លោកស្រី រ៉ូណា ស្មីត ជំរុញឲ្យគណបក្សធំៗទាំងពីរ វិលមកពង្រឹងវប្បធម៌សន្ទនាឡើងវិញ
អ្នករាយការណ៍ពិសេសរបស់អង្គការសហប្រជាជាតិទទួលបន្ទុកខាងសិទ្ធិមនុស្សប្រចាំនៅកម្ពុជា លោកស្រី រ៉ូ ណាស្មីត (Rohna Smith) បានជំរុញឲ្យគណបក្សធំៗទាំងពីរនៅក្នុងរដ្ឋសភា វិលមកពង្រឹងវប្បធម៌សន្ទនានឹងគ្នាឡើងវិញ។ ការលើកឡើងរបស់លោកស្រីស្មីត បានធ្វើឡើងនៅក្នុងជំនួបជាមួយរដ្ឋមន្រ្តីក្រសួងការបរទេសកម្ពុជាលោកប្រាក់ សុខុន កាលពីព្រឹកមិញនេះ។ សូមបញ្ជាក់ជូនថា វប្បធម៌សន្ទនារវាងគណបក្សប្រជាជនកម្ពុជា និងគណបក្សសង្រ្គោះជាតិ ដែលបង្កើតឡើងក្រោយការបោះឆ្នោតនៅឆ្នាំ២០១៣ បានជួបភាពរអាក់រអ៊ួលខ្លាំង ចាប់តាំងពីក្រោយខែកក្កដា ឆ្នាំ២០១៥មក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
ក្រៅពីការលើកឡើងជាទូទៅពីចំណុចវិជ្ជមាន និងអវិជ្ជមាននៃការគោរពសិទ្ធិមនុស្ស និងលទ្ធិប្រជាធិបតេយ្យ ដែលកម្ពុជាខ្លួនឯងត្រូវការការកែលម្អបន្ថែមទៀតនោះ លោកស្រី រ៉ូណា ស្មីត(Rohna Smith) អ្នករាយការណ៍ពិសេសរបស់អង្គការសហប្រជាជាតិទទួលបន្ទុកខាងសិទ្ធិមនុស្សប្រចាំនៅកម្ពុជា ក៏បានជំរុញឲ្យគណបក្សធំៗទាំងពីរនៅកម្ពុជា វិលមកពង្រឹងវប្បធម៌សន្ទនានឹងគ្នាឡើងវិញ។
វប្បធម៌សន្ទនារវាងគណបក្សប្រជាជនកម្ពុជា និងគណបក្សសង្រ្គោះជាតិ ដែលបានបង្កើតឡើង ដើម្បីបញ្ចប់ជម្លោះនយោបាយ ដែលអូសបន្លាយអស់រយៈពេលជាង ១ឆ្នាំ នៅក្រោយការបោះឆ្នោតជាតិនៅឆ្នាំ២០១៣នោះ បានជួបភាពរអាក់រអ៊ួលខ្លាំង ចាប់តាំងពីក្រោយខែកក្កដា ឆ្នាំ២០១៥មក ពោលគឺបន្ទាប់ពីមានការចាប់ខ្លួនសកម្មជនគណបក្សប្រឆាំងដាក់គុកឡើងវិញ។
ឆ្លើយតបនឹងការលើកឡើងនេះ លោក ប្រាក់ សុខុន ទេសរដ្ឋមន្រ្តី រដ្ឋមន្រ្តីក្រសួងការបរទេសកម្ពុជា បានប្រាប់ទៅកាន់អ្នករាយការណ៍ពិសេសរូបនេះថា រដ្ឋាភិបាលកម្ពុជាមិនមែនជាឧបសគ្គនៃវប្បធម៌សន្ទនានោះទេ។ នេះបើតាមការបញ្ជាក់ពីលោក ជុំ សុន្ទរី អ្នកនាំពាក្យក្រសួងការបរទេសកម្ពុជា។ បើតាមអ្នកនាំពាក្យរូបនេះ លោក ប្រាក់ សុខុន បានបញ្ជាក់ទៅកាន់អ្នករាយការណ៍ពិសេសរូបនេះថា ភ្ជាប់ជាមួយនឹងការគោរពសិទ្ធិមនុស្ស និងសេរីភាពនៃការបញ្ចេញមតិនេះ កម្ពុជាត្រូវការពង្រឹងនីតិរដ្ឋជាចាំបាច់ និងមិនអាចខ្វះបាន។
សូមបញ្ជាក់ថា ការជួបគ្នាចុងក្រោយ ដើម្បីពង្រឹងវប្បធម៌សន្ទនារវាងគណបក្សទាំងពីរ បានធ្វើឡើងកាលពីពាក់កណ្តាលខែកុម្ភៈ ឆ្នាំ២០១៦ រវាងប្រធានក្រុមមតិភាគច្រើននៅក្នុងរដ្ឋសភាដឹកនាំដោយលោក ស ខេង និងប្រធានក្រុមមតិភាគតិចនៅក្នុងរដ្ឋសភាដឹកនាំដោយលោក កឹម សុខា អនុប្រធានគណបក្សសង្រ្គោះជាតិ។ ប៉ុន្តែជំនួបដែលកាលណោះ គឺគ្មានលទ្ធផលលើរឿងនយោបាយ ដែលសកម្មជនគណបក្សប្រឆាំងកំពុងជាប់ពន្ធនាគារនោះទេ។
គួរជម្រាបជូនថា ការលើកឡើងរបស់លោកស្រី រ៉ូ ណាស្មីត (Rohna Smith) បានធ្វើឡើង ខណៈ ដែលអ្នករាយការណ៍ពិសេសរូបនេះ កំពុងបំពេញទស្សនកិច្ចជាលើកទី៣ របស់លោកស្រីនៅកម្ពុជា ដើម្បីពិនិត្យមើលស្ថានភាពសិទ្ធិមនុស្សនៅកម្ពុជា នឹងត្រៀមសរសេរជារបាយការណ៍ជូនក្រុមប្រឹក្សាសិទ្ធិមនុស្សអង្គការសហប្រជាជាតិ នៅខែកញ្ញាឆ្នាំ ២០១៧ ខាងមុខ។ ចាប់តាំងពីថ្ងៃទី ១០តុលាមក លោកស្រីស្មីត បានជួបជាមួយរដ្ឋមន្រ្តីក្រសួងយុត្តិធម៌ លោក អង្គ វង្សវឌ្ឍានា, ប្រធានគណកម្មាធិការសិទ្ធិមនុស្សរបស់រដ្ឋាភិបាលកម្ពុជា លោក កែវ រ៉េមី, អភិបាលក្រុងភ្នំពេញលោក ប៉ា សុជាតិវង្ស, លោក វង សូត្រ រដ្ឋមន្រ្តីក្រសួងសង្គមកិច្ច រួមនឹងជួបជាមួយ លោក កឹម សុខា ប្រធានស្តីទីគណបក្សសង្រ្គោះជាតិ និងមន្រ្តីអង្គការសង្គមស៊ីវិលផងដែរ។ លោកស្រីស្មីតនឹងបញ្ចប់ដំណើរទស្សនកិច្ចនៅកម្ពុជានៅថ្ងៃទី ២០តុលា ហើយលោកស្រី នឹងធ្វើសន្និសីទកាសែតមួយ ដើម្បីសរុបឡើងវិញពីលទ្ធផលនៃដំណើរទស្សនកិច្ចជាលើកទី៣នៅកម្ពុជានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ