សង្គមស៊ីវិលស្នើរដ្ឋាភិបាលផ្អាកការបូមខ្សាច់សមុទ្របណ្ដោះអាសន្ន
តំណាងអង្គការសង្គមស៊ីវិលនៅព្រឹកថ្ងៃសុក្រនេះ បានស្នើទៅរដ្ឋាភិបាលឲ្យផ្អាកការបូមខ្សាច់សមុទ្រនៅខេត្តកោះកុងបណ្ដោះអាសន្ន ខណៈភាពចម្រូងចម្រាសតួលេខនៃការនាំចេញខ្សាច់ទៅសិង្ហបុរីមិនទាន់ត្រូវបានបង្ហាញ។ ខ្សាច់សមុទ្រគឺជាប្រភេទខ្សាច់ដែលរដ្ឋាភិបាលនាំចេញទៅក្រៅប្រទេស ។ ហើយខ្សាច់ទន្លេវិញគេទុកសម្រាប់ផ្គត់ផ្គង់នៅក្នុងស្រុក។
ចុះផ្សាយនៅថ្ងៃ៖
ស្តាប់ - ០១:៥៥
ការស្នើសុំនេះត្រូវបានធ្វើឡើងក្នុងជំនួបរវាងតំណាងអង្គការសង្គមស៊ីវិល១០ស្ថានប័នក្នុងចំណោមពួកគេជិត៥០ស្ថាប័នជាមួយតំណាងក្រសួងរ៉ែនិងថាមពល។ ជំនួបពេញមួយព្រឹកធំនេះ ភាគីទាំងពីរមិនទាន់ឯកភាពរួមគ្នាជុំវិញតួលេខនៃការនាំខ្សាច់ចេញទៅសិង្ហបុរីនោះទេ។ ប៉ុន្តែភាគីទាំងពីរបានឯកភាពធ្វើការរួមគ្នាដើម្បីរកឲ្យឃើញនូវតួលេខពិតប្រាកដ។ ការងាររួមគ្នានោះធ្វើឡើងតាមរយៈការបង្ហាញភ័ស្តុតាងនិងភាពមិនប្រក្រតីនានាជាដើមដែលសង្គមរកឃើញប្រគល់ជូនរដ្ឋាភិបាល។
សូមបញ្ជាក់ថា ភាពចម្រូងចម្រាសតួលេខនៃការនាំខ្សាច់ចេញនោះ គឺរដ្ឋាភិបាលថា ក្នុងអំឡុងឆ្នាំ២០០៧ដល់២០១៥ ខ្សាច់នាំចេញទៅសិង្ហបុរីមានចំនួន២,៨លានតោន។ តែសម្រាប់សង្គមស៊ីវិលក្នុងរយៈពេលដូចគ្នានេះរដ្ឋាភិបាលនាំខ្សាច់ចេញទៅក្រៅប្រទេសមានរហូតដល់ជាង១៧លានតោន។ តែយ៉ាងណាមិញ លោក សន ជ័យ តំណាងអង្គការសង្គមស៊ីវិលនិងជាប្រធានសម្ព័ន្ធគណនេយ្យភាពសង្គមកម្ពុជាលើកឡើងក្រោយជំនួបនោះថា រដ្ឋាភិបាលបន្តអះអាងថា ខ្សាច់ជាង២លានតោននាំចេញទៅសិង្ហបុរី។ ចំណែកខ្សាច់ជាង១៧លានតោនរដ្ឋាភិបាលមិនទាន់បង្ហាញថា នាំចេញទៅប្រទេសណាខ្លះនោះទេ។
លោក សន ជ័យ បន្ថែមថា រដ្ឋាភិបាលក៏មិនបានធ្វើការបដិសេធទាំងស្រុងដែរ ជុំវិញភាពខុសគ្នានៃតួលេខក្នុងការនាំចេញនេះ ព្រោះជួនកាលរបៀបនៃធ្វើការរបស់រដ្ឋាភិបាលកម្ពុជានិងប្រទេសសិង្ហបុរីមានលក្ខណៈខុសគ្នា។ សម្រាប់សង្គមស៊ីវិលលោក សន ជ័យ អះអាងថា នឹងស្រាវជ្រាវបន្ថែមទៀតពីរបៀបនៃការកត់ត្រាខ្សាច់របស់ប្រទេសសិង្ហបុរី ។ សង្ហបុរីដែល លោក សន ជ័យ បង្ហាញជឿជាក់ថា មានតម្លាភាពនិងគ្មានអំពើពុករលួយទាក់ទងការនាំចូលខ្សាច់ពីកម្ពុជា។
វិទ្យុបារាំងមិនអាចធ្វើការទាក់ទងមន្ត្រីអ្នកនាំពាក្យក្រសួងរ៉ែដើម្បីឆ្លើយតបនឹងការស្នើសុំរបស់សង្គមស៊ីវិលឲ្យផ្អាកការបូមខ្សាច់សមុទ្របណ្ដោះអាសន្នក្នុងខេត្តកោះកុងនោះទេ។ តែកន្លងមកក្រសួងរ៉ែ បានអះអាងថា អាជីវកម្មខ្សាច់ទាំងអស់សុទ្ធតែមានអាជ្ញាបណ្ណ ហើយរាល់ការបូមខ្សាច់ទាំងអស់ត្រូវបានវាយតម្លៃយ៉ាងដិតដល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ