ពិធីឡើងកាន់តំណែង ក្នុងផ្ទៃនៃទណ្ឌកម្មពីខាងបស្ចិមលោក
ថ្ងៃនេះ លោក Alexandre Loukachenko ដែលជាលទ្ធផលនៃការបោះឆ្នោត នាថ្ងៃ១៩ធ្នូកន្លងទៅ ត្រូវបានគ.ជ.ប.ប្រកាសថា ឈ្នះឆ្នោតជាថ្មី ទទួលសច្ចាប្រណិធានជាលើកទី៤ ឡើងកាន់តំណែងកំពូលជាប្រធានាធិបតីបេឡូរុស្ស៊ី សំរាប់អាណត្តិ៥ឆ្នាំទៅមុខទៀត។ ប៉ុន្តែពិធីនេះ ប្រព្រឹត្តទៅក្នុងផ្ទៃនៃទណ្ឌកម្ម អនុម័តម្សិលមិញដោយសភាអឺរ៉ុប ទាំងមានការគាំទ្រពីខាងស.រ.អាផង ទល់នឹងអំណាចលោក Loukachenko។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា ពីទីក្រុងម៉ូស្គូ
អគ្គរដ្ឋទូតទាំង ២៧ប្រទេសនៃសហភាពអឺរ៉ុប ដែលធ្វើពហិការ ចំពោះពិធីឡើងកាន់អំណាចជាថ្មីនៃលោក Loukachenko នាំគ្នាដកខ្លួនមួយរយៈសិនចេញពីបេឡូរុស្ស៊ី ទៅកាន់ប្រទេសលីទុយអានី នៅជិតខាង។ ចំណែកអគ្គរដ្ឋទូតអាមេរិក ដែលសាមគ្គីជាមួយអឺរ៉ុប គឺដកខ្លួនទៅកាន់ប្រទេសហ្ស័រហ្ស៊ី ជាសម្ពន្ធមិត្ត។
ចំណែក អគ្គរដ្ឋទូតដែលមានមុខក្នុងពីធីទទួលសច្ចាប្រណិធាននេះ គឺតំណាងឲ្យប្រទេសប្លែកៗ ចំនួន៣២ ក្នុងនោះមានសហព័ន្ធរុស្ស៊ីផង។
ថ្លែងម្សិលមិញ នៅទីក្រុងម៉ូស្គូ ក្នុងសន្និសីទកាសែតរួមជាមួយនាយករដ្ឋមន្ត្រីបេឡូរុស្ស៊ី ដែលមកធ្វើកិច្ចចរចាជុំវិញរឿងឧស្ម័ននិងប្រេងកាត ដែលរុស្ស៊ីលក់ទៅឲ្យបេឡូរុស្ស៊ី លោកប្រមុខរដ្ឋាភិបាលរុស្ស៊ី Poutine គូសបញ្ជាក់ថា ៖ សភាឌូម៉ារុស្ស៊ី គ្មានគម្រោងចេញជាឯកសារអ្វីណាពាក់ព័ន្ធនឹងទំនាស់រវាងសហភាពអឺរ៉រុប និង បេឡូរុស្ស៊ីឡើយ។
បើនិយាយពី សេចក្តីសំរេចអនុម័តដោយសភាអឺរ៉ុបនោះ គឺស្នើទៅក្រុមប្រឹក្សាសហភាពអឺរ៉ុបឲ្យដាក់ទណ្ឌកម្មទល់នឹងរដ្ឋអំណាច លោក Loukachenko ក្នុងទម្រង់បែបយ៉ាង ៖
- កុំចេញទិដ្ឋាការ ដល់មន្ត្រីបេឡូរុស្ស៊ី ប្រមាណ ១០០នាក់ ក្នុងនោះមានពួកអ្នកដឹកនាំក្រសួងមហាផ្ទៃ ក្រសួងសន្តិសុខ ចៅក្រម រដ្ឋអាជ្ញា ជាដើម បូកទាំងរូប លោក Loukachenko ផង ដែលជាប់ឈ្មោះប្រឡាក់ក្នុងការប្រើអំពើហិង្សាវាយធ្វើបាប ហើយចាប់ដាក់គុកតែម្តងបេក្ខជនប្រធានាធិបតី៧នាក់ខាងបក្សប្រឆាំង និងពួកបាតុកររាប់រយនាក់ ខាងបក្សប្រឆាំង ដែលហ៊ានតវ៉ា ដោយចាត់ទុកជាការក្លែងបន្លំសន្លឹកឆ្នោតទេតើ លទ្ធផលនៃការបោះឆ្នោត ដែលថាលោក Loukachenko ឈ្នះឆ្នោតដោយសំឡេងគាំទ្រដល់ជិត ៨០% ស្អីណា។
-ខ្ទប់ កុំឲ្យប្រើប្រាស់ទៅកើតលុយដែលពួកមន្ត្រីបេឡូរុស្ស៊ី ទាំងនោះមាននៅតាមធនាគារប្រទេសសហភាពអឺរ៉ុប។
-ពិនិត្យសើរើឡើងវិញនយោបាយចំពោះបេឡូរុស្ស៊ី បូកទាំងការដាក់ទណ្ឌកម្មសេដ្ឋកិច្ចផង។
គឺថ្ងៃ៣១មករាខាងមុខ ដែលក្រុមប្រឹក្សាសហភាពអឺរ៉ុប ក្នុងសម័យប្រជុំជាន់ថ្នាក់រដ្ឋមន្ត្រីការបរទេស ទាំង២៧ប្រទេសរបស់សហភាពនេះ គ្រោងអនុម័តយកសេចក្តីសំរេចដាក់ទណ្ឌកម្មមែនទល់នឹងបេឡូរុស្ស៊ី។
ទណ្ឌកម្មបែបនេះធ្លាប់បានត្រូវសហភាពអឺរ៉ុបដាក់ម្តងទៅហើយ ពីឆ្នាំ២០០៦ដល់ឆ្នាំ២០០៨ ទល់នឹងពួកមន្ត្រីបេឡូរុស្ស៊ី ប៉ុន្តែកាលណោះ គឺតែ៣៦នាក់ប៉ុណ្ណោះ។
ប្រតិកម្មពីខាងលោក Loukachenko វិញ គឺគាត់ចោទប្រទេសប៉ូឡូញនិងអាល្លឺម៉ង់ ថាជាអ្នកផ្តល់លុយ និងជាមេចាត់ចែងបាតុកម្មពួកប្រឆាំងលើកនេះ ដើម្បីធ្វើរដ្ឋប្រហារនៅបេឡូរុស្ស៊ី។ តាមសំដីគាត់ ភស្តុតាងបែបនេះបង្ហាញដោយពួកបាតុករដែលបានត្រូវចាប់ខ្លួន។
លោក Loukachenko ក៏កំញើញចាត់វិធានការយ៉ាងតឹងរ៉ឹងបកវិញ ក្នុងករណីបើសហភាពអឺរ៉ុប ហ៊ានដាក់ទណ្ឌកម្មជាថ្មីទល់នឹងប្រទេសគាត់។ គាត់ថា គាត់មិនធ្លាក់ខ្លួនធ្វើត្រុនៗ ចុះញ៉ម នៅពីមុខសហភាពនោះឡើយ ឫ ក៏នៅពីមុខមហាអំណាចណាក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ