ក្រុមតំណាងរាស្ត្របក្សប្រឆាំង ស្នើក្រុមប្រឹក្សាធម្មនុញ្ញពិនិត្យធម្មនុញ្ញភាពច្បាប់NGO
ក្រុមតំណាងរាស្ត្រគណបក្សសង្គ្រោះជាតិចំនួន១៣រូប បានធ្វើសំណើមួយទៅកាន់ក្រុមប្រឹក្សាធម្មនុញ្ញ ដោយស្នើឲ្យពិនិត្យធម្មនុញ្ញភាពនៃច្បាប់ស្តីពីសមាគម និង អង្គការក្រៅរដ្ឋាភិបាលដែលរដ្ឋសភាបានអនុម័តកាលពីពេលកន្លងមក។ សំណើនេះ ត្រូវបានលោកសុន ឆ័យ តំណាងរាស្ត្រមួយរូបក្នុងចំណោមនោះ បានយកទៅដាក់ផ្ទាល់នៅក្រុមប្រឹក្សាធម្មនុញ្ញនៅព្រឹកថ្ងៃព្រហស្បតិ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
លោកសុន ឆ័យ តំណាងរាស្ត្រគណបក្សសង្គ្រោះជាតិ បានថ្លែងប្រាប់អ្នកកាសែត ក្រោយពីដាក់សំណើនៅក្រុមប្រឹក្សាធម្មនុញថា ប្រសិនបើក្រុមប្រឹក្សាធម្មនុញពិនិត្យឃើញថា សេចក្តីស្នើច្បាប់នេះមិនស្របនឹងរដ្ឋធម្មនុញ្ញនៃព្រះរាជាណាចក្រកម្ពុជា និងផ្អាកមិនបញ្ជូនទៅកាន់រដ្ឋសភាវិញនោះ វាគឺជារឿងល្អសម្រាប់ប្រជាពលរដ្ឋ និងរដ្ឋាភិបាល។ រដ្ឋាភិបាល បើតាមលោកសុន ឆ័យ ក៏ចង់ឲ្យមានការចូលរួមកែលម្អសេចក្តីស្នើច្បាប់នេះពីសំណាក់គណបក្សសង្គ្រោះជាតិផងដែរ។ លោកសុន ឆ័យ បានបញ្ជាក់ថា នៅពេលនេះគណបក្សសង្គ្រោះជាតិបានរៀបចំសេចក្តីព្រាងច្បាប់មួយហើយ ដើម្បីត្រៀមកែលម្អលើសេចក្តីស្នើច្បាប់ដែលរដ្ឋសភាបានអនុម័តទាំងចម្រូងចម្រាសនេះ។
យ៉ាងណាក៏ដោយ នៅព្រឹកមិញ លោកសុន ឆ័យ មិនបានជួបផ្ទាល់ជាមួយប្រធានក្រុមប្រឹក្សាធម្មនុញ្ញនោះទេ ដោយសារប្រធានរូបនោះមានធុរចុះទៅខេត្ត ដោយលេខាជាអ្នកទទួលយកសំណើ។ ចំពោះការស្នើសុំនេះ លោកសុន ឆ័យ ហាក់មិនមានសង្ឃឹមថា នឹងមានការផ្អាកដំណើរការសេចក្តីស្នើច្បាប់នេះនោះទេ ប៉ុន្តែលោកគ្រាន់តែជឿជាក់ថា ក្រុមប្រឹក្សាធម្មនុញ្ញនឹងពិនិត្យធម្មនុញ្ញភាពនៃច្បាប់នេះដោយយកចិត្តទុកដាក់បំផុត មុនធ្វើការសម្រេចបែបណានោះ។
រដ្ឋសភាកម្ពុជា បានសម្រេចអនុម័តសេចក្តីព្រាងច្បាប់ស្តីពី សមាគម និងអង្គការមិនមែនរដ្ឋាភិបាល ដោយគ្មានវត្តមានតំណាងរាស្ត្រគណបក្សប្រឆាំងកាលពីថ្ងៃទី១៣ កក្កដា។ បន្ទាប់មក ព្រឹទ្ធសភាកម្ពុជា ក៏បានសម្រេចគាំទ្រសេចក្តីព្រាងច្បាប់នេះ ដោយគ្មានការចូលរួមប្រជុំពីសំណាក់ព្រឹទ្ធសមាជិកខាងគណបក្សប្រឆាំងដូចគ្នាផងដែរ។
នៅក្នុងសំណើកម្រាស់១២ទំព័រដែលដាក់ជូនទៅកាន់ក្រុមប្រឹក្សាធម្មនុញ ក្រុមតំណាងរាស្ត្រគណបក្សសង្គ្រោះជាតិ បានកត់សម្គាល់ថា សេចក្តីស្នើច្បាប់ស្តីពីសមាគម និងអង្គការមិនមែនរដ្ឋាភិបាល មានការរឹតត្បិតយ៉ាងធ្ងន់ធ្ងរលើសិទ្ធិបង្កើតសមាគម និងសិទ្ធិពាក់ព័ន្ធសំខាន់ៗមួយចំនួនរបស់ប្រជាពលរដ្ឋខ្មែរដែលទទួលស្គាល់ និង មានចែងក្នុងរដ្ឋធម្មនុញ្ញ។ ការរឹត្បិតយ៉ាងធ្ងន់ធ្ងរនេះ នឹងធ្វើឲ្យប្រជាពលរដ្ឋខ្មែរមានការលំបាកជាខ្លាំងក្នុងការប្រើប្រាស់សិទ្ធិដែលធានាដោយរដ្ឋធម្មនុញរបស់ពួកគេ។
លោកឈាន វុន អ្នកនាំពាក្យរដ្ឋសភា បានបញ្ជាក់ថា រដ្ឋសភាបានបញ្ជូនសេចក្តីស្នើច្បាប់នេះទៅកាន់ក្រុមប្រឹក្សាធម្មនុញ្ញ ដើម្បីពិនិត្យធម្មនុញ្ញភាពរួចហើយ មុនបញ្ជូនថ្វាយទៅកាន់ព្រះមហាក្សត្រ ដើម្បីឡាយព្រហត្ថ ប្រកាសឲ្យប្រើជាផ្លូវការ។ ដោយឡែក ក្រុមប្រឹក្សាធម្មនុញ្ញ នៅព្រឹកនៅថ្ងៃព្រហស្បតិ័នេះ មិនអាចទាក់ទងសុំការបញ្ជាក់ពីដំណើរការពិនិត្យធម្មនុញ្ញភាពនៃសេចក្តីស្នើច្បាប់នេះបាននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ