ពលរដ្ឋខ្មែរជាង៤.៥លាននាក់ ចូលរួមទស្សនាពិធីបុណ្យអុំទូករយៈពេល៣ថ្ងៃក្នុងបរិយាកាសសប្បាយរីករាយ
ចប់ហើយពិធីបុណ្យអុំទូករយៈពេល៣ថ្ងៃ នៅក្នុងទីក្រុងភ្នំពេញ។ ទូកដែលទទួលបានជ័យលាភីលេខ១ផ្នែកបុរស គឺទូកមកពីខេត្តព្រះវិហារ ដែលឧបត្ថម្ភដោយលោក ហ៊ីង ប៊ុនហៀង មេបញ្ជាការកងអង្គរក្សលោកនាយករដ្ឋមន្ត្រី ហ៊ុន សែន។ ដោយឡែកលើផ្នែកសន្តិសុខសណ្តាប់ធ្នាប់សាធារណៈវិញ របាយការណ៍របស់គណៈកម្មការការពារនៃក្រសួងមហាផ្ទៃបានអះអាងថា ក្នុងរយៈពេល៣ថ្ងៃ៣យប់មកនេះ គ្មានឡើយអសន្តិសុខ និងអំពើហិង្សា។ នៅក្នុងរយៈពេល៣ថ្ងៃមកនេះ មនុស្សប្រមាណជាង៤.៥លាននាក់បានចូលរួមទស្សនាពិធីបុណ្យអុំទូកឆ្នាំនេះ។
ចុះផ្សាយនៅថ្ងៃ៖
ស្តាប់ - ០២:៥២
គ្មានឡើយអំពើហិង្សា និងអសន្តិសុខកើតឡើងនៅក្នុងរយៈពេល៣ថ្ងៃនៃព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ដែលបានបិទបញ្ចប់ទៅ កាលពីយប់ថ្ងៃទី ២៣ វិច្ឆិកា។ នេះបើតាមការគូសបញ្ជាក់ពីលោកឧត្តមសេនីយ៍ឯក ឆាយ គឹមខឿន ប្រធានលេខាធិការដ្ឋាន នៃគណៈកម្មការការពារនៃក្រសួងមហាផ្ទៃ។ បើតាមលោកឧត្តមសេនីយ៍ឯក មានបទល្មើសតិចតួចបានកើតឡើង ដូចជាករណីចោរលូកហោប៉ៅ ករណីក្មេងវង្វេង និងករណីចោរកម្មតិចតួចបានកើតឡើង។ ប៉ុន្តែអាជ្ញាធរបានចាត់ទុកថា នេះគឺជារឿងធម្មតានៅក្នុងពិធីបុណ្យជាតិដែលមានមនុស្សរាប់លាននាក់ចូលរួមទស្សនា។
បើតាមលោកឧត្តមសេនីយ៍ឯក នៅថ្ងៃចុងក្រោយនៃព្រះរាជពិធីបុណ្យអុំទូកនេះ បរិយាកាសកាន់តែល្អប្រសើ បើធៀបនឹងថ្ងៃទី០១ និងថ្ងៃទី០២។ ក្នុងនោះសភាពការណ៍បទល្មើស មានករណីលួចម៉ូតូបាត់អស់១គ្រឿងប៉ុណ្ណោះ។ ចំណែកឯសភាពការណ៍គ្រោះថ្នាក់ផ្សេងៗវិញ មានករណីលិចទូក២លើក សង្គ្រោះកីឡាករអុំទូកលិចបានចំនួន៩១នាក់ ដោយសុវត្ថិភាព។ លើលទ្ធផលអន្តរាគមន៍និងសង្គ្រោះវិញ អាជ្ញាធរបានជួយសង្គ្រោះក្មេងវង្វេងគ្រួសារចំនួន៣៥លើកស្មើ៣៦នាក់ ប្រគល់ជូនក្រុមគ្រួសារវិញ, ឃាត់ជនស៊ីវិលពាក់អាវមានអក្សរ Police និង ARMY ចំនួន៥នាក់ ធ្វើការអប់រំ ដកហូតអាវ និងអនុញ្ញាតឲ្យត្រឡប់ទៅផ្ទះវិញ។
គួរជំរាបជូនថា នៅក្នុងពិធីបុណ្យអុំទូករយៈពេល៣ថ្ងៃនៅទីក្រុងភ្នំពេញ អាជ្ញាធរកម្ពុជាបានដាក់ពង្រាយកងកម្លាំងទាំងចំហរ និងសំងាត់ ប្រមាណជា ១ ៣០០០ នាក់ ដើម្បីការពារសន្តិសុខសណ្តាប់ធ្នាប់។ យ៉ាងណាក៏ដោយ ផ្អែកតាមរបាយការណ៍រយៈពេល៣ថ្ងៃនៃព្រះរាជពិធីបុណ្យអុំទូកឆ្នាំ២០១៨នេះ មានប្រជាពលរដ្ឋប្រមាណជា៤លាន៥សែននាក់ បានចូលរួមទស្សនា។ ចំនួននេះ គឺហួសពីការរំពឹងទុករបស់អាជ្ញាធរដែលមានត្រឹមតែ៣លាននាក់ប៉ុណ្ណោះ។ ដោយឡែកភ្ញៀវទេសចរបរទេសប្រមាណជាង ១ម៉ឺន២ពាន់នាក់ ក៏បានចូលរួមទស្សនាពិធីបុណ្យនេះដែរ។ តាមរយៈទំព័រហ្វេសបុករបស់ខ្លួន លោកនាយករដ្ឋមន្ត្រី ហ៊ុន សែន បានអរគុណដល់អាជ្ញាធរនិងកងកម្លាំងសមត្ថកិច្ចគ្រប់លំដាប់ថ្នាក់ ដែលបានចូលរួមការពារថែរក្សាសណ្តាប់ធ្នាប់សាធារណៈ ព្រមទាំងភ្នាក់ងារសុខាភិបាល ដែលបានផ្តល់នូវការមើលថែសុខភាព ជូនបងប្អូនប្រជាពលរដ្ឋ និងភ្ញៀវទេសចរជាតិ និងអន្តរជាតិបានសប្បាយរីករាយ នៅក្នុងឱកាសបុណ្យអុំទូក ដែលមានរយៈពេល៣ថ្ងៃមកនេះ។
គួរជំរាបជូនដែរថា ពិធីបុណ្យអុំទូកឆ្នាំ២០១៨នេះ មានទូកសរុប២៩៥ទូក និងកីឡាករជិតពីរម៉ឺននាក់ចូលរួម។ ក្នុងនោះ ទូកអុំផ្នែកបុរសមកពីខេត្តព្រះវិហារឈ្មោះ «កោះកែសែនជ័យបារមីព្រះអង្គខ្មៅ» ឧបត្ថម្ភដោយលោក ហ៊ីង ប៊ុនហៀង មេបញ្ជាការកងអង្គរក្សលោកនាយករដ្ឋមន្ត្រី ហ៊ុន សែន បានជាប់ចំណាត់ថ្នាក់លេខ១ ខណៈទូកឈ្មោះ «សារាយតេជោសែនជ័យ» មកពីខេត្តកណ្ដាល ឧបត្ថម្ភដោយលោកនាយករដ្ឋមន្ត្រី ហ៊ុន សែន ទទួលបានចំណាត់ថ្កាក់លេខ២ និង ទូកឈ្មោះ «សម្ដេចវិបុលបញ្ញាបារមីមានជ័យ» មកពីខេត្តតាកែវ ឧបត្ថម្ភដោយកូនប្រុសសពលោក សុខ អាន ទទួលបានចំណាត់ថ្នាក់លេខ៣ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ