គម្រោងរួមចិន-បេឡារុសទំហំ ១៦.០០០លានដុល្លារអាមេរិក
បេឡារុស និងចិន គ្រោងសមិទ្ធិគម្រោងរួម ក្នុងទឹកប្រាក់ដល់ទៅ ១៦.០០០លាន ដុល្លារអាមេរិក។ សេចក្តីនេះ តាមដំណឹងផ្សាយដោយ ទីភ្នាក់ងារពត៌មានរដ្ឋរុស្ស៊ី ITAR-TASS ត្រូវបានប្រកាសឲ្យដឹង ល្ងាចថ្ងៃ ១៥មីនាម្សិលមិញ ដោយលោកនាយករដ្ឋមន្រ្តីបេឡារុស Mikhail Myasnikovich ពេលទទួលជួប លោក Gun Zhianvey ឯកអគ្គរដ្ឋទូតចិន ប្រចាំ នៅក្រុង Minsk។
ចុះផ្សាយនៅថ្ងៃ៖
ស្តាប់ - ០២:១៦
ថ្លែងក្នុងជំនួបនេះ លោកនាយករដ្ឋមន្ត្រីបេឡារុស Mikhail Myasnikovich កត់សម្គាល់ថា រដ្ឋាភិបាលបេឡារុសតែងឲ្យតម្លៃខ្ពស់ដល់ទស្សនៈវិស័យ នៃសហប្រតិបត្តិការទ្វេភាគី និងដល់សក្តានុពលនៃគម្រោងរួម របស់បេឡារុស ជាមួយមហាប្រទេសចិន។
ឯកអគ្គរដ្ឋទូតចិនដែលប្រចាំ នៅបេឡារុសលោក Gun Zhianveyពីចំណែកខ្លួនវិញថ្លែងជាអាទិ៍៖ “គម្រោងមួយបែបនេះ មានឈ្មោះថា “សួនឧស្សាហកម្ម ចិន-បេឡារុស” ក្នុងន័យជាមជ្ឈមណ្ឌល រួមប្រជុំសហគ្រាស-រោងចក្រដែលនឹងបង្កើតឡើង នៅមិនឆ្ងាយប៉ុន្មានពីទីក្រុង Minsk រដ្ឋធានីបេឡារុស ត្រង់តំបន់ឈ្មោះ Smolevich។ ឥឡូវ ក្រដាសស្នាមជាឯកសារសម្រាប់ ការសាងសង់វា ត្រៀមបានជិតចប់សព្វគ្រប់ទៅហើយ។ តាមខ្ញុំយល់ គឺក្នុងឆ្នាំនេះតែម្តង ដែល ស្ថាបនកម្មផ្ទាល់ នឹងចាប់ផ្តើមប្រព្រឹត្តទៅ។ ហើយផ្លែផ្កាគម្រោងនេះ នឹងបម្រើដល់ប្រយោជន៍ ទាំងប្រជាជនបេឡារុស ទាំងប្រជាជនចិន”។
តាមពត៌មានផ្តល់ដោយ ខុទ្ទកាល័យរដ្ឋាភិបាលបេឡារុស ក្រោយពីវាចាប់ដំណើរការទៅ “ សួនឧស្សាហកម្ម “ នោះ នឹងជំរុញដល់ការអភិវឌ្ឍន៍ វិស័យបែបយ៉ាង ផលិតគ្រឿងចក្រ គ្រឿងម៉ាស៊ីន ឧស្សាហកម្មគីមី ជីវវេជ្ជសាស្ត្រ គ្រឿងបច្ចេកទេសសម្រាប់ប្រើក្នុងផ្ទះ វិស័យ អេឡិចត្រូនិក ជាដើម។
“សួនឧស្សាហកម្ម “ នឹងលាតសន្ធឹងលើផ្ទៃដី ដែលមានផ្ទៃក្រឡា រហូតដល់ជាង ៨០ គ.ម.២ ហើយតម្រូវឲ្យបញ្ចូលវិនិយោគ ក្នុងទឹកប្រាក់ ១៦.០០០លានដុល្លារអាមេរិក ឯណោះ។
កត្តាដ៏សំខាន់មួយទៀត គឺសំណង់ថ្មីនោះ នឹងផ្តល់ កន្លែងធ្វើការយ៉ាងច្រើន ដល់ប្រជាពលករ ប្រទេសទាំងពីរ។ នៅលើដែនដីនោះ នឹងមានបង្កើតជាហេដ្ឋារចនាសម្ព័ន្ធ សម្រាប់ការរស់នៅនៃពួកផលិតករចិន ក៏ដូចជាផលិតករបេឡារុស។
ចំណែកផលិតផលផ្តល់ដោយ អនាគតមជ្ឈមណ្ឌលរោងចក្រដែលនឹង អនុវត្តបច្ចេកវិជ្ជាទំនើប គឺនឹង នាំចេញទៅកាន់បណ្តាប្រទេស នៃសហគមន៍រដ្ឋឯករាជ្យ ហៅកាត់ថា CEI និងទៅកាន់បណ្តាប្រទេសនៃសហភាពអឺរ៉ុប។
អ្វីដែលគួរឲ្យកត់សម្គាល់ គឺថា ដំណឹងស្តីអំពី ការចាប់ផ្តើមសមិទ្ធិគម្រោងរួមនោះ ត្រូវគូភាគី ប្រកាស គឺនៅចំពេល ដែលនាប៉ុន្មានថ្ងៃនេះ ទាំងនៅក្រុង ប៉េកាំង ទាំងនៅក្រុង Minsk ប្រព្រឹត្តទៅ ពិធីរំលឹកដល់ខួបគម្រប់២០ឆ្នាំ នៃទំនាក់ទំនងការទូត រវាង ចិន និង បេឡារុស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ