កដា។ នេះបើតាមការបញ្ជាក់របស់ លោក ហង្ស ពុទ្ធា អ្នកនាំពាក្យនិង ជាសមាជិកគណៈកម្មការជាតិរៀបចំការបោះឆ្នោត នៅថ្ងៃទី ១២ ខែ មីនា នេះ។
អ្នកនាំពាក្យរូបនេះ បញ្ជាក់ទៀតថា ដោយសារតែនេះជាលើកទីមួយសម្រាប់ប្រទេសកម្ពុជា ដែលនឹងត្រូវធ្វើការចុះឈ្មោះដោយប្រព័ន្ធកុំព្យូទ័រ ដូច្នេះហើយ កម្ពុជា ចាំបាច់ត្រូវការជំនួយបច្ចេកទេស និង សម្ភារៈដើម្បីប្រើប្រាស់ ពីបណ្តាប្រទេសអភិវឌ្ឍន៍ ដើម្បីធានាថា ដំណើការបោះឆ្នោតនៅកម្ពុជា ប្រកបដោយតម្លាភាព និង សុក្រឹត្យភាព។
បើទោះបីជា មានភាពយឺតយ៉ាវនៃការចុះឈ្មោះបោះឆ្នោតយ៉ាងណាក៏ដោយ លោក ហង្ស ពុទ្ធា បានអះអាងថា នឹងមិនមានផលប៉ះពាល់ដល់ដំណើការប្រព្រឹត្តិទៅនៃការឆ្នោត ថ្នាក់ជាតិ ឆ្នាំ ២០១៧ និង ឆ្នាំ ២០១៨ ខាងមុខនេះទេ។ មិនប៉ះពាល់ ព្រោះថា ក្រុមការងារ របស់គណៈកម្មាការជាតិរៀបចំការបោះឆ្នោត បានត្រៀមលក្ខណៈរួចរាល់ហើយ ដើម្បីរៀបចំដំណើការ ការបោះឆ្នោតទូទាំងប្រទេស ឲ្យមានភាពរលូន។
ទន្ទឹមនឹងនេះ នៅថ្ងៃច័ន្ទ សប្តាហ៍ក្រោយ គណៈកម្មាការជាតិរៀបចំការបោះឆ្នោត នឹងជួបពិភាក្សាជាមួយនឹងសហភាពអ៊ឺរ៉ុបបន្ថែមទៀត និង ផ្តល់ដំណឹងផ្លូវការ អំពីភាពយឺតយ៉ាវនៃការចុះឈ្មោះបោះឆ្នោតទូទាំងប្រទេស និង សុំនូវការយោគល់ ពីប្រជាជនទូទាំងប្រទេស។
គួរជម្រាបជូនផងដែរថា សម្រាប់ការបោះឆ្នោតក្រុមប្រឹក្សាឃុំ សង្កាត់ ឆ្នាំ ២០១៧ និង ការបោះឆ្នោតថ្នាក់ជាតិ ឆ្នាំ ២០១៨ ខាងមុខនេះ ស្ថានទូតអាមេរិកប្រចាំនៅកម្ពុជា នឹងជួយគាំទ្រដល់ដំណើការ និង ធ្វើជាអ្នកសង្កេតការណ៍សម្រាប់ការបោះឆ្នោតនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ