ក្រសួងធនធានទឹកអំពាវនាវអោយប្រជាជនរស់នៅក្បែរស្ទឹងប្រុងប្រយ័ត្ន
រដ្ឋមន្ត្រីក្រសួងធនធានទឹកអំពាវនាវអោយប្រជាជនរស់នៅក្បែរស្ទឹងធ្វើការប្រុងប្រយ័ត្ន បើទោះបីជាស្ថានភាពទឹកជំនន់មិនទាន់ដល់កម្រិតប្រកាសអាសន្នក៏ដោយ។ ការប្រកាសអោយប្រជាជនប្រុងប្រយ័ត្ននេះ ពីព្រោះកម្ពុជាអាចនៅទទួលរងព្យុះមួយចំនួនផ្សេងទៀត។
ចុះផ្សាយនៅថ្ងៃ៖
ស្តាប់ - ០១:៥៧
បើទោះបីជាតំបន់ខ្លះនៅក្នុងប្រទេសកម្ពុជាបានទទួលរងគ្រោះដោយសារទឹកជំនន់ទឹកភ្លៀង ហើយធាតុអាកាសអាប់អួរនៅបន្តគ្របដណ្តប់មកលើខេត្តមួយចំនួននៃប្រទេសកម្ពុជាក៏ដោយក្តី ក៏រដ្ឋមន្ត្រីក្រសួងធនធានទឹកនិងឧតុនិយមនៃប្រទេសកម្ពុជាបានអះអាងថា ស្ថានភាពទឹក នៅក្នុងប្រទេសកម្ពុជាមិនទាន់ឡើងដល់ចំណុចប្រកាសអាសន្ននៅឡើយទេ។
លោក លឹម គានហោ រដ្ឋមន្ត្រីក្រសួងធនធានទឹកនិងឧតុនិយមបានថ្លែងប្រាប់វិទ្យុបារាំងអន្តរជាតិនៅថ្ងៃអាទិត្យនេះថា លោកមានការព្រួយបារម្ភពីទឹកជំនន់ទឹកភ្លៀងបង្កមកលើតំបន់ខ្លះនៃប្រទេសកម្ពុជាដែរ តែមិនទាន់មានសភាពធ្ងន់ធ្ងរទេ។ លោកបានបញ្ជាក់ថា ក្នុងរយៈពេលប៉ុន្មានថ្ងៃចុងក្រោយនេះ ទឹកជំនន់ទឹកភ្លៀងបានជន់លិចរយៈពេលខ្លីផ្នែកខ្លះនៃខេត្តព្រះវិហារ និងផ្លូវខ្លះនៃខេត្តកំពង់ធំមែន ប៉ុន្តែស្ថានភាពមិនធ្ងន់ធ្ងរទេ។
លោក ញឹម វណ្ណដា អនុប្រធានគណៈកម្មាធិការជាតិគ្រប់គ្រងគ្រោះមហន្តរាយបានថ្លែងប្រាប់នៅល្ងាចថ្ងៃអាទិត្យនេះដែរថា ស្ថានភាពទឹកនៅតាមដងទន្លេមេគង្គ និងទន្លេសាបមិនទាន់ចោទជាបញ្ហានៅឡើយទេ។ ប៉ុន្តែអាជ្ញាធរគ្រប់លំដាប់ថ្នាក់ត្រូវតែត្រៀមជាប្រចាំពីព្រោះគ្រោះធម្មជាតិគ្មាននរណាអាចមើលឃើញទាំងស្រុងនោះទេ។
បើទោះបីជាស្ថានភាពទឹកជំនន់នៅក្នុងប្រទេសកម្ពុជាមិនទាន់ត្រូវបានអាជ្ញាធរប្រកាសអាសន្នក៏ដោយក្តី ក៏លោក លឹម គានហោ បានអំពាវនាវអោយប្រជាពលរដ្ឋរស់នៅតាមមាត់ស្ទឹងសំខាន់ៗនៃប្រទេសកម្ពុជាធ្វើការប្រុងប្រយ័ត្នជាប្រចាំ។ ស្ទឹងទាំងនោះរួមមាន៖ ស្ទឹងព្រែកត្នោត ក្នុងខេត្តកំពង់ស្ពឺ ស្ទឹងពោធិ៍សាត់ ខេត្តពោធិ៍សាត់ ស្ទឹងសែនខេត្តកំពង់ធំនិងស្ទឹងដទៃមួយចំនួនផ្សេងទៀត។
លោករដ្ឋមន្ត្រីប្រកាសអោយធ្វើការប្រុងប្រយ័ត្នជាប្រចាំ ពីព្រោះថា ជារៀងរាល់ឆ្នាំ ព្យុះចំនួនពី២២ ទៅ២៥ ត្រូវបោកបក់មកលើប្រទេសកម្ពុជា។ តែរហូតមកដល់ពេលនេះ ប្រទេសកម្ពុជាទើបទទួលរងសម្ពាធព្យុះចំនួន១៦ទេ។ ដូច្នេះ កម្ពុជាអាចនូវទទួលរងសម្ពាធព្យុះមួយចំនួនផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ