ម៉ូស្គូទើបប្រកាសទទួលស្គាល់ក្រុមប្រឹក្សាជាតិអន្តរកាល នៅលីប៊ី
ក្នុងសេចក្តីថ្លែងការណ៍ ចេញព្រឹកថ្ងៃទី១កញ្ញានេះ ក្រសួងការបរទេសរុស្ស៊ី ចាត់ទុក ”ក្រុមប្រឹក្សាជាតិអន្តរកាល“ ជាអំណាចស្របច្បាប់តែមួយគត់ ដែលដំណើរការ នៅប្រទេសលីប៊ី។ តាមក្រសួងការបរទេសរុស្ស៊ី ទីក្រុងម៉ូស្គូ ទទួលស្គាល់នេះ ដោយឃើញថា “ក្រុមប្រឹក្សាជាតិអន្តរកាល“ បានប្រកាស ”កម្មវិធីកំណែទម្រង់” ដែលប្រមើល តាក់តែងឡើងរដ្ឋធម្មនុញ្ញថ្មី ធ្វើការបោះឆ្នោតសកល ដើម្បីបង្កើតរដ្ឋាភិបាលពេញលក្ខណៈ។
ចុះផ្សាយនៅថ្ងៃ៖
ស្តាប់ - ០២:២១
ក្រសួងការបរទេសរុស្ស៊ី ក៏រំលឹកថា រុស្ស៊ី ”មានទំនាក់ទំនងការទូតជាមួយលីប៊ី តាំងពីថ្ងៃទី៤កញ្ញា ឆ្នាំ១៩៥៥ ជំនាន់សហភាពសូវៀតម៉្លេះ ហើយមិនដែលបានផ្តាច់ ទំនាក់ទំនង នេះម្តងណាឡើយ ដោយមិនអាស្រ័យ តើរដ្ឋាភិបាលណាបានកាន់អំណាច ក្នុងប្រទេសលីប៊ី។
ក្រសួងការបរទេសរុស្ស៊ី ក៏សំដែងនូវជំនឿជឿជាក់ថា “រាល់តែសន្ធិសញ្ញាដែលក្រុងម៉ូស្គូបានចុះ កាលពីមុនទៅហើយ ជាមួយក្រុងទ្រីប៉ូលី មុខជានឹងត្រូវ ភាគីលីប៊ី បំពេញយ៉ាងម៉ត់ចត់ពុំខាន។
សេចក្តីថ្លែងការណ៍ ជាផ្លូវការ របស់ទីក្រុងម៉ូស្គូ ដែលសង្ឃឹមថា ភាគីលីប៊ី មុខជានឹងបំពេញតាមរាល់តែកិច្ចព្រមព្រៀងដែលមានចុះទៅហើយ ជាមួយរុស្ស៊ី ពិតជា ដក់ជាប់ដោយ ប្រយោជន៍ ដែលរុស្ស៊ីចិញ្ចឹមទុក នៅលីប៊ី។ ផលប្រយោជន៍នេះ សណ្ឋិតនៅ តាមមុខព្រួញពីរ។ ទី១ គឺ រុស្ស៊ីតែងទទួលបានចំណូល យ៉ាងក្រាស់ក្រែល ពីការលក់អាវុធខ្លួន ទៅលីប៊ី។ គ្រាន់តែ កិច្ចសន្យាចុងក្រោយ ដែលមិនទាន់ចេញរូបរាងបានរួច ដោយសារ សង្គ្រាមបានផ្ទុះឡើង នៅលីប៊ី គឺមានតម្លៃជាទឹកប្រាក់៤.០០០លានដុល្លារឯណោះ។ ទី២-ក្រុមហ៊ុនប្រេងកាត និងឧស្ម័នរបស់រុស្ស៊ីចំនួន ៣ អាចខាតបង់ អស់ជាច្រើនរយលានដុល្លារ ដែលខ្លួនបានចំណាយទៅហើយ ដើម្បីប្រកបអាជីវកម្មខ្លួន នៅលីប៊ី។
ដ្បិតក្រោយពីទ័ពពួកឧទ្ទាម បានចូលកាន់កាប់ក្រុងទ្រីប៉ូលីភ្លាម តំណាងរបស់ក្រុមហ៊ុនរដ្ឋលីប៊ី ខាងជីកប្រេងកាត Arabian Gulf Oil Company បានថ្លែងព្រមានថា ក្រុមហ៊ុននេះ នឹងបន្តធ្វើការ គឺតែជាមួយប្រទេសណា ដែលបានគាំទ្រ ដល់ការផ្តួលរំលំ របបផ្តាច់ការ Kadhafi បានន័យថា នឹងបន្តសហការ តែជាមួយក្រុមហ៊ុន អ៊ីតាលី បារាំង អង់គ្លេស អាមេរិកាំង។ ប៉ុន្តែ ដំណឹងនេះ បន្ទាប់មកបានត្រូវច្រានចោលវិញ ដោយ “ក្រុមប្រឹក្សាជាតិអន្តរកាល” នៅលីប៊ី។
ចំណែករុស្ស៊ីបានត្រឹមតែបញ្ចេញសំឡេងអនុបវាទ ប្រៀបបាន លេងល្បែង ដោយ “ចាក់ខ្សែ” ប៉ុណ្ណោះ ដើម្បីមិនខាត មិនចំណេញ គ្រាន់តែស្រង់ដើមបានវិញ ខុសពីអ្នកហ៊ាន ចាក់ចំ “កៅឪ” ដែលបើចាក់ត្រូវ គឺចំណេញកប់ក្តោង។
ការដែលរុស្ស៊ី នៅទីបំផុត ទទួលស្គាល់ ក្រុមប្រឹក្សាជាតិអន្តរកាល ជាអំណាចស្របច្បាប់ នៅលីប៊ី ពីព្រោះ រុស្ស៊ីគ្មានក្រឡាណាផ្សេង សម្រាប់ដើរឡើយ ក្រោយពីរបបកាដាហ្វ៊ី ដួល រលំទៅ។ នេះបើទោះបីជារុស្ស៊ី ខំព្យាយាមឲ្យស្ថានទូតខ្លួន នៅបន្តដំណើរការជាប់នឹងរបបនេះក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ