ការស្ថាបនាលីប៊ីថ្មី ក្រោយរបបកាដាហ្វីកំពុងបោះជំហានទៅមុខ
សន្និសីទអន្តរជាតិស្តីពីប្រទេសលីប៊ីថ្មីដែលរៀបចំនៅថ្ងៃព្រហស្បតិ៍ ទី១ កញ្ញាម្សិលមិញក្នុងទីក្រុងប៉ារីស ប្រទេសបារំាង បានសម្រេចបង្វែរប្រាក់របស់កាដាហ្វីដែលសហគមន៍អន្តរជាតិបានបិទខ្ទប់ទៅឲ្យក្រុមប្រឹក្សាជាតិអន្តរកាលលីប៊ី ដែលគេហៅកាត់ថា CNT។ ក្រៅពីដកប្រាក់មួយចំនួនរបស់កាដាហ្វីនៅបរទេសទៅឲ្យរដ្ឋអំណាចថ្មីលីប៊ី សន្និសីទក៏បានសម្រេចឲ្យអង្គការអូតង់បន្តប្រតិបត្តិការរបស់ខ្លួន ដរាបណាមនុស្សខ្លាំងកាដាហ្វីនៅតែបង្កជាគ្រោះថ្នាក់សម្រាប់ប្រជាជនលីប៊ី។ ចំណែកលោកប្រធានក្រុមប្រឹក្សាជាតិអន្តរកាលលីប៊ី Moustapha Abdeljalil បានអំពាវនាវប្រជាជនលីប៊ីឲ្យចូលរួមរៀបចំស្ថិរភាព សន្តិភាព និងការផ្សះផ្សាគ្នា។
ចុះផ្សាយនៅថ្ងៃ៖
ស្តាប់ - ០២:០៩
គឺជាមួយនឹងរូបថតក្រុមគ្រួសារនៃបណ្តាប្រទេសជាមិត្តរបស់លីប៊ីថ្មី និងទឹកប្រាក់ប្រមាណជា ១ម៉ឺន ៥ពាន់លានដុល្លារ ដែលក្រុមប្រឹក្សាជាតិអន្តរកាលលីប៊ីបានទទួលនៅពេលបិទបញ្ចប់សន្និសីទអន្តរជាតិស្តីពីលីប៊ីថ្មីក្នុងទីក្រុងប៉ារីស ប្រទេសបារំាងនាថ្ងៃព្រហស្បតិ៍ ទី១ កញ្ញាម្សិលមិញ។ សន្និសីទដែលចូលរួមដោយប្រមុខរដ្ឋ ប្រមុខរដ្ឋាភិបាល និងតំណាងអង្គការអន្តរជាតិសរុប ៦២នាក់។ សូមជម្រាបជូនថា ទឹកប្រាក់ចំនួន ១ម៉ឺន ៥ពាន់លានដុល្លារដែលក្រុមប្រឹក្សាជាតិអន្តរកាលលីប៊ីបានទទួលពេលនេះ មិនមែនជាប្រាក់ជំនួយរបស់សហគមន៍អន្តរជាតិដើម្បីជួយកសាងលីប៊ីថ្មី នៅក្រោយកាដាហ្វីទេ តែជាប្រាក់របស់កាដាហ្វី និងមនុស្សជំនិតកាដាហ្វីដែលបានលួចបង្វែរទុកនៅឯបរទេស សរុបមានប្រមាណជាជាង ៥ម៉ឺនលានដុល្លារ។
រហូតមកដល់ពេលបច្ចុប្បន្ន ប្រាក់ទំាងអស់នេះត្រូវបានសហគមន៍អន្តរជាតិបិទខ្ទប់មិនឲ្យរបបកាដាហ្វីយកទៅប្រើប្រាស់ទេ។ លោកប្រធានាធិបតីបារំាង នីកូឡា សាកូហ្ស៊ីដែលបានធ្វើជាអធិបតីភាពនៃសន្និសីទនោះបានថ្លែងថា ទឹកប្រាក់ទំាងអស់ដែលកាដាហ្វី និងមនុស្សជំនិតរបស់កាដាហ្វីបានលាក់ទុកនៅបរទេស នឹងត្រូវប្រគល់ទៅឲ្យប្រជាជនលីប៊ីវិញ។ ក៏ប៉ុន្តែ ការគំាទ្ររបស់សហគមន៍អន្តរជាតិទំាងផ្នែកហិរញ្ញវត្ថុ និងនយោបាយចំពោះក្រុមប្រឹក្សាជាតិអន្តរកាលលីប៊ីត្រូវមានលក្ខខណ្ឌ នោះគឺរបបលីប៊ីថ្មីត្រូវតែដើរតាមគន្លងលទ្ធិប្រជាធិបតេយ្យ។
នៅត្រង់ចំណុចនេះ ក្រុមប្រឹក្សាជាតិអន្តរកាលលីប៊ីហាក់ដូចជាបានយល់យ៉ាងច្បាស់ថា គេត្រូវតែគោរពតាមពាក្យសន្យា និងធានាមិនឲ្យសម្ព័ន្ធមិត្តខកចិត្តទេ។ អ្វីដែលសហគមន៍អន្តរជាតិចង់បានត្រលប់វិញនោះ គឺសុំឲ្យរដ្ឋអំណាចថ្មីលីប៊ីផ្តើមអនុវត្តនូវនយោបាយមួយដែលមានលក្ខណៈសន្តោសប្រណី និងការផ្សះផ្សា។ សម្រាប់លោកស្រីប្រមុខការទូតអាមេរិក Hillary Clinton លោកស្រីបានស្នើរដ្ឋអំណាចថ្មីលីប៊ីឲ្យបើកយុទ្ធនាការប្រយុទ្ធប្រឆំាងនឹងក្រុមជ្រុលនិយម ពិសេស ក្រុមឧទ្ទាមមួយចំនួនដែលគេសង្ស័យថា ស្និតនឹងក្រុមអ៊ីស្លាមជ្រុលនិយម ឬក្រុមអាល់កៃដា។
ជាការឆ្លើយតប លោកប្រធានក្រុមប្រឹក្សាជាតិអន្តរកាលលីប៊ី Moustapha Abdeljalil បានអំពាវនាវប្រជាជនលីប៊ីឲ្យចូលរួមរៀបចំស្ថិរភាព សន្តិភាព និងការផ្សះផ្សាគ្នា។ អ៊ីចឹងឃើញថា នៅពេលនេះ គេបានទទួលត្រឹមតែពាក្យសន្យាប៉ុណ្ណោះ ចំណែកឯការអនុវត្តន៍ជាក់ស្តែងយ៉ាងណានោះ គេនៅមិនទាន់ដឹងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ