៣ខែដើមឆ្នាំ២០១៥ កម្ពុជានាំចេញអង្ករបានជិត១៥ម៉ឺនតោន
កម្ពុជានាំចេញអង្ករបានចំនួន១៤ម៉ឺន ៩ពាន់៤៦៤តោន គិតត្រឹមត្រីមាសទី១ ឆ្នាំ២០១៥នេះ។ របាយការណ៍ចេញផ្សាយដោយសហព័ន្ធស្រូវអង្ករកម្ពុជាបង្ហាញថា នៅក្នុងខែមីនាឆ្នាំ២០១៥នេះ អង្ករដែលកម្ពុជានាំចេញទៅក្រៅប្រទេសមានចំនួនជាង៧ម៉ឺន៥ពាន់តោន កើនឡើងជាងការនាំចេញក្នុងខែកុម្ភៈ និងខែមករាដើមឆ្នាំនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
៣ខែដើមឆ្នាំ២០១៥នេះ អង្ករដែលកម្ពុជានាំចេញទៅបរទេសមានចំនួនជិត១៥ម៉ឺនតោន។ ក្នុងនោះខែមីនា នាំចេញបានច្រើនជាងគេ គឺរហូតដល់ទៅជាង៧ម៉ឺន៥ពាន់តោន។ ចំនួននេះ កើនឡើងប្រមាណ១១២,១៧ភាគរយ បើធៀបទៅនឹងរយៈពេលដូចគ្នាក្នុងឆ្នាំ២០១៤ ដែលមានតែជាង៣ម៉ឺន៥ពាន់តោនតែប៉ុណ្ណោះ។
បើតាមរបាយការណ៍ប្រចាំខែមីនា របស់សហព័ន្ធស្រូវអង្ករកម្ពុជា មានប្រភេទអង្ករចំនួន៤ ដែលកម្ពុជានាំចេញ។ ក្នុងនោះ នៅក្នុងខែ មីនាឆ្នាំ២០១៥នេះ កម្ពុជាបាននាំចេញអង្ករផ្កាម្លិះចំនួន២ម៉ឺន៥ពាន់៣២០តោន ស្មើនឹង៣៤ភាគរយ។ អង្ករក្រអូប ចំនួន៦ពាន់៣៤៧តោន ស្មើនឹង៨ភាគរយ។ អង្ករ ស ចំនួន ៤ម៉ឺន១៧៨តោន ស្មើនឹង៥៣ភាគរយ និងអង្ករចំហុយ៤ពាន់២២តោន ស្មើនឹង៥ភាគរយ។
នៅក្នុងការនាំចេញប្រចាំខែមីនានេះ ក្រុមហ៊ុន Golden Rice Cambodia នាំមុខគេនៅក្នុងចំនោមក្រុមហ៊ុនទាំង៦១ ដែលបាននាំចេញអង្ករខ្មែរទៅបរទេស។ Golden Rice Cambodia នាំអង្ករចេញបាន ១ម៉ឺន១ពាន់៧៩៧តោន។ តាមពីក្រោយក្នុងចំណាត់ថ្នាក់លេខពីរគឺក្រុមហ៊ុន Khmer Food Group នាំចេញបាន៨ពាន់៧៦៩តោន។ និងចំណាត់ថ្នាក់លេខបី គឺក្រុមហ៊ុន AMRU Rice Cambodia នាំចេញអង្ករបាន ៧ពាន់៨៦៨តោន។
របាយការណ៍ដដែលក៏បានឲ្យដឹងដែរថា ចិនគឺជាប្រទេសដែលនាំចូលអង្ករកម្ពុជាច្រើនជាងគេ ប្រចាំខែមីនា ឆ្នាំ២០១៥នេះ។ ប្រទេសម៉ាឡេស៊ី គឺជាប្រទេសនាំចូលអង្ករកម្ពុជាច្រើនទី២ និងទី៣ធ្លាក់ទៅលើប្រទេសបារាំង។ គួររំលឹកផងដែរថា នៅក្នុងឆ្នាំ២០១៤កន្លងទៅ កម្ពុជានាំអង្ករចេញបានប្រមាណ៣៨ម៉ឺន៧ពាន់តោន កើនឡើងបន្តិចបើធៀបទៅនឹងការនាំចេញអង្ករក្នុងឆ្នាំ២០១៣ ដែលមានចំនួន៣៧ម៉ឺន៨ពាន់តោន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ