ចិនបង្កើនឥទ្ធិពលនៅអាមេរិកឡាទីនដែលធ្លាប់ជាដែនឥទ្ធិពលរបស់អាមេរិក
ចុះផ្សាយនៅថ្ងៃ៖
ស្តាប់ - ០៤:០០
ក្រោយពីបានឡើងកាន់តំណែងជាប្រធានាធិបតីចិន លោកស៊ី ជីនពីង បានចេញទៅបំពេញទស្សនកិច្ចនៅតាមបណ្តាប្រទេស និងតំបន់ ដែលជាអាទិភាពនៃនយោបាយការបរទេសចិន។ បន្ទាប់ពីរុស្ស៊ី និងអាហ្វ្រិក គឺដល់តំបន់អាមេរិកឡាទីន។ អាមេរិកឡាទីន ដែលតាមទម្លាប់ គឺជាដែនឥទ្ធិពលរបស់សហរដ្ឋអាមេរិក ក៏ប៉ុន្តែ ដែលមើលទៅ ចិនក៏កំពុងតែស្វះស្វែងបង្កើនឥទ្ធិពលរបស់ខ្លួនដែរ។
ដំណើរទស្សនកិច្ចរបស់លោកស៊ី ជីនពីង ទៅកាន់ប្រទេសក្នុងតំបន់អាមេរិកឡាទីន តាំងពីថ្ងៃសុក្រមុនមកនោះ គឺជាសារបង្ហាញ និងបញ្ជាក់អំពីអាទិភាពនៃនយោបាយការបរទេសចិន ក្រោមអាណត្តិរបស់លោក។ ក៏ប៉ុន្តែ ចិនមិនមែនទើបតែចាប់ផ្តើមចង់បង្កើនវត្តមាន នៅក្នុងតំបន់អាមេរិកឡាទីន នៅពេលនេះទេ។
អស់រយៈពេលប្រមាណជា ៥ឆ្នាំមកហើយ ដែលគេសង្កេតឃើញថា ចិនចាប់ផ្តើមពង្រីកវត្តមានរបស់ខ្លួន នៅអាមេរិកឡាទីន តាមរូបភាពផ្សេងៗគ្នា ដោយចាប់ផ្តើមពីការពង្រីកមុខជំនួញ ដើម្បីធានាការផ្គត់ផ្គង់នូវប្រភពធនធានមួយចំនួន រួមមាន ប្រេង និងរ៉ែទង់ដែង ជាដើម។
ចាប់តាំងពីឆ្នាំ២០១១មក ចិនបានក្លាយទៅជាដៃគូពាណិជ្ជកម្មដ៏ធំលំដាប់ទី២ របស់អាមេរិកឡាទីន បន្ទាប់ពីសហរដ្ឋអាមេរិក។ ចិនបានចុះកិច្ចព្រមព្រៀងជាច្រើន ជាមួយនឹងប្រទេសក្នុងតំបននេះ ជាពិសេស នៅក្នុងវិស័យហិរញ្ញវត្ថុ ធនធានធម្មជាតិ និងថាមពល។ បើយោងតាមទិន្នន័យរបស់រដ្ឋាភិបាលចិន កាលពីឆ្នាំ២០១២កន្លងទៅនេះ ការដោះដូរពាណិជ្ជកម្មរវាងចិន និងអាមេរិកឡាទីន បានកើនឡើងជាង ៨% បើគិតជាទឹកប្រាក់ គឺមានរហូតដល់ទៅ ជាង ២៦១ពាន់លានដុល្លារ។
អ្វីដែលគួរជាការកត់សម្គាល់ នៅក្នុងពេលដែលការដោះដូរពាណិជ្ជកម្មរវាងចិន និងអាមេរិកឡាទីនមានការកើនឡើង ការដោះដូរពាណិជ្ជកម្មរវាងអាមេរិកឡាទីន ជាមួយសហរដ្ឋអាមេរិកវិញ មានការធ្លាក់ចុះ ដែលជាការបង្ហាញថា ទីផ្សារសម្រាប់អាមេរិក នៅក្នុងតំបន់អាមេរិកឡាទីន កំពុងតែប្រឈមមុខនឹងការវាយលុកពីចិន។ ហើយតំបន់អាមេរិកឡាទីននេះ តាំងពីដើមមក គឺជាដែនឥទ្ធិពលរបស់សហរដ្ឋអាមេរិក។
គេធ្លាប់ឮថា សហរដ្ឋអាមេរិក ក្រោមអាណត្តិរបស់លោកអូបាម៉ា ដាក់ចេញនូវយុទ្ធសាស្រ្តថ្មីមួយ គឺបង្កើនឥទ្ធិពល នៅក្នុងតំបន់អាស៊ីប៉ាស៊ីហ្វិក។ យុទ្ធសាស្រ្តនេះធ្វើឲ្យចិនមិនសប្បាយចិត្ត ដោយចិនចាត់ទុកថា តំបន់អាស៊ី គួរតែជាដែនឥទ្ធិពលរបស់ចិន ហើយអ្វីដែលអាមេរិកកំពុងធ្វើ គឺជាយុទ្ធសាស្រ្តឡោមព័ទ្ធ រាំងខ្ទប់ឥទ្ធិពលរបស់ចិន។
ដូច្នេះ ការដែលចិនខិតខំពង្រឹងវត្តមានរបស់ខ្លួន នៅក្នុងតំបន់អាមេរិកឡាទីន អាចជាការឆ្លើយតបចំពោះអាមេរិក នៅក្នុងន័យថា បើអ្នកចូលមកលុកលុយដែនឥទ្ធិពលរបស់ខ្ញុំ បង្កើនវត្តមានមកដល់ទ្វាររបងរបស់ខ្ញុំ ខ្ញុំក៏នឹងឈានជើងចូលមកទ្វាររបងរបស់អ្នកឯងវិញដែរ!
ដើម្បីបោះជំហានចូលមកដល់ដែនឥទ្ធិពលរបស់អាមេរិកនេះ ចិនគ្មានកម្លាំងទ័ព គ្មានអាវុធយុទ្ធភ័ណ្ឌទំនើប គ្មាននាវាមុជទឹក ឬនាវាផ្ទុកយន្តហោះសន្ធឹកសន្ធាប់ដូចជាសហរដ្ឋអាមេរិកនោះទេ តែចិនមានអាវុធដ៏សំខាន់មួយផ្សេងទៀត គឺលុយ។ ចិនមានលុយ មានសក្តានុពលខាងពាណិជ្ជកម្ម ដែលអាចទាក់ទាញប្រទេសនៅតំបន់អាមេរិកឡាទីននេះបាន ហើយបើតាមមើលទៅ អាវុធនេះ ក៏មានប្រសិទ្ធិភាពមិនចាញ់មហាអំណាចយោធាអាមេរិកប៉ុន្មាននោះដែរ។
ជាក់ស្តែងយើងសង្កេតឃើញថា បណ្តាប្រទេសនៅអាមេរិកឡាទីន ដែលកាលពីមុនមិនមានទំនាក់ទំនងការទូតជាមួយចិន ដោយពួកគេទទួលស្គាល់តែកោះតៃវ៉ាន់ ចាប់ផ្តើមងាកចេញពីតៃវ៉ាន់ មកភ្ជាប់ទំនាក់ទំនងការទូតជាមួយចិនវិញម្តងមួយៗ។ ហើយនៅក្នុងប្រទេសណា ដែលងាកចេញពីតៃវ៉ាន់មករកចិនដីគោក គេឃើញថា ទំនាក់ទំនងការទូតរវាងចិន និងប្រទេសនោះច្រើនតែអភិវឌ្ឍទៅជាទំនាក់ទំនងសេដ្ឋកិច្ច ពាណិជ្ជកម្ម និងថាមពល។
ថាមពល! ជាការពិតណាស់ថា យុទ្ធសាស្រ្តរបស់ចិន នៅក្នុងតំបន់អាមេរិកឡាទីននេះ មិនមែនមានគោលដៅត្រឹមតែចង់មកផ្គើនអាមេរិកដល់ទ្វាររបងអាមេរិកនោះទេ។ ក៏ប៉ុន្តែ ចិនក៏សំឡឹងមើលឃើញផងដែរនូវផលប្រយោជន៍ជាក់ស្តែង ដែលអាចទាញយកពីតំបន់នេះបាន ក្នុងចំណោមនោះ គឺមានធនធានប្រេង។ ប្រេង ដែលចិនកំពុងតែត្រូវការខ្លាំង ជាមួយនឹងកំណើនសកម្មភាពសេដ្ឋកិច្ចយ៉ាងលឿនរហ័ស។ ហើយប្រេង ដែលមានស្តុកយ៉ាងសម្បើម នៅក្នុងតំបន់អាមេរិកឡាទីន ដូចជា វ៉េណេហ្ស៊ុយអេឡា ដែលគេរកឃើញថា ជាប្រទេសដែលមានស្តុកប្រេងឆៅច្រើនជាងគេបំផុត នៅលើពិភពលោក ពោលគឺ ច្រើនជាងអារ៉ាប៊ីសាអ៊ូឌីតទៅទៀត។ ក្រៅពីវ៉េណេហ្ស៊ុយអេឡា ក៏នៅមានប្រទេសមួយចំនួនផ្សេងទៀត នៅក្នុងតំបន់អាមេរិកឡាទីន ដែលសម្បូរធនធានប្រេង ដូចយ៉ាង ម៉ិចស៊ិក ប្រេស៊ីល អាក្វាទ័រ កូឡុំប៊ី និងអាហ្សង់ទីន ជាដើម។
ដូច្នេះ សរុបមកវិញ យុទ្ធសាស្រ្តរបស់ចិនដែលកំពុងបង្កើនឥទ្ធិពលនៅអាមេរិកឡាទីន អាចមានគោលដៅពីរ។ ម្យ៉ាង ចូលមកបង្កើនវត្តមាន នៅក្នុងតំបន់ដែលជាដែនឥទ្ធិពលអាមេរិក ដើម្បីជាការឆ្លើយតបទៅនឹងយុទ្ធសាស្រ្តរបស់អាមេរិក ដែលកំពុងតែបង្កើនឥទ្ធិពលនៅអាស៊ី ដែលក្រុងប៉េកាំងយល់ថាជាយុទ្ធសាស្រ្តឡោមព័ទ្ធចិន។ គោលដៅមួយទៀត គឺគ្រប់គ្រងតំបន់ ដែលសម្បូរទៅដោយធម្មជាតិ ជាពិសេស ធនធានប្រេង ដែលចិនកំពុងតែត្រូវការខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ