លោក សម រង្ស៊ី នៅតែបន្តលើកឡើងប្រឆាំងនឹងការបោះឆ្នោត ថ្ងៃទី២៩ ខែកក្កដា
ជាថ្មីម្តងទៀត លោក សម រង្ស៊ី បានអះអាងតាមរយៈបណ្តាញសង្គមរបស់លោកថា ថ្ងៃទី២៩ ខែកក្កដា ខាងមុខនេះ មិនមែនជាថ្ងៃបោះឆ្នោតនោះទេ តែជាថ្ងៃអាយុជីវិតរបស់ប្រទេសកម្ពុជា។ ជាការលើកឡើងដដែលៗរបស់អតីតប្រធានគណបក្សសង្រ្គោះជាតិ ខណៈការបោះឆ្នោតនៅក្នុងប្រទេសកម្ពុជានៅសល់មួយសប្តាហ៍ទៀតប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:០៦
លោក សម រង្ស៊ី តាមរយៈវីដេអូក្នុងបណ្តាញសង្គមហ្វេសប៊ុករបស់លោក កាលពីថ្ងៃទី១៩ ខែកក្កដា បានអះអាងថា ប្រសិនបើពលរដ្ឋកម្ពុជាទៅបោះឆ្នោត នោះនឹងធ្វើឲ្យបាត់បង់ប្រទេសកម្ពុជា ពីព្រោះការបោះឆ្នោតខាងមុខនេះ នឹងអនុញ្ញាតឲ្យលោកនាយករដ្ឋមន្ត្រី ហ៊ុន សែន កាន់អំណាចតទៅទៀត ហើយការកាន់អំណាចតទៅទៀត នឹងឲ្យធ្វើខូចខាតដល់ប្រទេសកម្ពុជា។
អតីតមេដឹកនាំគណបក្សប្រឆាំង ដែលកំពុងរស់នៅនិរទេសខ្លួនក្រៅប្រទេស តាមរយៈវីដេអូ៣នាទីនោះ បានបន្តវាយប្រហារខ្លាំងៗ មកលើលោកនាយករដ្ឋមន្ត្រី ហ៊ុន សែន ហើយបានលើកឡើងពីការជំពាក់បំណុលប្រទេសវៀតណាម និងចិន ក្រោមការដឹកនាំរបស់លោកនាយករដ្ឋមន្ត្រីហ៊ុន សែន បច្ចុប្បន្ន។
អំឡុងពេលនៃការធ្វើយុទ្ធនាការឃោសនាបោះឆ្នោតពីថ្ងៃទី០៧ ដល់ថ្ងៃទី២៧ ខែកក្កដា លោក សម រង្ស៊ី បានធ្វើយុទ្ធនាការផ្សាយខិត្តប័ណ្ណអេឡិចត្រូនិច តាមបណ្តាញសង្គម ដើម្បីអំពាវនាវមិនឲ្យប្រជាពលរដ្ឋទៅបោះឆ្នោតនៅថ្ងៃទី២៩ ខែកក្កដា។ ជាការបោះឆ្នោត ដែលអតីតគណបក្សប្រឆាំងអះអាងថាក្លែងក្លាយ ព្រោះអវត្តមានគណបក្សសង្រ្គោះជាតិ។ ក្រៅពីការផ្សាយខិត្តប័ណ្ណតាមបណ្តាញសង្គមហ្វេសប៊ុក មន្ត្រីអតីតគណបក្សសង្រ្គោះជាតិមួយចំនួនទៀត បានធ្វើយុទ្ធនាការសិទ្ធិម្រាមដៃស្អាត ដើម្បីបង្ហាញពីការមិនចូលរួមបោះឆ្នោត។
ផ្ទុយទៅវិញ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានថ្លែងថា ការអំពាវនាវមិនឲ្យប្រជាពលរដ្ឋទៅបោះឆ្នោត ម្តងហើយម្តងទៀតរបស់លោក សម រង្ស៊ី នេះ គឺជាការអំពាវនាវ ដែលគ្មានប្រសិទ្ធភាព។ លោក សុខ ឥសាន បន្តថា យុទ្ធនាការកៀងគរ និងភូតកុហក ប្រជាពលរដ្ឋមិនឲ្យទៅបោះឆ្នោតរបស់អតីតមេដឹកនាំគណបក្សប្រឆាំង មិនមានក្តីសង្ឃឹមទេ ខណៈដែលថ្ងៃបោះឆ្នោតកាន់តែខិតជិតមកដល់។
គួរជម្រាបជូនថា ការបោះឆ្នោតជ្រើសតាំងតំណាងរាស្ត្រនីតិកាលទី៦ គ្រោងនឹងធ្វើឡើងនៅថ្ងៃទី២៩ ខែកក្កដា ខាងមុខ ដែលមានគណបក្សនយោបាយចំនួន២០ចូលរួមប្រកួតប្រជែង។ មកទល់ពេលនេះ គណៈកម្មាធិការជាតិរៀបចំការបោះឆ្នោត(គ.ជ.ប) កំពុងញាប់ដៃញាប់ជើងបំពេញការងាររបស់ខ្លួន ដោយសន្លឹកឆ្នោតមួយចំនួនត្រូវបានដឹកទៅកាន់មណ្ឌលបោះឆ្នោតនានាជាបន្តបន្ទាប់ និងប្រកបដោយសុវត្ថិភាព។ សន្តិសុខត្រូវបានត្រៀម អ្នកសង្កេតការណ៍ជាតិ និងអន្តរជាតិ ក៏ត្រូវបានកំណត់រួចរាល់ជាស្រេច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ