វៀតណាមបដិសេធមិនបោះត្រាលើលិខិតឆ្លងដែនចិនដែលមានផែនទីជាប់ជម្លោះ
ប៉ូលិសព្រំដែនវៀតណាមបានឲ្យដឹងនៅថ្ងៃអង្គារនេះថា ពួកគេបានបដិសេធមិនបោះត្រាលើលិខិតឆ្លងដែនថ្មីរបស់ចិន ដោយសារតែនៅលើលិខិតឆ្លងដែននេះមានរូបផែនទី សមុទ្រចិនខាងត្បូងដែលកំពុងជាប់ជម្លោះ។ លិខិតឆ្លងដែនដ៏ចម្រូងចម្រាសនេះក៏បានបង្កឲ្យមានការតវ៉ាផងដែរពីសំណាក់ហ្វ៊ីលីពីន និងឥណ្ឌា។
ចុះផ្សាយនៅថ្ងៃ៖
ស្តាប់ - ០១:៤៤
វៀតណាមបានអះអាងថា លិខិតឆ្លងដែនអេឡិចត្រូនិក ដែលរដ្ឋាភិបាលចិនទើបនឹងចេញថ្មីនេះ រំលោភលើអធិបតេយ្យភាពរបស់វៀតណាម ដោយសារតែនៅលើទំព័រលិខិតឆ្លងដែននេះ មានផែនទី ដែលរាប់បញ្ចូលប្រជុំកោះទាំងអស់នៅក្នុងសមុទ្រចិនខាងត្បូង ទៅក្នុងទឹកដីចិន។
មន្រ្តីប៉ូលិសព្រំដែនវៀតណាម ទាំងនៅអាកាសយានដ្ឋានអន្តរជាតិក្រុងហាណូយ និងនៅតាមច្រកព្រំដែនគោក បានអះអាងថា ពួកគេបានបដិសេធមិនបោះត្រាលើលិខិតឆ្លងដែនថ្មីនេះទេ ប៉ុន្តែ វៀតណាមនៅតែអនុញ្ញាតឲ្យពលរដ្ឋចិន ដែលកាន់លិខិតឆ្លងដែនថ្មីនេះ ធ្វើដំណើរចូលក្នុងប្រទេសវៀតណាមបានដដែល ដោយគ្រាន់តែចេញទិដ្ឋាការដោយឡែក។
ពលរដ្ឋចិនមួយចំនួន ដែលកាន់លិខិតឆ្លងដែនថ្មីនេះ បាននាំគ្នារអ៊ូរទាំតាមបណ្តាញសង្គមថា ពួកគេជួបនឹងបញ្ហាស្មុគស្មាញច្រើន ក្នុងការឆ្លងដែនចូលទៅកាន់ប្រទេសវៀតណាម ដោយសារតែវៀតណាមមិនទទួលស្គាល់លិខិតឆ្លងដែនថ្មីនេះ។
គួរបញ្ជាក់ថា ផែនទីដែលចិនបោះពុម្ពលើទំព័រលិខិតឆ្លងដែនអេឡិចត្រូនិកថ្មីនេះ គឺមានទាំងផែនទីដីគោករបស់ចិនផង ហើយមានទាំងខ្សែបន្ទាត់ព្រំដែន ដែលគូសវាតពេញសមុទ្រចិនខាងត្បូង ស្ទើរតែដល់ឆ្នេរសមុទ្រហ្វ៊ីលីពីន និងម៉ាឡេស៊ី ក៏ប៉ុន្តែ មិនមានបញ្ចូលកោះដែលជាប់ជម្លោះជាមួយជប៉ុនទេ។
កាលពីសប្តាហ៍មុននេះ ទាំងហ្វ៊ីលីពីន និងទាំងវៀតណាម សុទ្ធតែបាននាំគ្នាផ្ញើកំណត់ទូតតវ៉ាជាផ្លូវការទៅកាន់រដ្ឋាភិបាលក្រុងប៉េកាំង ចំពោះការចេញលិខិតឆ្លងដែនថ្មីនេះ។
ចំណែកខាងបន្ទាត់ព្រំដែនគោកវិញ ផែនទីនៅលើលិខិតឆ្លងដែនថ្មីនេះ ក៏បានបង្កឲ្យមានការតវ៉ាយ៉ាងខ្លាំងដែរ ពីខាងរដ្ឋាភិបាលឥណ្ឌា ដោយសារតែនៅលើផែនទីនេះ ចិនបានគូសខ្សែព្រំដែនវាតយកតំបន់មួយចំនួន នៅអរុណាចាល់ ប្រាដេស្ហ (Arunachal Pradesh) និងអាក់សៃ ជីន (Aksai Chin) ដែលកំពុងជាប់ជម្លោះជាមួយនឹងឥណ្ឌា។
រដ្ឋាភិបាលក្រុងប៉េកាំងវិញ បានព្យាយាមបន្ធូរបន្ថយភាពចម្រូងចម្រាស ចំពោះលិខិតឆ្លងដែនថ្មីនេះ ដោយអ្នកនាំពាក្យក្រសួងការបរទេសចិនបានលើកឡើងថា ផែនទីនៅលើលិខិតឆ្លងដែនថ្មីនេះ មិនមែនធ្វើឡើង ដើម្បីបង្កជម្លោះជាមួយប្រទេសណាមួយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ