លោក សេន សុវណ្ណ ៖ ក្រសួងកសិកម្ម ដាក់ស្រុកស្វាយជ្រុំ ស្ថិតក្រោមការត្រួតពិនិត្យជំងឺផ្តាសាយបក្សី មួយខែ
ចុះផ្សាយនៅថ្ងៃ៖
ស្តាប់ - ១២:០៧
ភ្ញៀវប្រចាំថ្ងៃរបស់វិទ្យុបារាំងអន្តរជាតិនៅយប់នេះ គឺលោក សេន សុវណ្ណ ប្រតិភូរាជរដ្ឋាភិបាលកម្ពុជា ទទួលបន្ទុកជា អគ្គនាយក នៃអគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម រុក្ខាប្រមាញ់ និងនេសាទ។ នៅដើមឆ្នាំ២០១៧នេះ មានការផ្ទុះរីករាលដាលឡើងវិញនៃជំងឺផ្តាសាយបក្សី លើសត្វមាន់ ទា ក្នុងខេត្តចំនួនពីរ គឺ ខេត្តកំពង់ធំ និង ខេត្តស្វាយរៀង ដែលប៉ះពាល់សត្វទា ប្រមាណ ៣០០០ក្បាល និងមាន់ ជិត ៣០០ក្បាល ។ លោក សេន សុវណ្ណ បានបញ្ជាក់ថា ក្រសួងកសិកម្ម បានប្រកាសដាក់ ស្រុកស្វាយជ្រុំ ខេត្តស្វាយរៀង ជាតំបន់ស្ថិតក្រោមការត្រួតពិនិត្យ ជំងឺផ្តាសាយបក្សី រយះពេល មួយខែ រាប់ចាប់ពីថ្ងៃទី ២៨ មករា ដល់ថ្ងៃទី២៨ ខែកុម្ភៈ ដោយហាមមិនឲ្យធ្វើចរាចលក់ដូរសត្វមាន់ទេ។ នៅពេលផុតរយៈពេល មួយខែនេះ ប្រសិនបើ ក្រសួងរកឃើញថា គ្មានបក្សីឈឺថ្មីទៀត ហើយការរកវត្ថុវិភាគក៏គ្មានមេរោគ H5N1 នោះក្រសួង នឹងប្រកាសរំសាយ តំបន់នោះ ទៅជា តំបន់គ្មានផ្តាសាយបក្សី ហើយអនុញ្ញាតឲ្យពលរដ្ឋចិញ្ចឹម និងលក់ដូរ មាន់ឡើងវិញបាន។
