លោកស្រីHillary Clinton និងលោកDonald Trump ចាប់ផ្តើមយុទ្ធនាការឃោសនាបោះឆ្នោតប្រធានាធិបតីជាផ្លូវការ
ចុះផ្សាយនៅថ្ងៃ៖
ស្តាប់ - ០៤:២៨
ការបោះឆ្នោតប្រធានាធិបតីអាមេរិកនឹងប្រព្រឹត្តទៅ នាថ្ងៃទី៨ ខែវិច្ឆិការខាងមុខនេះ។ក្រោយពីសមាជតែងតាំងរបស់គណបក្សទាំងពីរបានត្រូវបិទបញ្ចប់រៀងៗខ្លួន បេក្ខជនប្រធានាធិបតីផ្លូវការតំណាងគណបក្សប្រជាធិបតេយ្យគឺលោកស្រី Hillary Clinton និងគណបក្សសាធារណរដ្ឋ គឺលោកDonald Trump ចាប់ផ្តើមដឹកនាំយុទ្ធនាការឃោសនាហើយ។ កាលពីចុងសប្តាហ៍នេះ បេក្ខជនទាំងពីរនាក់បានទៅជួបសំណេះសំណាលជាមួយអ្នកគំាំទ្រនៅតំបន់ យុទ្ធសាស្រ្តមួយស្ថិតក្នុងរដ្ឋ Pennsylvanie និងរដ្ឋ Ohio។ តំបន់នោះត្រូវបានគេប្រសិទ្ធិនាមថា «Rust Belt» ឬប្រែមកថា «ខ្សែរក្រវ៉ាត់ច្រែះ» ដែលធ្លាប់មានរោងចក្រដែកថែប និងរោងចក្រផ្សេងៗ។ បេក្ខជនទាំងពីរនាក់សង្ឃឹមទាក់ទាញសម្លេងគាំទ្រពីសំណាក់ក្រុមគ្រួសារកម្មករក្រីក្រនៅទីនោះ។
លោកស្រី Hillary Clinton អាយុ ៦៨ ឆ្នាំ បានចូលក្នុងកំណត់ត្រាប្រវត្តិសាស្រ្តអាមេរិកហើយ ដោយលោកស្រីបានក្លាយជាស្រ្តីតំបូងគេបង្អស់ ដែលត្រូវបានតែងតាំងជាបេក្ខនារីប្រធានាធិបតីតំណាងឲ្យគណបក្សដ៏ធំមួយ។ ប៉ុន្មានម៉ោងប៉ុណ្ណោះ ក្រោយពីបានថ្លែងសុន្ទរកថាយល់ព្រមទទួលការតែងតាំងនាសមាជគណបក្សប្រជាធិបតេយ្យ លោកស្រី Hillary Clinton បានជួបសំណេះសំណាលជាមួយអ្នកគាំទ្ររបស់ខ្លួននាជំនួបមួយនៅទីក្រុង Philadelphie។
បន្ទាប់មក លោកស្រី Hillary Clinton បានឡើងរថយន្តក្រុងពណ៌ខៀវរបស់ក្រុមការងារឃោសនាបោះឆ្នោត។ បេក្ខជនអនុប្រធានាធិបតី គឺលោក Tim Kaine ក៏រួមដំណើរឃោសនាផងដែរ។ រថយន្តក្រុងបានធ្វើដំណើរឆ្ពោះទៅតំបន់ទិសខាងលិចនៃរដ្ឋ Pennsylvanie និងរដ្ឋ Ohio រយៈពេលបីថ្ងៃក្នុងចំងាយផ្លូវសរុប ១ ពាន់គីឡូម៉ែត្រ។ ហេតុផលដែលលោកស្រី Clinton ផ្តោតលើតំបន់នេះ គឺលោកស្រីចង់ជួបសំណេះសំណាលជាមួយក្រុមគ្រួសារអាមេរិកស្បែក-ស ដែលភាគច្រើនជាកម្មករមានជីវភាពលំបាក។
នៅតំបន់ជនបទដាច់ស្រយាលនេះ រោងចក្រដែកថែបបានបិទទ្វារចាប់តាំងពីទសវត្សរ៍ឆ្នាំ១៩៧០មកម្ល៉េះ។ ហើយរោងចក្រផ្សេងៗទៀតក៏បានបិទទ្វារជាបន្តបន្ទាប់ចាប់តាំងពីទសវត្សរ៍ឆ្នាំ១៩៩០។ វិបត្តិសេដ្ឋកិច្ចឆ្នាំ២០០៨-២០០៩ កាន់តែធ្វើឲ្យស្ថានភាពយ៉ាប់យ៉ឺនទៅទៀត។ ពលរដ្ឋអាមេរិកក្រីក្រនៅតំបន់នោះគ្មានការងារធ្វើ ហើយកាន់តែអស់សង្ឃឹមយ៉ាងខ្លាំង។ ចាប់តាំងពីសេដ្ឋកិច្ចបានងើបរើបឡើងបន្តិចក្នុងរយៈពេលប៉ុន្មានឆ្នាំចុងក្រោយនេះ ការងារថ្មីបន្តិចចបន្តួចប៉ុណ្ណោះត្រូវបានបង្កើតឡើង។
ដើម្បីទាក់ទាញសម្លេងឆ្នោត លោកស្រី Hillary Clinton បានស្នើលើកតំកើងផែនការវិនិយោគមួយ ដើម្បីស្តារសេដ្ឋកិច្ចតំបន់នោះ។ បើតាមការនិយាយបញ្ជាក់ដោយពុំបានផ្តល់ព័ត៌មាន ឬតួលេខលំអិតណាមួយ លោកស្រី Clinton បានសន្យាថា ប្រសិនបើខ្លួនជាប់ឆ្នោតក្លាយជាប្រធានាធិបតីអាមេរិកមែននោះ លោកស្រីគ្រោងអនុម័តផែនការនេះយ៉ាងយូរណាស់ ១០០ថ្ងៃ បន្ទាប់ពីលោកស្រីចូលកាន់កាប់មុខតំណែង។ លោកស្រី Clinton ក៏បានបង្ហើបឲ្យដឹងផងដែរថា ផែនការនេះគឺ វិនិយោគលើឧស្សាហកម្មកម្មន្តសាល និងហេដ្ឋារចនាសម្ព័ន្ធ។ ហើយផែនការនេះនឹងក្លាយជាគំរោងលើកស្ទួយសេដ្ឋកិច្ចដ៏ធំជាងគេបង្អស់ពុំដែលធ្លាប់មានពីមុនមក បន្ទាប់ពីសង្គ្រាមលោកលើកទី២។
ទន្ទឹមគ្នានេះផងដែរ លោក Donald Trump បេក្ខជនប្រធានធិបតីមកពីគណបក្សសាធារណរដ្ឋបានផ្តើមការឃោសនានៅរដ្ឋ Colorado ដែលជារដ្ឋសំខាន់មួយសំរាប់ការឈ្នះឆ្នោតប្រធានាធិបតី។ ហើយក្រុមការងារឃោសនារបស់លោក Trump ក៏ចុះទៅជួបសំណេះសំណាលជាមួយអ្នកគាំទ្រនៅរដ្ឋ Pennsylvanie និងរដ្ឋ Ohio ដូចលោកស្រី Hillary Clinton ផងដែរ។ នៅទីនោះ លោក Donald Trump ទំនងជាអាចទាក់ទាញបានសម្លេងគាំទ្រច្រើនពីសំណាក់ពលរដ្ឋអាមេរិកស្បែក-ស ដែលភាគច្រើនជាកម្មករ និងជាអ្នកអភិរក្សនិយម។ ក្រុមអ្នកបោះឆ្នោតទាំងនោះទំនងដូចជាពុំសូវចូលចិត្តស្តាប់ពាក្យពេចន៍របស់គណបក្សប្រជាធិបតេយ្យ ដែលលើកតម្កើងភាពចម្រុះជាតិសាសន៍ និងសមភាពភេទក្នុងសង្គមអាមេរិក។
បើតាមលោក John Russo អ្នកស្រាវជ្រាវប្រចាំសាកល្យវិទ្យាល័យ Georgetown និងជាអ្នកជំនាញសិក្សាលើជីវភាពកម្មករបានពន្យល់ប្រាប់ទីភ្នាក់ងារព័ត៌មានបារាំង AFP ឲ្យដឹងថា គ្រួសារកម្មករនៅតំបន់នោះហាក់ពុំទុកចិត្តលោកស្រី Hillary Clinton ឡើយ។ មូលហេតុចម្បង គឺដោយសារតែលោកអតីតៈប្រធានាធិបតី Bill Clinton ស្វាមីរបស់លោកស្រី។ សូមបញ្ជាក់ថា កាលពីខែធ្នូ ឆ្នាំ១៩៩៣ លោក Bill Clinton បានចុះហត្ថលេខាកិច្ចព្រមព្រៀងទីផ្សារសេរីអាមេរិកខាងជើង (ដែលហៅកាត់ជាភាសាអង់គ្លេសថា NAFTA)។ កិច្ចព្រមព្រៀងនេះហើយជាបច្ច័យនាំឲ្យរោងចក្រនៅតំបន់នោះត្រូវបិទទ្វារ។
នៅរដ្ឋ Pennsylvanie លោក Donald Trump បានធ្វើដំណើរទៅទីក្រុង Monessen។ បច្ចុប្បន្ន ទីក្រុងនេះមានប្រជាជនតែ ៧ ៥០០ នាក់ប៉ុណ្ណោះ។ ប៉ុន្តែ កាលពីអតីតកាល ទីក្រុងនេះសំបូរមនុស្សរស់នៅ ដោយសារតែរោងចក្រដែកថែបទាំងពីរផ្តល់ការងារដល់កម្មកររហូតដល់ ២២០០០ នាក់។ លោក Trump បានថ្លែងសន្យាបង្កើតការងារដល់ពលរដ្ឋនៅទីក្រុងនេះ ហើយសន្យាថានឹងឲ្យរោងចក្រដែកថែបដំណើរការជាថ្មី ជាជាងដំណើរការនៅបរទេស។
ឆ្លៀតឱកាសរិះគន់គូប្រជែងគណបក្សប្រជាធិបតេយ្យ លោក Donald Trump ស្នើកម្មវិធីនយោបាយប្រឆាំងសេដ្ឋកិច្ចទីផ្សារសេរី។ ហើយលោក Trump ចង់បង្កើតកម្មវិធីនយោបាយផេ្សងមានលក្ខណៈការពារតែផលប្រយោធន៍អាមេរិកប៉ុណ្ណោះ។ យុទ្ធសាស្រ្តឃោសនាបែបនេះបានទាក់ទាញប្រជាប្រិយភាពលោក Trump ក្នុងកំឡុងពេលបោះឆ្នោតបឋមនៅក្នុងបក្ស។ ឥឡូវនេះ លោក Trump ចង់យកយុទ្ធសាស្រ្តនេះទៅទាក់ទាញសម្លេងប្រជាពលរដ្ឋទូទាំងប្រទេស។
លោក Louis Mavrakis ជាអភិបាលក្រុង Monessen មកពីគណបក្សប្រជាធិបតេយ្យ។ បុរសអាយុ អាយុ ៧៩ ឆ្នាំ រូបនេះបានរៀបរាប់ថា ប្រជាជននៅទីក្រុងនេះអស់សង្ឃឹមគ្មានជំនឿលើគណបក្សណាមួយទេ។ សំរាប់ពួកគេ គណបក្សប្រជាធិបតេយ្យ ឬគណបក្សសាធារណរដ្ឋ គឺគ្មានអ្វីខុសគ្នាទេ។ ប៉ុន្តែ ហេតុអ្វីបានជាគ្រួសារកម្មករទាំងនោះចូលចិត្តលោក Donald Trump? នេះក៏ដោយសារតែលោក Trump និយាយអ្វីដែលកម្មករទាំងនោះចង់ស្តាប់ ចង់លឺ បើទោះបីជាពាក្យពេចន៍របស់លោក Trump ត្រូវបានគេយល់ឃើញថារើសអើងពូជសាសន៍ ឬប្រជាភិថុតក៏ដោយ។
សូមបញ្ជាក់ថា ក្នុងកំឡុងសមាជតែងតាំងកាលពីពីរសប្តាហ៍មុននៅទីក្រុង Cleveland រដ្ឋ Ohio មហាសេដ្ឋី Donald Trump បាននិយាយអះអាងថា ខ្លួនជាបេក្ខជនប្រធានាធិបតី ដែលនឹងនាំយកសណ្តាប់ធ្នាប់សង្គមត្រលប់មកវិញ។ លោក Trump ក៏បានសន្យារឹតបណ្តឹងអន្តោរប្រវេសន៍ និងជាពិសេសលុបបំបាត់ឧក្រិដ្ឋកម្ម ដែលកំពុងតែកើនឡើងមិនចេះឈប់ឈរនៅតាមបណ្តាទីក្រុងធំៗនៅសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ