ប៉ូលិសចិននឹងឡើងឆែកឆេរទូកបរទេសដែលចូលក្នុងដែនសមុទ្រជាប់ជម្លោះ
ប៉ូលិសមូលដ្ឋាន នៅខេត្តប៉ែកខាងត្បូងប្រទេសចិន ត្រូវបានផ្តល់សិទ្ធិអំណាចឲ្យឡើងឆែកឆរទូកបរទេសទាំងឡាយណា ដែលចូលមកក្នុងសមុទ្រចិនខាងត្បូង ដែលចិនចាត់ទុកថាជាដែនទឹករបស់ខ្លួន។ នេះបើយោងតាមកាសែតផ្លូវការរបស់រដ្ឋចិន ដែលបានចុះផ្សាយ នៅថ្ងៃពុធនេះ។ វិធានការនេះទំនងជានឹងធ្វើឲ្យជម្លោះនៅសមុទ្រចិនខាងត្បូងមានសភាពកាន់តែតានតឹងខ្លាំងឡើងថែមទៀត។
ចុះផ្សាយនៅថ្ងៃ៖
ស្តាប់ - ០២:០០
យោងតាមកាសែត China Daily បទបញ្ជាថ្មី ដែលនឹងចាប់ចូលជាធរមាន នៅថ្ងៃទី១មករា ឆ្នាំ២០១៣ខាងមុខនេះ ផ្តល់សិទ្ធិអំណាចដល់ប៉ូលិសមូលដ្ឋាន ក្នុងខេត្តហៃណាន (Hainan) ឲ្យឡើងឆែកឆេរ និងរឹបអូសទូកបរទេសទាំងឡាយណា ដែល “ចូលដោយខុសច្បាប់” ក្នុងដែនទឹករបស់ចិន។ ដែនសមុទ្រ ក្នុងសមុទ្រចិនខាងត្បូង ដែលចិនចាត់ទុកថាជាដែនទឹករបស់ខ្លួននេះ កំពុងជាប់មានជម្លោះជាមួយប្រទេសមួយចំនួន ដែលជាសមាជិកអាស៊ាន។
កាសែត China Daily ក៏បានផ្សាយឲ្យដឹងផងដែរថា រដ្ឋាភិបាលចិនគ្រោងនឹងបញ្ជូនកប៉ាល់ល្បាតដែនសមុទ្រជាច្រើនគ្រឿងបន្ថែមទៀត ឲ្យទៅល្បាតក្នុងសមុទ្រចិនខាងត្បូង។
វិធានការថ្មីនេះ ទំនងជានឹងធ្វើឲ្យជម្លោះនៅសមុទ្រចិនខាងត្បូងមានភាពតានតឹងកាន់តែខ្លាំងឡើងថែមទៀត បន្ថែមពីលើរឿងចិនបោះផែនទីជាប់ជម្លោះ នៅលើលិខិតឆ្លងដែនថ្មី។ គួររំឭកឡើងវិញថា លិខិតឆ្លងដែនថ្មីរបស់ចិននេះបានធ្វើឲ្យមានការតវ៉ាយ៉ាងខ្លាំងក្លាពីសំណាក់ប្រទេសជាប់ជម្លោះ ទាំងឥណ្ឌា ដែលជាប់ជម្លោះព្រំដែនគោក ទាំងវៀតណាម និងហ្វ៊ីលីពីន ដែលជាប់ជម្លោះដែនទឹក ក្នុងសមុទ្រចិនខាងត្បូង។ ក្រៅពីបានផ្ញើកំណត់ទូតតវ៉ា ប៉ូលិសព្រំដែនវៀតណាម និងហ្វ៊ីលីពីនបានបដិសេធមិនបោះត្រាលើលិខិតឆ្លងដែនថ្មីនេះ។ ចំណែកឥណ្ឌាវិញ បានប្រើផែនទីខ្លួនឯងធ្វើជាត្រា ដើម្បីបោះលើលិខិតឆ្លងដែនចិនដ៏ចម្រូងចម្រាសនេះ។ ឥណ្ឌូណេស៊ី និងសហរដ្ឋអាមេរិកក៏បានរិះគន់ដែរ ចំពោះការគូសផែនទីជាប់ជម្លោះ លើទំព័រលិខិតឆ្លងដែនថ្មីរបស់ចិននេះ។
នៅថ្ងៃព្រហស្បតិ៍នេះដែរ ហ្វ៊ីលីពីនបានចេញមុខតវ៉ាសាជាថ្មីទៀត ទាមទារឲ្យចិនដកនាវារបស់ខ្លួនចេញពីតំបន់ជម្លោះ។ រដ្ឋមន្រ្តីក្រសួងការបរទេសហ្វ៊ីលីពីនបានអះអាងថា ហ្វ៊ីលីពីនបានសុខចិត្តដកនាវាចេញពីតំបន់ជម្លោះនេះ តាំងពីដើមខែមិថុនាម៉្លេះ ដើម្បីបន្ធូរបន្ថយភាពតានតឹង ដោយរដ្ឋាភិបាលចិនបានសន្យាថានឹងដកនាវារបស់ខ្លួនចេញដែរ។ ក៏ប៉ុន្តែ រហូតមកទល់ពេលនេះ ជិត ៦ខែហើយ នាវាទាំង ៣គ្រឿង របស់រដ្ឋាភិបាលចិន នៅតែបន្តស្ថិតនៅក្នុងតំបន់ជម្លោះដដែល។
យើងសង្កេតឃើញថា នៅក្នុងចំណោមប្រទេសជាប់ជម្លោះនៅសមុទ្រចិនខាងត្បូង ហ្វ៊ីលីពីន ដែលជាសម្ព័ន្ធមិត្តរបស់អាមេរិក គឺជាប្រទេសដែលបានចេញមុខតវ៉ាទល់ជាមួយចិនខ្លាំងជាងគេ ជាពិសេស នៅក្នុងអំឡុងកិច្ចប្រជុំអាស៊ាន និងអាស៊ីបូព៌ា ដែលមានចិន និងអាមេរិកចូលរួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ