មេដឹកនាំកងទ័ពចិនប្រកាសថានឹងបន្តពង្រាយនាវាល្បាតនៅក្នុងសមុទ្រជាប់ជម្លោះ
មន្រ្តីជាន់ខ្ពស់នៃកងទ័ពចិនបានប្រកាសនៅថ្ងៃអាទិត្យនេះថា នាវាល្បាតដែនសមុទ្ររបស់ចិននឹងនៅតែបន្តល្បាត នៅក្នុងតំបន់ ដែលចិនទាមទារអធិបតេយ្យភាព។ ការប្រកាសបែបនេះបានធ្វើឡើង នៅក្នុងវេទិកាសន្តិសុខអាស៊ី Shangri-La នៅក្នុងប្រទេសសិង្ហបុរី។ វេទិកា ដែលមានការចូលរួមពីសំណាក់មេដឹកនាំយោធាមកពីអាមេរិក និងមកពីបណ្តាប្រទេសនៅអាស៊ី ដែលកំពុងជាប់ជម្លោះជាមួយនឹងចិនផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
នៅក្នុងសុន្ទរកថា នៅចំពោះមុខមន្រ្តីយោធាមកពីបណ្តាប្រទេសមួយចំនួន មកពីអាមេរិក និងអាស៊ី ឧត្តមសេនីយ៍ ឈី ជៀនហ្គួ (Qi Jianguo) នាយរងសេនាធិការនៃកងទ័ពជើងគោកចិនបានលើកឡើងថា ចិនមិនដែលប្រកាន់យកនយោបាយវាតទីទឹកដី ឬប្រើកម្លាំងទ័ព ដើម្បីឈ្លានពានប្រទេសដទៃនោះទេ។
ក៏ប៉ុន្តែ នៅក្រោយសុន្ទរកថានេះ ប្រតិភូយោធាម្នាក់ ដែលស្ថិតនៅក្នុងវេទិកាសន្តិសុខ Shangri-La នេះដែរបានលើកឡើងថា តាមការសង្កេតជារួម ប្រទេសនៅក្នុងតំបន់អាស៊ី ហាក់ដូចជាមិនសូវទុកចិត្តចំពោះឆន្ទៈពិតប្រាកដរបស់ចិននោះទេ ដោយសារតែគេបានសង្កេតឃើញថា ចិនបានបង្កើនសកម្មភាពកងទ័ពជើងទឹករបស់ខ្លួនកាន់តែខ្លាំង នៅក្នុងតំបន់ ដែលកំពុងជាប់ជម្លោះជាមួយនឹងប្រទេសជិតខាង។
ឆ្លើយតបទៅនឹងការលើកឡើងនេះ ឧត្តមសេនីយ៍ ឈី ជៀនហ្គួ លើកឡើងថា “ចិនតែងតែប្រកាន់នូវជំហមួយច្បាស់លាស់ ចំពោះសមុទ្រចិនខាងកើត និងសមុទ្រចិនខាងត្បូង គឺថា តំបន់ទាំងអស់នេះស្ថិតនៅក្រោមដែនអធិបតេយ្យរបស់ចិន ដោយមិនអាចប្រកែកបាន។ ដូច្នេះ ការដែលចិនដាក់ពង្រាយនាវាចម្បាំង ឬនាវាល្បាតដែនសមុទ្រ នៅក្នុងតំបន់អស់ទាំងនេះ វាគឺជារឿងត្រឹមត្រូវស្របច្បាប់ ដែលមិនគួរជាបញ្ហាចម្រូងចម្រាសអ្វីនោះទេ”។
គួរបញ្ជាក់ឡើងវិញថា នៅក្នុងសមុទ្រចិនខាងកើត ចិនកំពុងជាប់ជម្លោះជាមួយនឹងជប៉ុន ជុំវិញប្រជុំកោះដែលជប៉ុនហៅថា សេនកាគូ ហើយចិនហៅថា ទៀវយូ។ ប្រជុំកោះដែលបច្ចុប្បន្ន ស្ថិតក្រោមការគ្រប់គ្រងរបស់ជប៉ុន ក៏ប៉ុន្តែ ចិនកំពុងទាមទារ ហើយតែងតែបញ្ជូននាវាល្បាតចូលទៅក្បែរប្រជុំកោះនេះ។
ចំណែកនៅក្នុងតំបន់សមុទ្រចិនខាងត្បូងវិញ ចិនប្រកាសយកតំបន់នេះស្ទើរតែទាំងមូល ថាជាដែនអធិបតេយ្យរបស់ខ្លួន ក្នុងពេលដែលប្រទេស ៤ផ្សេងទៀត នៅក្នុងតំបន់អាស៊ាន គឺវៀតណាម ហ្វីលីពីន ព្រុយណេ និងម៉ាឡេស៊ី ទាមទារដែនសមុទ្រនេះមួយផ្នែក គឺផ្នែក ដែលស្ថិតនៅក្បែរឆ្នេរសមុទ្ររបស់ពួកគេ។
ជម្លោះនៅក្នុងដែនសមុទ្រទាំងនេះ ក៏តែងតែបង្កភាពតានតឹងផងដែរ រវាងចិន និងអាមេរិក ដែលជាសម្ព័ន្ធមិត្តជាមួយនឹងប្រទេសជាប់ជម្លោះជាមួយចិន ដូចជា ជប៉ុន និងហ្វីលីពីន ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ