ដោះស្រាយបញ្ហាព្រំដែននិងអន្តោប្រវេសន៍វៀតណាម ធ្វើឲ្យបក្សកាន់អំណាចខាតឬទេ?
ចុះផ្សាយនៅថ្ងៃ៖
ស្តាប់ - ០៥:២៦
ថ្មីៗនេះ រដ្ឋាភិបាលកម្ពុជាដឹកនាំដោយគណបក្សប្រជាជន បានចាត់វិធានការមួយចំនួន ដើម្បីដោះស្រាយបញ្ហាជនអន្តោប្រវេសន៍ខុសច្បាប់ និងបញ្ហាព្រំដែននៅកម្ពុជា។ ជាក់ស្ដែង កាលពីម្សិលមិញនេះ ជនជាតិចិននិងវៀតណាមជាង២០០នាក់ ដែលមកធ្វើការខុសច្បាប់នៅតំបន់កោះពេជ្រ ត្រូវបានសមត្ថកិច្ចឃាត់ខ្លួន។ ហើយកាលពីសប្ដាហ៍មុន ក្រសួងការបរទេសខ្មែរបានផ្ញើកំណត់ទូតទៅតវ៉ាចំពោះការឈ្លានពានបូរណភាពទឹកដីខ្មែរ ពីសំណាក់ប្រទេសវៀតណាមផងដែរ។ តើចំណាត់ការលើបញ្ហាព្រំដែននិងអន្តោប្រវេសន៍វៀតណាមយ៉ាងដូច្នេះ ចំណេញឬខាតសម្រាប់រដ្ឋាភិបាលគណបក្សកាន់អំណាច?
មួយរយៈចុងក្រោយនេះ បញ្ហាជនអន្តោប្រវេសន៍ខុសច្បាប់និងរឿងព្រំដែន កំពុងតែពុះកញ្ជ្រោលឡើងវិញនៅកម្ពុជា។ នៅចំពោះមុខសភាពការណ៍នេះ រដ្ឋាភិបាលដឹកនាំដោយបក្សប្រជាជនកម្ពុជា បានបង្ហាញសាច់ដុំរបស់ខ្លួនជាបន្តបន្ទាប់។ ជាបឋមនិយាយពីបញ្ហាជនអន្តោប្រវេសន៍ខុសច្បាប់។ មួយឆ្នាំចុងក្រោយនេះ ការឃាត់ខ្លួនជនអន្តោប្រវេសន៍វៀតណាមដែលចូលមករស់នៅខុសច្បាប់នៅកម្ពុជា បានកើនឡើងគួរឲ្យកត់សម្គាល់។ នៅលើទំព័រកាសែតនិងគេហទំព័រព័ត៌មានអត្ថបទ ស្ដីពីការរកឃើញជនជាតិវៀតណាមដែលមករកស៊ីធ្វើការខុសច្បាប់នៅកម្ពុជា ត្រូវគេចុះផ្សាយជារៀងរាល់ថ្ងៃ។ ជនអន្តោប្រវេសន៍ខុសច្បាប់ទាំងនោះ ក្រោយពីឃាត់ខ្លួនហើយ ក៏ត្រូវបានបញ្ជូនចេញពីកម្ពុជាទៅកាន់ប្រទេសកំណើតវិញជាហូរហែរ។
យុទ្ធនាការបង្ក្រាបជនបរទេស ជាពិសេសជនជាតិវៀតណាមដែលរស់នៅក្នុងប្រទេសកម្ពុជាដោយខុសច្បាប់ ធ្វើឡើងនៅទូទាំងប្រទេសតាមបែបផែនខុសៗគ្នា។ ជាក់ស្ដែង កាលពីម្សិលមិញនេះ សមត្ថកិច្ចអន្តោប្រវេសន៍បានបើកយុទ្ធនាការឆែកឆេរ ហើយបានរកឃើញជនជាតិចិននិងវៀតណាមជាង២០០នាក់ ដែលចូលមកធ្វើការនៅតំបន់កោះពេជ្រដោយខុសច្បាប់។ ជនបរទេសខុសច្បាប់ទាំងនោះ ត្រូវសមត្ថកិច្ចឃាត់ខ្លួនយកទៅសួរនាំនៅអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ។ ចំណែកនៅខេត្តកណ្ដាលវិញ អាជ្ញាធរបានសម្រេចបណ្ដេញជនជាតិវៀតណាមដែលរស់នៅខុសច្បាប់នៅតំបន់កំពង់ចម្លងអរិយក្សត្រ ឲ្យចាកចេញដោយគ្មានលក្ខខណ្ឌផងដែរ។
ដោយឡែក ចំពោះបញ្ហាព្រំដែនកម្ពុជាវៀតណាម។ បញ្ហានេះនៅតែជាក្ដីកង្វល់នៅឡើងសម្រាប់ប្រជាពលរដ្ឋទូទៅ។ ចុងក្រោយនេះ រដ្ឋាភិបាលដឹកនាំដោយបក្សប្រជាជនកម្ពុជា បានចាត់វិធនាការគួរឲ្យកត់សម្គាល់មួយចំនួននៅក្នុងរឿងព្រំដែនជាមួយប្រទេសវៀតណាម ។ ក្នុងនោះ កម្ពុជាបានធ្វើការតវ៉ាផ្ទាល់មាត់ និងជាលាយលក្ខណ៍អក្សរទៅកាន់ប្រទេសវៀតណាម ដែលបានរំលោភចូលដែនអធិបតេយ្យកម្ពុជា នៅខេត្តរតនគិរីនិងខេត្តកណ្ដាល។
ចំណាត់ការរបស់រដ្ឋាភិបាលចំពោះបញ្ហាជនអន្តោប្រវេសន៍ និងបញ្ហាព្រំដែន ជាពិសេសជាមួយប្រទេសវៀតណាមនាពេលថ្មីៗនេះ បើទោះបីជាមិនទាន់គ្រប់គ្រាន់ក៏ដោយ ក៏ការអបអរសាទរនៅតែមានជាហូរហែរ។ ប៉ុន្តែយ៉ាងណាក៏ដោយ នៅចំពោះមុខបរិបទបែបនេះ មតិមួយចំនួនបែរជាលើកឡើងថា បក្សកាន់អំណាចអាចប្រឈមនឹងការខាតបង់ដ៏ធ្ងន់ធ្ងរ ជាពិសេសនៅក្នុងការបោះឆ្នោតនាពេលខាងមុខ។
ហេតុអ្វីការដោះស្រាយបញ្ហាជនអន្តោប្រវេសន៍ខុសច្បាប់និងបញ្ហាព្រំដែនធ្វើឲ្យបក្សកាន់អំណាចខាតបង់?
កន្លងមក បក្សប្រឆាំងតែងតែចោទប្រកាន់ថា ជនអន្តោប្រវេសន៍ខុសច្បាប់ជាពិសេសជនអន្តោប្រវេសន៍វៀតណាម មានចំនួនយ៉ាងច្រើននៅក្នុងប្រទេសកម្ពុជា។ បើតាមបក្សប្រឆាំង គឺជនបរទេសខុសច្បាប់វៀតណាមដែលមានដល់ទៅជាងកន្លះលាននាក់នេះហើយ ដែលជួយឲ្យបក្សប្រជាជនឈ្នះការបោះឆ្នោតជាបន្តបន្ទាប់នៅកម្ពុជា។ ប្រសិនបើការចោទប្រកាន់របស់បក្សប្រឆាំងជារឿងពិត ចំណាត់ការរបស់រដ្ឋាភិបាលដែលកំពុងតែបណ្ដេញជនអន្តោប្រវេសន៍ខុសច្បាប់វៀតណាមចេញពីកម្ពុជាជាបន្តបន្ទាប់នេះ ច្បាស់ណាស់ថានឹងធ្វើឲ្យបក្សកាន់អំណាចខាតបង់។
ផ្ទុយទៅវិញ ប្រសិនបើការចោទប្រកាន់របស់បក្សប្រឆាំងជារឿងមិនពិត នោះការដោះស្រាយបញ្ហាព្រំដែននិងបញ្ហាជនអន្តោប្រវេសន៍ខុសច្បាប់ ច្រើនឬតិច គឺច្បាស់ណាស់ថា នឹងធ្វើឲ្យរដ្ឋាភិបាលទទួលបានផលចំណេញខាងនយោបាយ។ ចំណេញព្រោះពលរដ្ឋខ្មែរ ជាពិសេសយុវជន មានក្ដីបារម្ភខ្លាំងចំពោះបញ្ហាដ៏រសើបទាំងពីរនេះ។ ការដោះស្រាយឲ្យចេញជាលទ្ធផលដុំកំភួន អាចនឹងជួយបង្កើនប្រជាប្រិយភាពរបស់បក្សប្រជាជនកម្ពុជា សម្រាប់ការបោះឆ្នោតនាពេលខាងមុខផងក៏ថាបាន។
វាមិនមែនជារឿងប្លែកទេ ដែលបក្សនយោបាយនៅកម្ពុជា ឆ្លៀតឱកាសយកផលចំណេញពីបញ្ហាព្រំដែននិងបញ្ហាជនអន្តោប្រវេសន៍ខុសច្បាប់វៀតណាម។ ក៏ប៉ុន្តែ អ្វីដែលសំខាន់ចំពោះមុខ គឺឆន្ទៈ ពិតប្រាកដក្នុងការការពារបូរណភាពទឹកដីនិងវិធានការទប់ស្កាត់ការហូរចូលជនបរទេសខុសច្បាប់មកក្នុងប្រទេសកម្ពុជា។ ការយកបញ្ហាជាតិមកដោះដូរជាមួយប្រជាប្រិយភាព គឺជារឿងដែលមិនអាចទទួលយកបានជាដាច់ខាត។
ក្នុងន័យនេះ បក្សនយោបាយនៅកម្ពុជា ទាំងបក្សកាន់អំណាច និងបក្សប្រឆាំង ត្រូវតែត្រួតពិនិត្យមើលខ្លួនឯងឡើងវិញ។ ដាច់ខាតមិនត្រូវយកបញ្ហាព្រំដែន និងបញ្ហាជនបរទេសខុសច្បាប់ មកធ្វើជាចំណាប់ខ្មាំងដើម្បីប្រជាប្រិយភាពនិងផលប្រយោជន៍ផ្ទាល់ខ្លួននោះឡើយ។ ទោះចំណេញឬខាតសម្រាប់បក្សខ្លួនក៏ដោយ ក៏បញ្ហាដ៏រសើបទាំងពីរនេះ ចាំបាច់ត្រូវតែដោះស្រាយឲ្យដាច់ស្រលះ ដើម្បីជាតិខ្មែរទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ