រដ្ឋមន្រ្តីក្រសួងកសិកម្ម ស្នើឱ្យអភិបាលខេត្តជាប់សមុទ្រ ពង្រឹងការថែរក្សា និងគ្រប់គ្រងព្រៃកោងកាង
រដ្ឋមន្រ្តីក្រសួងកសិកម្ម លោក វេង សាខុន បានជម្រុញអភិបាលខេត្តជាប់សមុទ្រ មានវិធានការគ្រប់គ្រង ថែរក្សា និងការពារព្រៃកោងកាងនៅក្នុងភូមិសាស្ត្ររបស់ខ្លួន ខណៈសកម្មភាពឈូសឆាយ និងចាក់ដីលុបហ៊ុមព័ទ្ធយកដីព្រៃកោងកាងធ្វើជាកម្មសិទ្ធិ បាននិងកំពុងកើតមានឡើងជាបន្តបន្ទាប់។ នេះបើតាមលិខិតចុះពីថ្ងៃទី១៩ ខែវិច្ឆិកា ឆ្នាំ២០១៨ របស់រដ្ឋមន្រ្តីក្រសួងកសិកម្ម ផ្ញើទៅកាន់អភិបាលខេត្តកែប កំពត ព្រះសីហនុ និងកោះកុង។
ចុះផ្សាយនៅថ្ងៃ៖
ស្តាប់ - ០២:១៥
រដ្ឋមន្រ្តីក្រសួងកសិកម្ម អះអាងថា សកម្មភាពនៃការឈូសឆាយ ការកាប់ទន្រ្ទាន ការចាក់ដីលុប ការរានយកដីធ្វើលំនៅដ្ឋាន ការហ៊ុមព័ទ្ធដីព្រៃកោងកាងទុកជាកម្មសិទ្ធ និងការចេញប័ណ្ណកម្មសិទ្ធិកាន់កាប់ បាននិងកំពុងកើតមានឡើងវិញជាបន្ទបន្ទាប់ នៅក្នុងភូមិសាស្រ្តខេត្តកែប កំពត ព្រះសីហនុ និងកោះកុង។
ក្នុងលិខិតចុះពីថ្ងៃទី១៩ ខែវិច្ឆិកា ឆ្នាំ២០១៨ ផ្ញើទៅកាន់អភិបាលខេត្តកែប កំពត ព្រះសីហនុ និងកោះកុង រដ្ឋមន្រ្តីក្រសួងកសិកម្ម លោក វេង សាខុន បានស្នើទៅអភិបាលខេត្តទាំងបួន ឱ្យយកចិត្តទុកដាក់គ្រប់គ្រង ថែរក្សា និងការពារព្រៃកោងកាង ដែលស្ថិតក្នុងដែនសមត្ថកិច្ចខេត្តនីមួយៗ ក្នុងនាមជាអាជ្ញាធរគ្រប់គ្រងដីរដ្ឋ។
បើតាមខ្លឹមសារនៃលិខិត ផ្ញើទៅកាន់អភិបាលខេត្តតំបន់មាត់សមុទ្រទាំង៤ ដដែល រដ្ឋមន្ត្រីកសិកម្ម ក៏បានលើកឡើងពីភាពមិនប្រក្រតីមួយចំនួនដែលកើតឡើងវិញគួរឱ្យកត់សម្គាល់ ក្នុងនោះការចេញប័ណ្ណកម្មសិទ្ធិកាន់កាប់ដីព្រៃកោងកាងក្នុងកន្លែងសហគមន៍នេសាទជាច្រើនកន្លែង ជាពិសេសក្នុងភូមិសាស្រ្តខេត្តព្រះសីហនុ។
លោករដ្ឋមន្រ្តី បានរំលឹកប្រាប់អភិបាលខេត្តទាំង៤ថា ដោយយោងតាមច្បាប់ស្ដីពីជលផល ព្រៃលិចទឹក និងព្រៃកោងកាងមានតួនាទីយ៉ាងសំខាន់ក្នុងវិស័យជលផល ដូចនេះការឈូសឆាយ ការកាប់ទន្ទ្រាន ការចាក់ដីលុប ការរានយកដីធ្វើលំនៅឋាន ការហ៊ុមព័ទ្ធដីព្រៃកោងកាងទុកជាកម្មសិទ្ធិ នៅក្នុងដែននេសាទត្រូវបានហាមឃាត់។
សូមរំឮកជូនដែរថា ប្រមុខរដ្ឋាភិបាលកម្ពុជា លោក ហ៊ុន សែន កាលពីឆ្នាំ២០១៦ បានចេញបទបញ្ជាឲ្យរដ្ឋមន្ត្រីក្រសួងរៀបចំដែនដី និងក្រសួងកសិកម្ម ពិនិត្យឈានដល់និរាករណ៍ ឬលុបប័ណ្ណកម្មសិទ្ធិ និងឯកសារបញ្ជាក់កម្មសិទ្ធិដីធ្លីផ្សេងទៀត ដែលមានការពាក់ព័ន្ធដីព្រៃកោងកាងនៅតាមខេត្តជាប់ឆ្នេរសមុទ្រចំនួន៤។
ប្រធានអង្គការស្រាវជ្រាវជាតិកម្ពុជា (CNRO) លោក សុខ សុខុម បានលើកឡើងថា ការកាប់ទន្ទ្រានព្រៃកោងកាង ដែលជាធនធានធម្មជាតិនៅតាមតំបន់ឆ្នេរសមុទ្រ កំពុងតែកើតមានឡើង ក្នុងនោះ ការកាប់ទន្ទ្រានយកដីព្រៃនេះនៅក្នុងខេត្ដកោះកុង គឺជារឿងដ៏ស្មុគស្មាញ ជាពិសេសនៅតំបន់អណ្ដូងទឹក និងតំបន់ជ្រោយស្វាយជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ