កម្ពុជាបណ្តេញជនជាតិវៀតណាម៧០នាក់បន្ថែមទៀតទៅវៀតណាមនៅថ្ងៃនេះ
អាជ្ញាធរកម្ពុជា នៅថ្ងៃអាទិត្យនេះ បានបញ្ជូនជនជាតិវៀតណាម៧០នាក់បន្ថែមទៀត ត្រឡប់ទៅប្រទេសកំណើតវិញ ក្រោយរកឃើញថា ពួកគេទាំងនេះចូលមករស់នៅដោយខុសច្បាប់ក្នុងប្រទេសកម្ពុជា។ មន្ត្រីជំនាញបញ្ជាក់ថា នេះជាជំហានបន្តបន្ទាប់ក្នុងការបោសសម្អាតជនអន្តោប្រវេសន៍ដែលកំពុងរស់នៅដោយច្បាប់ក្នុងប្រទេសកម្ពុជា។
ចុះផ្សាយនៅថ្ងៃ៖
ស្តាប់ - ០១:២៣
ជនជាតិវៀតណាមទាំង៧០នាក់នេះត្រូវបានបញ្ជូនតាមរយៈរថយន្តពីរគ្រឿងតាមច្រកព្រំដែនអន្តរជាតិបាវិតនិងក្អមស្រណរនៅព្រឹកថ្ងៃអាទិត្យទី២៨មិថុនានេះ។ ពួកគេ៧០នាក់នេះ ត្រូវបានរកឃើញថា បានចូលមករស់នៅដោយខុសច្បាប់ក្នុងប្រទេសកម្ពុជាដោយពុំមានលិខិតឆ្លងដែននោះទេ។ ហើយជនជាតិវៀតណាមចំនួន៧០នាក់នេះ ត្រូវបានគេប្រមូលមកពី សង្កាត់វត្នភ្នំ សង្កាត់ផ្សារកណ្ដាលមួយ សង្កាត់ផ្សារថ្មី សង្កាត់បឹងត្របែក ការដ្ឋានសំណង់កោះពេជ្រ និងនៅតាមហាងកាហ្វេមួយចំនួននៅក្នុងទីក្រុងភ្នំពេញ។
ប្រធាននាយកដ្ឋាននិតិវិធីនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ លោក អ៊ុក ហៃសិឡា ឲ្យដឹងថា ប្រតិបត្តិការប្រមូលជនអន្តោប្រវេសន៍ដែលកំពុងរស់នៅដោយខុសច្បាប់ក្នុងប្រទេសកម្ពុជា នឹងចាប់ធ្វើជាបន្តបន្ទាប់ ដោយមិនជូនដំណឹងជាមុនទេ ព្រោះបារម្ភថា ជនអន្តោប្រវេសន៍ដឹងខ្លួនមុន ហើយរត់ទៅនៅកន្លែងផ្សេងទៀត។
សូមបញ្ជាក់ថា ចាប់តាំងពីខែកក្កដាឆ្នាំ២០១៤ដល់ខែមិថុនាឆ្នាំ២០១៥នេះ មានជនជាតិវៀតណាមចំនួន ២០៥៨ នាក់ហើយ ដែលត្រូវបានអាជ្ញាធរកម្ពុជាបណ្ដេញចេញពីប្រទេសកម្ពុជា។ ជាក់ស្ដែងនៅឆ្នាំ២០១៥នេះ កម្ពុជាបានបណ្ដេញជនជាតិវៀតណាមចេញពីកម្ពុជា ចំនួន១១០៦នាក់ ក្នុងនោះស្រី៨២នាក់។ ក្រៅពីជនជាតិវៀតណាម ក៍មានជនបរទេសជាច្រើនទៀតក៍ត្រូវបានបណ្តេញចេញពីប្រទេសកម្ពុជាជាបន្តបន្ទាប់ ក្នុងនោះរួមមាន ជនជាតិចិន កូរ៉េ និង ហ្វីលីពីនជាដើម។ ជារួមមក មានជនបរទេសចំនួន ២៥៥៨នាក់ហើយ ដែលអាជ្ញាធរកម្ពុជាបានបណ្តេញចេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ