ទីភ្នាក់ងារទេសចរណ៍កម្ពុជា៖ ភេរវកម្ម វិបត្តិសេដ្ឋកិច្ច ជាបញ្ហាប្រឈមរបស់វិស័យទេសចរណ៍កម្ពុជា
វិស័យទេសចរណ៍កម្ពុជានៅតែប្រឈមនឹងបញ្ហាមួយចំនួនដូចជាអំពើភេរវកម្មរបស់ពិភពលោក វិបត្តិសេដ្ឋកិច្ចរបស់តំបន់មួយចំនួនក្នុងពិភពលោក និងកង្វះជើងហោះហើរត្រង់មកកម្ពុជា។ នេះបើតាមសមាគមទីភ្នាក់ងារទេសចរណ៍កម្ពុជា។ កត្តាទាំងអស់នេះនឹងប៉ះពាល់ដល់ចំនួនអ្នកទេសចរមកកម្ពុជា ខណៈដែលកម្ពុជាត្រូវបានគេចាត់ទុកថាជាគោលដៅទេសចរណ៍ល្អបំផុតក្នុងឆ្នាំ២០១៦។
ចុះផ្សាយនៅថ្ងៃ៖
ស្តាប់ - ០២:១៧
ប្រធានសមាគមទីភ្នាក់ងារទេសចរណ៍កម្ពុជានៅថ្ងៃទី១៨ ខែមិថុនា នេះបានបញ្ជាក់ប្រាប់វិទ្យុបារាំងអន្តរជាតិថា វិស័យទេសចរណ៍កម្ពុជាកំពុងតែប្រឈមនឹងបញ្ហារបស់ពិភពលោកមួយចំនួន ដែលបញ្ហាខាងលើនេះនឹងធ្វើឲ្យកំណើនភ្ញៀវទេសចរមានការថយចុះ បើគ្មានយន្តការដោះស្រាយណាមួយពីក្រសួងពាក់ព័ន្ធ។
លោកអាង គឹមអៀង ប្រធានសមាគមទីភ្នាក់ងារទេសចរណ៍កម្ពុជា បានបន្ថែមថាបញ្ហាភេរវកម្ម ដែលកំពុងតែកើតឡើងលើពិភពលោកអាចនឹងធ្វើឲ្យមនុស្សពិចារណាក្នុងការធ្វើដំណើរកម្សាន្តផ្លូវឆ្ងាយ ហើយថ្មីៗនេះកត្តាសុវត្ថិភាពតាមផ្លូវអាកាសក៏ជាបញ្ហាប្រឈមថ្មីផងដែរ ខណៈមានយន្តហោះបានធ្លាក់បន្តជាញឹកញាប់។
វិទ្យុបារាំងអន្តរជាតិនៅព្រឹកថ្ងៃទី១៨ ខែមិថុនានេះ មិនអាចសុំការបំភ្លឺពីក្រសួងទេសចរណ៍បានទេ ជុំវិញបញ្ហាប្រឈមថ្មីៗ របស់វិស័យទេសចរណ៍ក្នុងប្រទេសកម្ពុជា។
គួររំលឹកជូនថាក្នុងសប្តាហ៍នេះ ក្រុមប្រឹក្សាទេសចរណ៍ និងពាណិជ្ជកម្មអឺរ៉ុប (ECTT) បានដាក់ប្រទេសកម្ពុជាគឺជាគោលដៅទេសចរណ៍ដ៏ល្អបំផុតសម្រាប់ឆ្នាំ២០១៦។ នាយកក្រុមប្រឹក្សាទេសចរណ៍ និងពាណិជ្ជកម្មអឺរ៉ុបបានបញ្ជាក់ថាកម្ពុជាជាកន្លែង ដែលមានសុវត្ថិភាពបំផុត និងជាគោលដៅសម្រាប់បេះដូងអ្នកទេសចរ។ នេះបើតាមការចុះផ្សាយរបស់សារព័ត៌មានបរទេសកាលពីថ្ងៃទី១៦ មិថុនា។
បើទោះបីជាមានបញ្ហាប្រឈមក្តី តែភ្ញៀវទេសចរបរទេសបានកើនឡើងប្រមាណ២,៥ភាគក្នុងរយៈពេល៤ខែនៃឆ្នាំ២០១៦ ដែលធ្វើឲ្យចំនួនភ្ញៀវទេសចរបានកើនឡើងដល់ប្រមាណ១,៧លាននាក់ ខណៈកាលពីឆ្នាំ២០១៥កន្លងទៅមានភ្ញៀវទេសចរត្រឹមតែ១,៦លាននាក់តែប៉ុណ្ណោះ ប្រៀបធៀបក្នុងរយៈពេលដូចគ្នា។ នេះបើតាមរបាយការណ៍ ដែលបានចេញផ្សាយដោយក្រសួងទេសចរណ៍កាលពីថ្ងៃទី៧ ខែមិថុនា និងត្រូវបានចុះផ្សាយដោយសារព័ត៌មានបរទេស។
របាយការណ៍ខាងលើបានបង្ហាញថាភ្ញៀវទេសចរ ដែលមកកម្សាន្តក្នុងប្រទេសកម្ពុជាច្រើនជាងគេនោះ គឺជាភ្ញៀវក្នុងតំបន់អាស៊ី ដែលមានដូចជាជនជាតិវៀតណាម ជនជាតិចិន ជនជាតិកូរ៉េខាងត្បូង និងជនជាតិថៃ។ តែយ៉ាងណាមិញ របាយការណ៍នេះបានឲ្យដឹងថាចំនួនជនជាតិវៀតណាមមកកម្សាន្តនៅកម្ពុជាបានថយចុះ៣ភាគរយ ក្នុងរយៈពេល៤ខែ ពីខែមករា ដល់ខែមេសា ប្រៀបធៀបនឹងរយៈពេលដូចគ្នាកាលពីឆ្នាំ២០១៥។ ចំណែកភ្ញៀវទេសចរជនជាតិចិន ដែលមកដល់ប្រទេសកម្ពុជា គឺមានការកើនឡើងប្រមាណ១៣ភាគរយ ក្នុងរយៈពេល៤ខែ ពីខែមករា ដល់ខែមេសា ប្រៀបធៀបរយៈពេលដូចគ្នាកាលពីឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ