លោកស័ក្តិ៤ដែលប្រើអំពើហិង្សាលើប៉ូលីសចរាចរណ៍ អាចប្រឈមនឹងការជាប់ពន្ធនាគារពី២ទៅ៥ឆ្នាំ
នៅព្រឹកនេះ ព្រះរាជអាជ្ញារងតុលាការក្រុងភ្នំពេញបានបញ្ចប់ការសួរចម្លើយនគរបាលស័ក្តិ៤ម្នាក់ដែលប្រើប្រាស់អំពើហិង្សាលើមន្ដ្រីចរាចរណ៍របស់សាលារាជធានីភ្នំពេញ។ ក្រោយបញ្ចប់ការសាកសួរ លោកព្រះរាជអាជ្ញារងបានសម្រេចចោទប្រកាន់២បទល្មើសគឺ «ហិង្សាដោយចេតនាមានស្ថានទម្ងន់ទោស និងប្រើប្រាស់ដោយគ្មានសិទ្ធិនូវសញ្ញាសម្គាល់ដែលកំណត់ដោយអាជ្ញាធរសាធារណៈ» ដែលអាចជាប់ពន្ធនាគារពី២ទៅ៥ឆ្នាំ។ នៅពេលនេះ សំណុំរឿងនេះកំពុងស្ថិតក្នុងដៃចៅក្រមស៊ើបសួរ ដើម្បីសម្រេចថាត្រូវឃុំខ្លួនឫមិនឃុំខ្លួនបណ្តោះអាសន្ន។
ចុះផ្សាយនៅថ្ងៃ៖
ស្តាប់ - ០២:១២
បទល្មើស «ហិង្សាដោយចេតនាមានស្ថានទម្ងន់ទោស និងប្រើប្រាស់ដោយគ្មានសិទ្ធិនូវសញ្ញាសម្គាល់ដែលកំណត់ ដោយអាជ្ញាធរសាធារណៈ» គឺធ្វើឡើងតាមបញ្ញត្តិមាត្រា២១៨ និងមាត្រា៦១៤ នៃក្រមព្រហ្មទណ្ឌកម្ពុជា។ បើតាមមាត្រា២១៨ ជនសង្ស័យនឹងត្រូវប្រឈមជាប់ពន្ធនាគារពី២ឆ្នាំទៅ៥ឆ្នាំ និងពិន័យជាប្រាក់ពី៤លានរៀល ទៅ១០លានរៀល ។ ចំណែកមាត្រា៦១៤វិញ ជនសង្ស័យត្រូវប្រឈមជាប់ពន្ធនាគារពី១ខែ ទៅ១ឆ្នាំនិង ពិន័យជាប្រាក់ពី ១០ម៉ឺនរៀល ទៅ២លានរៀល។
ជនសង្ស័យដែលប្រើប្រាស់អំពើហិង្សាលើប៉ូលីសចរាចរណ៍នេះ មានឈ្មោះថាសៅ បញ្ញា អាយុ៣៣ឆ្នាំ បម្រើការងារនៅការិយាល័យរដ្ឋបាលសរុបនៃនាយកដ្ឋានប្រឆាំងបទល្មើសបច្ចេកវិទ្យារបស់អគ្គស្នងការដ្ឋាននគរបាលជាតិ។ ជនសង្ស័យរូបនេះ ត្រូវបានអាជ្ញាធរឃាត់ខ្លួន ក្រោយពីមានការបែកធ្លាយវីដេអូមួយកាលពីដើមសប្តាហ៍នេះ ដោយបង្ហាញថារូបគេបានចាប់អូសកអាវប៉ូលីសចរាចរណ៍ម្នាក់នៅស្ដុបត្រឡោកបែក ព្រមទាំងវាយ និងធាក់មួយជើងចំដើមទ្រូងផង នៅខណៈដែលប៉ូលីសចរាចរណ៍នោះលត់ជង្គង់លើកដៃគោរពសុំអភ័យទោសក៏ដោយ។ បើតាមជនរងគ្រោះ អំពើហិង្សានេះបានកើតឡើងមួយថ្ងៃ ក្រោយពីរូបគេបានឃាត់រថយន្តរបស់ជនសង្ស័យ ដើម្បីសួរនាំរឿងជិះបំពានភ្លើងសញ្ញាចរាចរណ៍។
ជាការកត់សម្គាល់ រឿងនេះគឺជាករណីធ្វើឲ្យមជ្ឈដ្ឋានទូទៅមានការភ្ញាក់ផ្អើលដ៏កក្រើកមួយទៀតនៅដើមឆ្នាំថ្មី២០១៨នេះ បន្ទាប់ពីរឿងចែកអំណោយជាក្តារមឈូសដល់មនុស្សចាស់ជរាក្រីក្រនៅក្នុងខេត្តកំពង់ធំរបស់ក្រុមហ៊ុនទឹកសុទ្ធវីតាល់។ ប៉ុន្តែករណីហិង្សាលើប៉ូលីសចរាចរណ៍នេះ ត្រូវបានចាត់ការតាមផ្លូវតុលាការភ្លាមៗក្រោយពីកើតរឿងហេតុ។ គេក៏មិនភ្លេចផងដែរ កាលចុងឆ្នាំ២០១៧ ក៏មានរឿងដ៏ភ្ញាក់ផ្អើលមួយបានកើតឡើងដែរ នោះគឺការបង្រ្កាបទីកន្លែងជល់មាន់ទ្រង់ទ្រាយធំនៅក្នុងខេត្តកណ្តាល និងខេត្តតាកែវ។ រឿងនេះក៏ត្រូវបានចាត់ការទៅតាមផ្លូវតុលាការផងដែរ។
យ៉ាងណាក៏ដោយ កាលពីអំឡុងឆ្នាំ២០១៧ កន្លងទៅនេះ ក៏មានករណីបំពានច្បាប់យ៉ាងអាណាធិបតេយ្យពីសំណាក់កូនមន្រ្តីគ្រាក់ៗ និងក្រុមក្មេងស្ទាវមួយចំនួនបានកើតឡើង។ ប៉ុន្តែករណីខ្លះក៏ត្រូវបានចាត់ការតាមផ្លួវតុលាការ រីឯករណីខ្លះទៀតក៏ហាក់ដូចជាស្ងប់ស្ងាត់មិនដឹងដំណឹងក៏មានដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ