រុស៊្សីធ្វើសមយុទ្ធជាមួយចិនដើម្បីរក្សាស្ថិរភាពតំបន់
កងទ័ពជើងទឹក ចិន និងរុស្ស៊ីបានចាប់ផ្តើមធ្វើសមយុទ្ធរួមគ្នា នៅថ្ងៃអាទិត្យនេះ នៅក្នុងសមុទ្រលឿង។ សមយុទ្ធរួមគ្នា រយៈពេល៦ថ្ងៃ (ពីថ្ងៃ ២២ ដល់ ២៧មេសា) ធ្វើឡើង នៅក្នុងខណៈពេលដែលចិន កំពុងមានជម្លោះដែនទឹកជាមួយជប៉ុន ជុំវិញប្រជុំកោះស៊ិនកាគូ និងជម្លោះជាមួយវៀតណាម និងហ្វីលីពីន ក្នុងរឿងដណ្តើមគ្រប់គ្រងប្រជុំកោះParacels និងSpratleysទ្រ នៅសមុទ្រចិនខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
រុស្ស៊ី និងចិនបានចាប់ផ្តើមធ្វើលំហាត់សឹករួមគ្នាបួនលើកមកហើយ តាំងពីឆ្នាំ ២០០៥ ប៉ុន្តែ នេះជាលើកទីមួយដែលប្រទេសអតីតគូសត្រូវក្នុងសម័យសង្រ្គាមត្រជាក់ទាំងពីរបានធ្វើសមយុទ្ធរួមគ្នាខាងផ្នែកជើងទឹក។ ក្នុងសមយុទ្ធលើកនេះ ចិនប្រើនាវាចម្បាំង១៦គ្រឿង និងនាវាមុជទឹក ២គ្រឿង ចំណែករុស្ស៊ីវិញបានបញ្ជូននាវាចម្បាំង៤គ្រឿងរបស់ខ្លួន ដែលមានបីគ្រឿង ជានាវាពិឃាដ។
លំហាត់សឹកលើកនេះផ្តោតសំខាន់លើប្រតិបត្តិការរួមគ្នាដើម្បីការពារផ្នែកអាកាស យុទ្ធសាស្រ្តប្រឆាំងនាវាមុជទឹករបស់សត្រូវ និងការរុករក ជួយសង្រ្គោះកងម៉ារីន ក្នុងករណីនាវាចម្បាំងរបស់ពួកគេ ត្រូវសត្រូវវាយប្រហារ។ កងម៉ារីនប្រទេសទាំងពីរសាកល្បងផងដែរពីវិធីសាស្រ្តជួយរំដោះនាវាដែលពួកភេរវជនចាប់ធ្វើជាចំណាប់ខ្មាំង។
យោងតាមអគ្គមេបញ្ជាការកងទ័ពចិន សមយុទ្ធជើងទឹកលើកនេះសំដៅពង្រឹងសហប្រតិបត្តិការយុទ្ធសាស្រ្ត និងការជឿទុកចិត្តគ្នាទៅវិញ ទៅមករវាងរុស្ស៊ី និងចិន។ ខាងផ្នែកយោធា ប្រទេសទាំងពីរបានផ្លាស់ប្តូរទំនាក់ទំនងគ្នាជាញឹកញយ បើទោះជារុស្ស៊ីនៅចោទប្រកាន់ចិនថា ជាចោរលួចចម្លងយកបច្ចេកទេសរបស់ខ្លួន ដើម្បីផលិត យន្តហោះចម្បាំងរបស់ខ្លួន ឈ្មោះ Sukhoi។ កន្លងមក ចិនជាអតិថិជន ទិញអាវុធពីរុស្ស៊ី។ ប៉ុន្តែ ការរីកចម្រើនទៅមុខខាងផ្នែកបច្ចេកវិទ្យារបស់ចិនបានធ្វើឲ្យចិនចេះផលិតអាវុធខ្លួនឯង និងលែងសូវពឹងផ្អែកលើសព្វាវុធរុស្ស៊ីដូចមុន។
អ្នកនាំពាក្យក្រសួងការបរទេសចិនវិញ និយាយថា សមយុទ្ធដែលមានឈ្មោះ “សហប្រតិបត្តិការនៅសមុទ្រ ឆ្នាំ ២០១២” ត្រូវចិន និងរុស្ស៊ី ព្រមព្រៀងគ្នាតាំងពីយូរណាស់មកហើយ ដើម្បីចូលរួមរក្សាសន្តិភាព និងស្ថិរភាពក្នុងតំបន់។
សមយុទ្ធលើកនេះធ្វើឡើង នៅក្នុងបរិបទមួយដែលចិន កំពុងមានវិវាទដែនទឹកជាមួយ ប្រទេសជិតខាងនៅអាស៊ី។ ចិននៅឈ្លោះជាមួយវៀតណាម ហ្វីលីពីន និងប្រទេសអាស៊ីផ្សេងទៀត នៅក្នុងសមុទ្រចិនខាងត្បូង ដោយភាគីជម្លោះទាមទារធ្វើជាម្ចាស់ប្រជុំកោះ Paracels និងSpratleysដែលសម្បូណ៍ដោយធនធានធម្មជាតិ ត្រី ប្រេង និងឧស្ម័ន។
ជប៉ុនវិញដែលមានជម្លោះទាំងជាមួយចិន និងរុស្ស៊ី រឿងដណ្តើមកោះដែរនោះ មិនសូវខ្វល់ខ្វាយ ពីសមយុទ្ធចិន រុស្ស៊ីលើកនេះ ប៉ុន្មានទេ។ ប៉ុន្តែ យ៉ាងណាក៏ដោយ ជប៉ុនបានបង្ហាញក្តីបារម្ភ បន្ទាប់ពីបានឃើញចិន ចេះតែឈ្លានពានកាន់តែញយចូលមកជិតប្រជុំកោះស៊ិនកាគូ របស់ជប៉ុន ចំណែករុស្ស៊ីឯណោះវិញ ឧស្សាហ៍ធ្វើសមយុទ្ធនៅជិតប្រជុំកោះ គូរីលដែលមានកោះមួយចំនួន ត្រូវជប៉ុនចាត់ទុកជាទឹកដីរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ