កម្ពុជានិងវៀតណាមប្រជុំដោះស្រាយបញ្ហាព្រំដែននៅដើមសប្តាហ៍ក្រោយ
ក្រោយអំពើហិង្សាបានផ្ទុះឡើងនៅព្រំដែនរវាងកម្ពុជា និងប្រទេសវៀតណាម និងការមិនឯកភាពគ្នាលើតំបន់ព្រំដែនមួយចំនួន ភាគីកម្ពុជានិងវៀតណាមបានសម្រេចជួបប្រជុំគ្នានៅដើមសប្តាហ៍ នៅខេត្តសៀមរាប។ កិច្ចប្រជុំនេះ ធ្វើឡើងបន្ទាប់ពីប្រទេសវៀណាមរិះគន់យ៉ាងខ្លាំងលើអំពើហិង្សារវាងកម្ពុជានិងវៀតណាមនៅព្រំដែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
អំពើហិង្សានៅព្រំដែនពេលថ្មីៗ និងការមិនចុះសម្រុងគ្នានៅព្រំដែនដែលនៅសេសសល់ជាមួយវៀតណាម គឺជារបៀបវារៈសំខាន់ពីរនៅក្នុងកិច្ចប្រជុំរវាងកម្ពុជា និងវៀតណាមជាលើកដំបូងក្រោយការផ្ទុះអំពើហិង្សា។ កិច្ចប្រជុំដែលធ្វើឡើងនៅខេត្តសៀមរាបនៅថ្ងៃចន្ទ ទី៦ កក្កដា គឺជាកិច្ចប្រជុំបន្ទាប់ពីបញ្ហាព្រំដែនរវាងប្រទេសទាំងពីរ បានកើនឡើងកំដៅខ្លាំងដែលមិនធ្លាប់មាន។ កំដៅក៏ព្រោះតែពលរដ្ឋនៃប្រទេសទាំងពីរ បានផ្ទុះអំពើហិង្សានៅព្រំដែនខេត្តស្វាយរៀងកាលពីថ្ងៃទី២៨ មិថុនា និងការតវ៉ាតាមកំណត់ទូតប្រឆាំងនឹងសកម្មភាពរបស់វៀតណាម។
លោកស្រី កុយ ពិសី អនុប្រធានគណៈកម្មការកិច្ចការព្រំដែនកម្ពុជា បានបញ្ជាក់ប្រាប់វិទ្យុបារាំងថា គណៈកម្មការកិច្ចការព្រំដែនកម្ពុជារំពឹងថាខ្លួនអាចដោះស្រាយបញ្ហាព្រំដែនជាមួយប្រទេសវៀតណាមនៅក្បែរខាងនេះបាន។ សូមរម្លឹកថា អំពើហិង្សារវាងកម្ពុជា និងវៀតណាមបានផ្ទុះឡើងកាលពីសប្តាហ៍មុននៅតាមព្រំដែនខេត្តស្វាយរៀង ដែលបានបណ្តាលឱ្យពលរដ្ឋទាំងសងខាងរបួស ជិត២០នាក់ នៅក្នុងនោះក៏មានដែរព្រះសង្ឃ និងតំណាងរាស្ត្រគណបក្សសង្គ្រោះជាតិ។
ក្រសួងការបរទេសវៀតណាមកាលពីថ្ងៃអង្គារម្សិលមិញ បានរិះគន់យ៉ាងខ្លាំងលើអំពើហិង្សានៅព្រំដែនដែលដឹកនាំដោយសមាជិកសភាគណបក្សសង្គ្រោះជាតិ។ វៀតណាមបានស្នើមកដល់ភាគីកម្ពុជាឱ្យចាត់វិធានការសមស្របដើម្បីដោះស្រាយបញ្ហានេះដែលបានកើតឡើង និងការពារកុំឱ្យមានសកម្មភាពដដែលនេះកើតឡើងជាថ្មីម្តងទៀត ក្នុងន័យដើម្បីធានាឱ្យបានការអនុវត្តការបោះបង្គោលព្រំដែនរវាងប្រទេសទាំងពីរដោយឈរលើប្រយោជន៍រួមនៃប្រទេសទាំងពីរ។ នេះបើតាមការបញ្ជាក់ពី លោក Le Hai Binh អ្នកនាំពាក្យក្រសួងការបទេសវៀតណាមដែលបានឆ្លើយសំនួរអ្នកសារព័ត៌មានកាលពីថ្ងៃអង្គារម្សិលមិញ។
សូមបញ្ជាក់ថា បញ្ហាព្រំដែនកម្ពុជានិងវៀតណាមបានផ្ទុះឡើងជាបន្តបន្ទាប់តាំងពីខេត្តត្បូងឃ្មុំ ខេត្តរតនៈគីរី ខេត្តកំពត និងខេត្តកណ្តាលជាដើម។ ហើយចុងក្រោយនេះ បានឈានដល់ការផ្ទុះអំពើហិង្សារវាងពលរដ្ឋទាំងពីរប្រទេស។ គណបក្សសង្គ្រោះជាតិស្នើឱ្យសភាជាតិបង្កើតគណៈកម្មការចំពោះកិច្ចដើម្បីដោះស្រាយព្រំដែន ដើម្បីពិនិត្យមើលការបោះព្រំដែនរវាងប្រទេសទាំងពីរឡើងវិញ និងស្នើឱ្យប្តឹងអន្តរជាតិ។
លោក សុខ ទូច អ្នកវិភាគស្ថានការណ៍នយោបាយនៅកម្ពុជា បានមើលឃើញថា កិច្ចប្រជុំនៅថ្ងៃចន្ទទី៦ កក្កដាសប្តាហ៍ក្រោយ ជាបង្ហាញថាកម្ពុជា និងវៀតណាមជាប្រទេសក្នុងសមាគមប្រជាជាតិអាស៊ាន។ យ៉ាងណាក៏ដោយលោកបណ្ឌិតបានបញ្ជាក់ថា ការដោះស្រាយបញ្ហាព្រំដែនគឺត្រូវការពេលវេលា និងបានស្នើភាគីវៀតណាមគោរពសន្ធិសញ្ញាព្រំដែនរវាងប្រទេសទាំងពីរដែលបានចុះកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ