របាយការណ៍មួយ ទាមទារឲ្យអន្តរជាតិដាក់ទណ្ឌកម្មឲ្យច្បាស់លើកម្ពុជា ដើម្បីបញ្ចៀសហានិភ័យដល់ប្រជាជន
មជ្ឈមណ្ឌលសិក្សាស្រាវជ្រាវយុទ្ធសាស្ត្រអន្តរជាតិ ហៅកាត់ថា CSIS ដែលមានមូលដ្ឋាននៅរដ្ឋធានីវ៉ាស៊ីនតោន សហរដ្ឋអាមេរិក កាលពីថ្ងៃទី ១៩មិថុនា បានចេញផ្សាយរបាយការណ៍មួយក្រោមចំណងជើងថា សង្គមស៊ីវិលកម្ពុជានៅដំណាក់កាលដ៏គ្រោះថ្នាក់ (Cambodian Civil Society at a Critical Juncture)។ ជារបាយការណ៍កម្រាស់ ៣០ទំព័រ ដែលមានបរិយាយពីការធ្វើទុក្ខបុកម្នេញរបស់រដ្ឋាភិបាលលោកនាយករដ្ឋមន្ត្រីហ៊ុន សែន លើអង្គការសង្គមស៊ីវិលជាតិ និងអន្តរជាតិ អ្នកនយោបាយ និងប្រព័ន្ធផ្សព្វផ្សាយនានា ក្នុងពេលកន្លងមក។ ដោយផ្អែកលើហេតុការណ៍នានា របាយការណ៍ដដែល បានទាមទារឲ្យសហគមន៍អន្តរជាតិ ត្រូវតែធានាឲ្យមានការដាក់ទណ្ឌកម្មយ៉ាងជាក់លាក់មួយ ដល់រដ្ឋាភិបាលកម្ពុជា ដើម្បីជៀសវាងផលប៉ះពាល់អវិជ្ជមាន ដល់ប្រជាជនខ្មែរ និងសង្គមស៊ីវិល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
Center For Strategic & International Studies ឬ មជ្ឈមណ្ឌលសិក្សាស្រាវជ្រាវយុទ្ធសាស្ត្រអន្តរជាតិ បានសំណូមពរជាច្រើនចំនុចដល់ សហគមន៍អន្តរជាតិ ប្រទេសផ្តល់ជំនួយ អង្គការអន្តរជាតិ និងសង្គមស៊ីវិល ជុំវិញការវិវត្តដ៏អវិជ្ជមាននៅកម្ពុជានាពេលថ្មីៗនេះ ដែលញុំាងឲ្យការបោះឆ្នោតថ្នាក់ជាតិ នៅថ្ងៃទី ២៩កក្កដាខាងមុខ ដំណើរការទៅជាមួយភាពសោះកក្រោះ។ ចំពោះសហគមន៍អន្តរជាតិ មជ្ឈមណ្ឌលមួយនេះ បានទាមទារ ២ចំនុច ឲ្យមានការដាក់ទណ្ឌកម្មឲ្យបានច្បាស់លាស់លើកម្ពុជា និងជំរុញឲ្យមានកំណែទម្រង់ច្បាប់ឲ្យបានសមស្រប រួមទាំងពិនិត្យឡើងវិញលើច្បាប់ ដែលបានកែប្រែ ដូចជាច្បាប់ស្តីពីអង្គការសង្គមស៊ីវិល (LANGO) ច្បាប់ស្តីពីគណបក្សនយោបាយ និងច្បាប់ប្រមាថព្រះមហាក្សត្រ។ តាមមជ្ឈមណ្ឌលនេះ ប្រសិនបើមិនមានទណ្ឌកម្មច្បាស់លាស់ទេ កម្ពុជា នឹងមានរដ្ឋាភិបាលកុម្មុយនិស្ត ក្រោមការដឹកនាំរបស់គណបក្សតែមួយ។
ចំពោះម្ចាស់ជំនួយ និងអង្គការក្រៅរដ្ឋាភិបាលអន្តរជាតិ មជ្ឈមណ្ឌល CSIS បានសំណូមពរឲ្យមានការគាំទ្រ និងផ្តល់យន្តការការពារដល់សង្គមស៊ីវិល ដែលធ្វើការផ្នែកឃ្លាំមើលសិទ្ធិមនុស្សក្នុងប្រទេសកម្ពុជា។ សម្រាប់សង្គមស៊ីវិលនានា មជ្ឈមណ្ឌលនេះ បានឲ្យជាយោបល់ ឲ្យមានគម្រោងបណ្តុះបណ្តាលដល់ពលរដ្ឋតាមជនបទឲ្យបានទូលំទូលាយ រួមនឹងបង្កើនវិធានការទ្រទ្រង់ហិរញ្ញវត្ថុ និងកម្មវិធីផ្សេងៗ ដើម្បីចៀសវាងហានិភ័យណាមួយ។
គួរជម្រាបជូនថា អនុសាសន៍របស់មជ្ឈមណ្ឌល CSIS បានធ្វើឡើងក្នុងរបាយការណ៍ស្រាវជ្រាវសិទ្ធិមនុស្សរបស់ខ្លួនប្រចាំខែមិថុនា ឆ្នាំ ២០១៨ ក្រោមចំណងជើងថា សង្គមស៊ីវិលកម្ពុជានៅដំណាក់កាលដ៏គ្រោះថ្នាក់ (Cambodian Civil Society at a Critical Juncture)។ របាយការណ៍ ដែលបង្ហាញថា អង្គការសង្គមស៊ីវិលនៅក្នុងប្រទេសកម្ពុជា កំពុងស្ថិតនៅក្រោមគំនាប និងការបង្ក្រាប នាពេលសព្វថ្ងៃនេះ ដោយថាលោកនាយករដ្ឋមន្ត្រី ហ៊ុន សែន ព្យាយាមរក្សាអំណាចរបស់លោក និងបំផ្លាញយន្តការប្រជាធិបតេយ្យ តាមរយៈការបិទប្រព័ន្ធផ្សព្វផ្សាយ វាយប្រហារ និងរឹតបន្តឹងលើសង្គមស៊ីវិល និងការរំលាយបក្សប្រឆាំងចោល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ