លោក សម រង្ស៊ី រងពិន័យជាប្រាក់១៦០លានរៀលលើបណ្តឹងបរិហាកេរ្តិ៍លោក ហេង សំរិន
តុលាការក្រុងភ្នំពេញ នៅព្រឹកថ្ងៃទី២៨កក្កដាឆ្នាំ២០១៦នេះ បានបើកសវនាការកាត់ទោសកំបាំងមុខលោក សម រង្ស៊ី ប្រធានគណបក្សប្រឆាំងនៅកម្ពុជា ដោយពិន័យជាប្រាក់១៦០លានរៀល។ ជាបណ្តឹងបរិហាកេរ្តិ៍ដែលប្តឹងដោយលោក ហេង សំរិន ប្រធានរដ្ឋសភាកម្ពុជា។ ជុំវិញសេចក្តីសម្រេចនេះ លោក គី តិច មេធាវីតំណាងលោក ហេង សំរិន មិនទាន់ពេញចិត្តទាំងស្រុងនោះទេ ខណៈមេធាវីលោក សម រង្ស៊ី មិនចាប់អារម្មណ៍ទៅលើសំណុំរឿងនេះឡើយ។
ចុះផ្សាយនៅថ្ងៃ៖
ស្តាប់ - ០២:១៦
សេចក្តីសម្រេចរបស់តុលាការក្រុងភ្នំពេញបានផ្អែកទៅលើមាត្រា៣០៥នៃក្រមព្រហ្មទណ្ឌកម្ពុជា ដែលបានសម្រេចចោទប្រកាន់លោក សម រង្ស៊ី ថា បានបរិហាកេរ្តិ៍លោក ហេង សំរិនជាសាធារណៈ។ ក្នុងនោះ តុលាការទីក្រុងភ្នំពេញ បានសម្រេចពិន័យប្រាក់ លោក សម រង្ស៊ី ប្រធានគណបក្សសង្រ្គោះជាតិ ចំនួន១៦០លានរៀល ដោយបានបែងចែក ១០លានរៀលបង់ចូលថវិការដ្ឋ និង១៥០លានរៀលទៀត សម្រាប់សងជម្ងឺចិត្តដល់ភាគីដើមបណ្តឹង។
នេះបើយោងតាមសេចក្តីសម្រេចរបស់តុលាការក្រុងភ្នំពេញ ដឹកនាំដោយលោក រស់ ពិសិដ្ឋ ជាចៅក្រមជំនុំជម្រះ បន្ទាប់ពីបានបើកសវនាការដែលបានចំណាយពេលប្រមាណជា២ម៉ោង ដោយមិនមានភាគីមេធាវីតំណាង លោក សម រង្ស៊ី ចូលរួមឡើយ។
គួររំលឹកជូនថា លោក សម រង្ស៊ី ប្រធានគណបក្សសង្រ្គោះជាតិ ដែលកំពុងរស់នៅដោយនិរទេសខ្លួននៅក្រៅប្រទេសជាលើកទី២ បានរងបណ្តឹងបរិហាកេរ្តិ៍លោក ហេង សំរិន ប្រធានរដ្ឋសភាជាតិកម្ពុជា បន្ទាប់ពីលោកបានបង្ហោះវីដេអូខ្លីបមួយ កាលពីថ្ងៃទី១៧វិច្ឆិកាឆ្នាំមុន ដោយបានចោទប្រកាន់របបរដ្ឋកម្ពុជា ដែលដឹកនាំដោយលោក ហេង សំរិនថា បានកាត់ទោសព្រះបរមរតនកោដ្ឋ សម្តេចព្រះ នរោត្តម សីហនុ ថា ជាជនក្បត់ជាតិ។
ជុំវិញសេចក្តីសម្រេចនេះ លោក គី តិច មេធាវីតំណាងលោក ហេង សំរិន នៅមិនទាន់ពេញចិត្តនៅឡើយទេ។ លោក គី តិច បានអះអាងថា ការសម្រេចបង់ប្រាក់ពិន័យ១៥០លានរៀលទៅឲ្យកូនក្តីរបស់លោក គឺមិនទាន់សមស្របទៅនឹងអ្វីដែលប្រធានគណបក្សសង្គ្រោះជាតិ លោក សម រង្ស៊ី បានធ្វើមកលើកូនក្ដីរបស់លោកនោះឡើយ។ លោកបន្តថា កូនក្តីរបស់លោក គឺលោក ហេង សំរិន ក្នុងនាមជាប្រធានកិត្តិយសគណបក្សប្រជាជនកម្ពុជា និងជាប្រធានរដ្ឋសភាផង បានរងប៉ះពាល់កិត្តិយសយ៉ាងធ្ងន់ធ្ងរ។ គួរជម្រាបជូនថា លោក គី តិច មេធាវីតំណាងលោក ហេង សំរិន បានប្តឹងទាមទារសំណងជម្ងឺចិត្តពីលោក សម រង្ស៊ី ចំនួន៣០០លានរៀល។
សូមបញ្ជាក់ដែរថា ក្រៅពីសំណុំរឿងបរិហាកេរ្តិ៍លោក ហេង សំរិន នេះ លោក សម រង្ស៊ី កំពុងញ៉ាំញីដោយបណ្តឹងចំនួន៣ផ្សេងទៀត។ ប៉ុន្តែយ៉ាងណាក៏ដោយ ប្រធានគណបក្សប្រឆាំងរូបនេះ ធ្លាប់បានផ្តល់បទសម្ភាសន៍ដល់វិទ្យុបារាំងអន្តរជាតិ RFI ថា កុំថាឡើយបណ្តឹង៤ ដែលកំពុងប្រឆាំងនឹងលោក ទោះបណ្តឹង១០០ ក៏លោកមិនចាប់អារម្មណ៍ឡើយ។ ដោយឡែក ជុំវិញអវត្តមានមេធាវីការពារក្តីលោក សម រង្ស៊ី នៅថ្ងៃនេះវិញ ត្រូវបានលោក ជូង ជូងី មេធាវីប្រចាំគណបក្សសង្រ្គោះជាតិអះអាងថា មកពីលោក សម រង្ស៊ី មិនឲ្យតម្លៃទៅលើបណ្តឹងនេះ ហើយលោកក៏មិនបានពឹងពាក់មេធាវីឲ្យការពារក្តីលើសំណុំរឿងនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ