លោក សម រង្ស៊ី ៖ «ទង្វើទាំងអស់ពីសំណាក់គណបក្សប្រជាជនគឺជារដ្ឋប្រហាររដ្ឋធម្មនុញ្ញ»
លោកសម រង្ស៊ី ដែលកំពុងស្ថិតនៅក្រៅប្រទេសនៅព្រឹកថ្ងៃពុធនេះ បានបញ្ចេញសារខ្លាំងតាមប្រព័ន្ធហ្វេសប៊ុករបស់លោកថាគណបក្សប្រជាជនកម្ពុជាបានធ្វើរដ្ឋប្រហាររដ្ឋធម្មនុញ្ញ។លោកសម រង្ស៊ី បានលើកហេតុផលនានាទាក់ទងទៅនឹងព្រឹត្តិការណ៍នយោបាយថ្មីៗមួយចំនួនដែលទីបញ្ចប់ឈានទៅចេញដីការចាប់ខ្លួនលោក។ក៏ប៉ុន្តែអ្នកនាំពាក្យគណបក្សប្រជាជនកម្ពុជាបានហៅការលើកឡើងរបស់លោកសម រង្ស៊ី ថាជាការបញ្ចេញមតិ ដែលមិនបានការ។
ចុះផ្សាយនៅថ្ងៃ៖
ស្តាប់ - ០២:១៦
នៅក្នុងសំណេរប្រមាណជា១ទំព័រ ជាភាសាខ្មែរនិងអង់គ្លេសនៅថ្ងៃពុធទី១៨វិច្ឆិកានេះ ប្រធានគណបក្សសង្គ្រោះជាតិ លោក សម រង្ស៊ី បានសរសេរថា ទង្វើទាំងអស់ដែលកើតមាន ពីសំណាក់គណបក្សប្រជាជនកម្ពុជាគឺជារដ្ឋប្រហាររដ្ឋធម្មនុញ្ញ ដែលនាំមកនូវផលប៉ះពាល់ផ្លូវច្បាប់ និងផ្លូវនយោបាយ ដូចរដ្ឋប្រហារយោធា ដែលពួកគេបានធ្វើនៅថ្ងៃ ៥-៦កក្កដា ឆ្នាំ១៩៩៧ អញ្ចឹងដែរ ដែលផលប៉ះពាល់ចម្បង គឺបំផ្លាញដំណើរការប្រជាធិបតេយ្យ ដែលមានធានាក្នុងកិច្ចព្រមព្រៀងសន្តិភាពទីក្រុងប៉ារីស។
លោកសម រង្ស៊ី រៀបរាប់ថាបន្ទាប់ពីទង្វើយ៉ាងយ៉ង់ឃ្នងមួយចំនួនថ្មីៗនេះ ពីសំណាក់គណបក្សប្រជាជនកម្ពុជា មកលើគណបក្សសង្គ្រោះជាតិ ក្នុងនោះមានការចាប់ខ្លួនសមាជិកព្រឹទ្ធសភាលោក ហុង សុខហួរ ដាក់ពន្ធនាគារ ការវាយដំយ៉ាងសាហាវមកលើតំណាងរាស្ត្រគណបក្សប្រឆាំង២រូបគឺលោក ញ៉យ ចំរើន និងលោក គង់ សភា ការដកលោក កឹម សុខា ចេញពីតំណែងអនុប្រធានទី១ រដ្ឋសភា និងទង្វើបន្ថែមទៀតជាចុងក្រោយ គឺការចេញដីកាឲ្យចាប់រូបលោក ក្នុងឋានៈ ជាប្រធានគណបក្សសង្គ្រោះជាតិ ទោះជាលោកមានអភ័យឯកសិទ្ធិសភាយ៉ាងណាក៏ដោយ។
មេបក្សប្រឆាំង បញ្ចប់សំណេររបស់លោកថា ទង្វើទាំងអស់នេះ ឈានទៅដល់ការបញ្ចប់តួនាទីរបស់គណបក្សប្រឆាំងតែមួយគត់ដែលមានអាសនៈក្នុងរដ្ឋសភា ហើយបង្ហាញថាប្រទេសកម្ពុជាបានវិលត្រឡប់ទៅរកប្រព័ន្ធបក្សតែមួយ ដូចមុនថ្ងៃចុះហត្ថលេខាលើកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១។
ពាក់ព័ន្ធនឹងសារនយោបាយរបស់លោកសម រង្ស៊ី នេះដែរ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានប្រាប់វិទ្យុបារាំង RFI ថា ការលើកឡើងរបស់មេបក្សប្រឆាំង
គឺជាទំលាប់របស់គាត់ មិនមានអ្វីគួរឲ្យភ្ញាក់ផ្អើលទេ ហើយក៏មិនប៉ះពាល់គណបក្សប្រជាជន ដែរ។
សូមបញ្ជាក់ថា លោក សម រង្ស៊ី ត្រូវបានរដ្ឋសភាចេញសេចក្តីសម្រេច ដកហូតសិទ្ធិ បុព្វសិទ្ធនិងសមាជិកភាពជាអ្នកតំណាងរាស្ត្រកាលពីថ្ងៃទី១៦វិច្ឆិកា ដោយយោងទៅលើរដ្ឋធម្មនុញ្ញ បទបញ្ជាផ្ទៃក្នុង និងលក្ខន្តិកៈអ្នកតំណាងរាស្ត្រ ដើម្បីបើកផ្លូវឲ្យតុលាការអនុវត្តសាលដីកាចាប់ខ្លួនលោក លើករណីបណ្តឹងបរិហារកេរ្តិ៍លោកហោ ណាំហុង រដ្ឋមន្ត្រីការបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ