តុលាការក្រុងភ្នំពេញ បង្គាប់ឲ្យលោកសម រង្ស៊ី ចូលបំភ្លឺរឿងសមគំនិតជាមួយលោកហុង សុខហួរ
តុលាការសាលាដំបូងរាជធានីភ្នំពេញនៅរសៀលថ្ងៃសុក្រនេះ បានចេញដីកាបង្គាប់លោកសម រង្ស៊ី ឲ្យចូលខ្លួនមកបំភ្លឺជុំវិញរឿងសមគំនិតក្នុងអំពើក្លែងឯកសារសាធារណៈ ប្រើប្រាស់ឯកសារសាធារណៈក្លែងក្លាយ និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គមប្រព្រឹត្តនៅក្នុងទីក្រុងភ្នំពេញកាលពីថ្ងៃទី១២ និងថ្ងៃទី១៣ សីហាឆ្នាំ២០១៥។ បទចោទនេះ គឺស្ថិតនៅក្នុងសំណុំរឿងតែមួយជាមួយករណីលោកហុង សុខហួរ សមាជិកព្រឹទ្ធសភាគណបក្សសម រង្ស៊ី ពាក់ព័ន្ធការក្លែងសន្ធិសញ្ញាព្រំដែនរវាងកម្ពុជា និងវៀតណាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
មិនទាន់ទាំងបានស្វែងរកឃើញនូវដំណោះស្រាយ ដើម្បីវិលត្រឡប់មកកាន់ប្រទេសកម្ពុជាវិញផង នៅពេលនេះលោកសម រង្ស៊ី ប្រធានគណបក្សសង្រ្គោះជាតិកំពុងរងនូវការចោទប្រកាន់មួយថ្មីទៀតទាក់ទងនឹងករណីក្លែងឯកសារព្រំដែនរវាងកម្ពុជា និងវៀតណាម។ គឺនៅថ្ងៃសុក្រទី២០ វិច្ឆិកា លោកកោ វណ្ឌី ចៅក្រមស៊ើបសួរនៃសាលាដំបូងរាជធានីភ្នំពេញ បានបង្គាប់ឲ្យ លោកសម រង្ស៊ី ប្រធានគណបក្សសង្រ្គោះជាតិឲ្យចូលខ្លួនមកកាន់តុលាការនៅថ្ងៃទី០៤ ខែធ្នូ ឆ្នាំ២០១៥ នាវេលាម៉ោង៨ និង៣០នាទីព្រឹក ដើម្បីសាកសួរ។ តុលាការក្រុងភ្នំពេញ បានចោទលោកសម រង្ស៊ី ថាបានសមគំនិតជាមួយលោកហុង សុខហួរ សមាជិកព្រឹទ្ធសភាគណបក្សសម រង្ស៊ី ក្នុងការក្លែងឯកសារសាធារណៈ ប្រើប្រាស់ឯកសារសាធារណៈក្លែងក្លាយ និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គមដែលបានប្រព្រឹត្តនៅក្នុងទីក្រុងភ្នំពេញកាលពីថ្ងៃទី១២ និងថ្ងៃទី១៣ សីហាឆ្នាំ២០១៥។
ដីកាថ្មីនេះ គឺជាដីកាទីពីរហើយដែលធ្វើឡើងលើលោកសម រង្ស៊ី ក្នុងរង្វង់តែមួយសហ្តហ៍ប៉ុណ្ណោះ បន្ទាប់ពីលោកត្រូវបានតុលាការក្រុងភ្នំពេញចេញដីកាឲ្យចាប់ខ្លួនយកមកអនុវត្តទោសក្នុងពន្ធនាគារម្តងរួចមកហើយកាលពីថ្ងៃទី១៣ វិច្ឆិកា កន្លងទៅ។ ហើយការចេញដីកានេះទៀតសោត បានធ្វើឡើងស្របពេលដែលប្រធានគណបក្សសង្រ្គោះជាតិកំពុងស្ថិតនៅក្នុងប្រទេសហ្វីលីពីនឯណោះ។
លោកអ៊ូ ច័ន្ទរិទ្ធ មន្រ្តីជាន់ខ្ពស់របស់គណបក្សសង្រ្គោះជាតិ បានចាត់ទុកដីកាថ្មីរបស់តុលាការនេះថា គឺជាការដាក់សម្ពាធបន្ថែមទៀតមកលើលោកសម រង្ស៊ី ដែលជាប្រធានគណបក្សប្រឆាំងធំបំផុតនៅក្នុងប្រទេសកម្ពុជា។ បើតាមលោកអ៊ូ ច័ន្ធរិទ្ធ គណបក្សសង្រ្គោះជាតិនឹងប្រជុំផ្ទៃក្នុង ដើម្បីដោះស្រាយបញ្ហានេះ។ ទោះយ៉ាងណា មន្ត្រីជាន់ខ្ពស់រូបនេះ មិនបានបញ្ជាក់ទេថា តើលោកសម រង្ស៊ីនឹងចូលខ្លួនតាមការបង្គាប់របស់តុលាការឫយ៉ាងណា។ ប៉ុន្តែ លោកចៅក្រមកោ វណ្ឌី បានព្រមានហើយថា ប្រសិនបើលោកសម រង្ស៊ី មិនចូលខ្លួនតាមកាលកំណត់ទេនោះ លោកនឹងចេញដីកាបង្គាប់ឲ្យនាំខ្លួនឫដីកាបង្គាប់ឲ្យចាប់ខ្លួនទៅតាមច្បាប់តែម្តង។
គួររំលឹកជូនថា ពាក់ព័ន្ធនឹងសំណុំរឿងនេះ កាលពីថ្ងៃទី២៥ តុលាកន្លងទៅ លោកនាយករដ្ឋមន្រ្តីហ៊ុន សែន នៅក្នុងជំនួបជាមួយនិស្សិតខ្មែរនៅក្នុងប្រទេសបារាំង ធ្លាប់បានបញ្ជាក់ថា ករណីលោកហុង សុខហួរអាចនឹងជាប់ពាក់ព័ន្ធជាមួយនឹងលោកសម រង្ស៊ី ដែលជាម្ចាស់ទំព័រហ្វេសប៊ុកដែលបានបង្ហោះនូវការអត្ថាធិប្បាយរបស់លោកហុង សុខហួរ ទាកទង់សន្ធិសញ្ញាព្រំដែនរវាងកម្ពុជា និងវៀតណាម។
លោកមាស នី អ្នកស្រាវជ្រាវ ដើម្បីការអភិវឌ្ឍសង្គម និងជាអ្នកតាមដានស្ថានការនយោបាយកម្ពុជាមួយរូបយល់ថា ការចេញដីកាទាំងនេះ វាជាការរៀបចំឡើងដោយរដ្ឋាភិបាល មិនមែនតុលាការជាអ្នកធ្វើនោះទេ។ លោកមាស នី ថែមទាំងចាត់ទុកថា នេះជាផ្នែកមួយនៃនយោបាយបិទទ្វារវ៉ៃឆ្កែរបស់រដ្ឋាភិបាល ដើម្បីកុំឲ្យលោកសម រង្ស៊ី អាចវិលត្រឡប់មកកាន់ប្រទេសកម្ពុជាវិញបាន។ លោកសុខ ឥសាន អ្នកនាំពាក្យគណបក្សប្រជាជនកម្ពុជា បានមានប្រសាសន៍ថា ការចេញដីកានេះ គឺជាឆន្ទានុសិទ្ធរបស់តុលាការ ដែលបានស្រាវជ្រាវលើករណីនេះតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ