អាជ្ញាធរជាតិអប្សរា កំពុងរំដោះជំនន់ទឹកភ្លៀង «តិចតួច» ចេញពីតំបន់បេតិកភណ្ឌ
ទឹកភ្លៀងដែលធ្លាក់យ៉ាងខ្លាំងជាបន្តបន្ទាប់នាប៉ុន្មានថ្ងៃចុងក្រោយនេះ បានបង្កឲ្យមានទឹកដក់នៅប្រាសាទមួយចំនួនក្នុងខេត្តសៀមរាប។ ជំនន់ទឹកភ្លៀងនៅតំបន់ខ្លះក្នុងបរិវេណប្រាសាទ ត្រូវបានអាជ្ញាធរអប្សរាគូសបញ្ជាក់ថា ស្ថិតនៅក្នុងស្ថានភាពដែលអាចគ្រប់គ្រងបាន។ និងថា នាយកដ្ឋានគ្រប់គ្រងទឹកនៃអាជ្ញាធរជាតិអប្សរា កំពុងតែរំដោះជំនន់ទឹកភ្លៀងដ៏តិចតួចនោះចេញពីតំបន់បេតិកភណ្ឌពិភពលោកនេះហើយ។
ចុះផ្សាយនៅថ្ងៃ៖
ស្តាប់ - ០២:៣១
ការរំដោះជំនន់ទឹកភ្លៀងចេញពីតំបន់ខ្លះក្នុងបរិវេណប្រាសាទនៅក្នុងខេត្តសៀមរាប ធ្វើឡើងតាមរយៈការជីកចង្អូរទឹកពីតំបន់ជន់លិច ទៅកាន់ស្រះទឹកក្នុងបរិវេណប្រាសាទ ឬកសិណទឹកផ្សេងៗដែលអាចផ្ទុកទឹកបាន។ នេះបើតាមការពន្យល់របស់លោក ឡុង កុសល អ្នកនាំពាក្យអាជ្ញាធរជាតិអប្សរា។ លោក ឡុង កុសល បន្តថា ការជីកចង្អូរទឹកនោះទៀតសោត នាយកដ្ឋានជំនាញនៃអាជ្ញាធរអប្សរា ប្រើប្រាស់ឧបករណ៍ដោយដៃសុទ្ធសាធ មិនមានប្រើប្រាស់ម៉ាស៊ីនធន់ធ្ងន់ ដែលអាចបង្កការរំខានដល់ប្រាសាទបុរាណខ្មែរឡើយ។
សូមជម្រាបថា រហូតមកទល់ពេលនេះ ក្រៅពីប្រាសាទអង្គរវត្ត ប្រាសាទមួយចំនួនទៀតដែលមានទីតាំងនៅតំបន់ទំនាប ក៏ត្រូវទឹកភ្លៀងបង្កឲ្យមានទឹកដក់ដែរ។ ប៉ុន្តែអ្នកនាំពាក្យអាជ្ញាធរអប្សរា អះអាងថា កម្រិតជំនន់ទឹកភ្លៀងនេះ មិនមានភាពធ្ងន់ធ្ងរនោះឡើយ ហើយក៏គ្មានបង្កផលប៉ះពាល់ដល់ប្រាសាទ ឬដល់អ្នកទេសចរក៏ទេដែរ។ មិនប៉ះពាល់ដោយសារតែវាគ្រាន់តែជាទឹកដក់ ហើយមានតែនៅតំបន់ខ្លះក្នុងបរិវេណប្រាសាទ មិនមែនលិចប្រាសាទទាំងស្រុងឡើយ។ អាជ្ញាធរអប្សរារំពឹងថា ការរំដោះទឹកដក់ដោយសារទឹកភ្លៀងនេះ នឹងអាចបញ្ចប់ក្នុងរយៈពេលដ៏ខ្លីខាងមុខ ប្រសិនបើមិនមានភ្លៀងធ្លាក់មកខ្លាំងថែមទៀតទេនោះ។
សូមជម្រាបជូនថា ក្រៅពីមានទឹកដក់នៅតំបន់ខ្លះក្នុងបរិវេណប្រាសាទក្នុងខេត្តសៀមរាប ភ្លៀងនិងខ្យល់បក់បោកយ៉ាងខ្លាំងកាលពីថ្ងៃទី១និងថ្ងៃទី២ខែតុលា ក៏បានធ្វើឲ្យដើមឈើជាច្រើនដើមក្នុងបរិវេណរមនីយដ្ឋានអង្គរដួលរលំផងដែរ។ ដើមឈើដែលបានរលំដួលដោយសារភ្លៀងលាយខ្យល់ មាននៅទីតាំងសំខាន់ៗដូចជា៖ នៅប្រាសាទតាព្រហ្ម ប្រាសាទព្រះខ័ន ប្រាសាទភិមានអាកាស ប្រាសាទភ្នំបាខែង សួនគ្រឿងទេស រង្វង់មូលចំបក់កំណប់ កន្លែងលក់សំបុត្រចូលទស្សនារមនីយដ្ឋានអង្គរចាស់ ខាងលិចប្រាសាទអង្គរវត្ត និងក្នុងបរិវេណប្រាសាទអង្គរវត្ត។
អាជ្ញាធរជាតិអប្សរាកំពុងតែរៀបចំកាត់សម្អាតដើមឈើដែលរលំបាក់ទាំងនេះចេញ ដើម្បីកុំឲ្យមានបញ្ហាស្ទះចរាចរណ៍ និងប៉ះពាល់ដល់រចនាសម្ព័ន្ធប្រាសាទ។ ទន្ទឹមគ្នានេះ អាជ្ញាធរជាតិអប្សរាបានអំពាវនាវឲ្យភ្ញៀវទេសចរនិងសាធារណជនប្រុងប្រយ័ត្នក្នុងដំណើរកម្សាន្តរបស់ខ្លួន ពិសេសពេលមានភ្លៀងធ្លាក់ខ្លាំងម្ដងៗ។ ពេលភ្លៀងធ្លាក់ខ្លាំង អាជ្ញាធរជាតិអប្សរាចង់ឲ្យអ្នកទេសចរនៅឲ្យឆ្ងាយពីដើមឈើធំៗ ដើម្បីចៀសវាងគ្រោះថ្នាក់ជាយថាហេតុណាមួយ។ ហើយប្រសិនបើពលរដ្ឋប្រទះឃើញដើមឈើណាមួយដែលអាចបង្កគ្រោះថ្នាក់ អាជ្ញាធរអប្សរាអំពាវនាវឲ្យជួយផ្ដល់ដំណឹង ដើម្បីឲ្យខ្លួនអាចកាត់ក្រីបានទាន់ពេលវេលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ