តំណាងរាស្ត្រសង្រ្គោះជាតិ៖ ការលើកលែងទោស សួន សេរីរដ្ឋា ជារឿងផលប្រយោជន៍នយោបាយ
លោក អ៊ុំ សំអាន អ្នកតំណាងរាស្ត្រគណបក្សសង្រ្គោះជាតិ ចាត់ទុកការលើកលែងទោស លោក សួន សេរីរដ្ឋា តាមរយៈការស្នើទៅកាន់ព្រះមហាក្សត្រ គឺជារឿងផលប្រយោជន៍នយោបាយ។ ដោយសារលោក សួន សេរីរដ្ឋាមានគណបក្សនយោបាយថ្មីមួយ ដែលអាចបំបែកសម្លេងអ្នកគាំទ្រគណបក្សប្រឆាំងបច្ចុប្បន្ន។ លោក ជិន ម៉ាលីន អ្នកនាំពាក្យក្រសួងយុត្តិធម៌ក៏បានបញ្ជាក់ថា ការលើកលែងទោសនេះ គឺដើម្បីឲ្យលោកមាន សិទ្ធិ បង្កើតគណបក្សនយោបាយ។
ចុះផ្សាយនៅថ្ងៃ៖
ស្តាប់ - ០១:៥៤
ការលើកលែងទោសនេះ គឺជាការរឿងនយោបាយ ដើម្បីឲ្យលោក សួន សេរីរដ្ឋា ចូលមកប្រទេសកម្ពុជាបង្កើតគណបក្សនយោបាយមួយ ក្នុងគោលបំណងទាញយកសម្លេងអ្នកគាំទ្ររបស់គណបក្សសង្រ្គោះជាតិ។ នេះបើតាមការបញ្ជាក់របស់ លោក អ៊ុំ សំអាន តំណាងរាស្ត្រគណបក្សសង្រ្គោះជាតិខេត្តសៀមរាប។
លោកបានបន្ថែមថា ការទាញយកសម្លេងពីគណបក្សសង្រ្គោះជាតិនេះគឺ ដោយសារតែ កាលពីពេលកន្លងមក លោក សួន សេរីរដ្ឋា ធ្លាប់ជាមនុស្សម្នាក់ ដែលបាន រិះគន់រដ្ឋាភិបាលបច្ចុប្បន្ន។ ទោះជាយ៉ាងណាក៏ដោយ ការប៉ុនប៉ងបំបែកសម្លេងពីគណបក្សសង្រ្គោះជាតិ មិនអាចទៅរួចទេ ដោយសារតែប្រជាប្រិយភាពរបស់លោកនៅទាប។ ការលើកលែងទោសនេះ ត្រូវបានលោកយល់ថា ជារឿងចម្លែងមួយ ដោយសារតែលោក សួន សេរីរដ្ឋា ទើបតែត្រូវបានតុលាការដាក់ទោសនាពេលថ្មីៗនេះ ហើយត្រូវបានលើកលែងទោសភ្លាមៗ។
សូមបញ្ជាក់ថាលោក សួន សេរីរដ្ឋា ត្រូវបានតុលាការសម្រេចផ្តន្ទាទោសដាក់ពន្ធនាគារ រយៈពេល៧ឆ្នាំ និងដាក់ពិន័យជាប្រាក់ប្រមាណ ២៥លានរៀល តាមសាលដីកាស្ថាពរ កាលពីថ្ងៃទី២៨ ខែឧសភា ឆ្នាំ២០១៥។ តុលាការបានចោទប្រកាន់ ប្រធានគណបក្សចលនាអំណាចពលរដ្ឋខ្មែររូបនេះ ថាពាក់ព័ន្ធពីបទរួមគំនិតក្បត់ជាតិ រួមទាំងបក្សពួករបស់លោកមួយចំនួនផងដែរ។ ហើយលោកត្រូវបាន ព្រះមហាក្សត្រាស់បង្គាប់លើកលែងទោស កាលពីថ្ងៃទី១០ ខែកក្កដា ម្សិលមិញ។
លោក ជិន ម៉ាលីន អ្នកនាំពាក្យក្រសួងយុតិ្តធម៌ បានបញ្ជាក់ថា ការលើកលែងទោស លោក សួន សេរីរដ្ឋា ជាករណីពិសេស ដើម្បីឲ្យលោកអាចបង្កើតគណបក្សនយោបាយមួយ ក្នុងគោលបំណងប្រកួតប្រជែងស្មើមុខគ្នា ជៀសវាងការបង្កើតចលនាផ្តួលរំលំរដ្ឋាភិបាល។ ហើយការលើកលែងទោសនេះ ក៏ដោយសារតែមានការស្នើសុំពីលោក សួន សេរីរដ្ឋា និងការសម្រុះសម្រួលដោយរាជរដ្ឋាភិបាលកម្ពុជា។
ចំពោះការលើកលែងទោសភ្លាមៗ ខុសពីករណីផ្សេងទៀត ដែលតម្រូវឲ្យអ្នកជាប់ទោសត្រូវទទួលទោស២ភាគ៣នៃទម្ងាន់ទោសនោះ លោក ជិន ម៉ាលីន បានបន្ថែមថា គឺដោយសារតែច្បាប់ពន្ធនាគារ ក៏មានសិទ្ធិពិសេសសម្រាប់នាយករដ្ឋមន្ត្រី សុំទៅកាន់ព្រះមហាក្សត្រឲ្យមានការលើកលែងទោសចំពោះទណ្ឌិតណាមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ