ចិនជម្លៀសប្រជាជនខ្លួនចេញពីវៀតណាម និងប្រកាសព្យួរផែនការពាណិជ្ជកម្មទ្វេភាគី
ចុះផ្សាយនៅថ្ងៃ៖
ស្តាប់ - ០៤:២០
ក្រោយពីមានការបះបោរហិង្សាប្រឆាំងចិន នៅវៀតណាម នៅសប្តាហ៍នេះ ចិនបានជម្លៀសប្រជាជនខ្លួនជាង៣ពាន់នាក់ នៅថ្ងៃអាទិត្យ១៨ឧសភានេះ អោយចាកចេញពីវៀតណាម។ ចិនបានបញ្ជូននាវា៥គ្រឿង មកជួយជម្លៀសប្រជាជនខ្លួនអោយបានឆាប់បំផុត។ ទន្ទឹមនេះដែរ ចិនបានសម្រេចព្យួរនូវផែនការផ្តោះប្តូរពាណិជ្ជកម្មទ្វេភាគីមួយចំនួនជាមួយរដ្ឋាភិបាលក្រុងហាណូយ។ នៅថ្ងៃអាទិត្យនេះដែរ វៀតណាមបានពង្រាយប៉ូលិសដើម្បីទប់ស្កាត់បាតុកម្មប្រឆាំងចិនក្នុងស្រុក ទប់ស្កាត់បាតុករមិនអោយចូលទៅតវ៉ានៅមុខស្ថានទូតចិននៅក្រុងហាណូយ។ ប៉ូលិសបានចាប់ខ្លួនមនុស្សជាច្រើននាក់នៅក្រុងហាណូយ និងក្រុងហូជីមិញ។
ចិនលេងពាណិជ្ជកម្មយ៉ាងចាស់ដៃជាមួយវៀតណាម
នៅថ្ងៃអាទិត្យនេះ អង្គការសង្គមស៊ីវិលជាច្រើនបានអំពាវនាវអោយប្រជាជនចុះធ្វើបាតុកម្មប្រឆាំងចិនបន្តទៀត តែក្នុងបែបផែនសន្តិភាព ពោលគឺមិនត្រូវបង្កហិង្សាដាច់ខាត។ ទន្ទឹមនេះដែរ នាយករដ្ឋមន្ត្រីវៀតណាមបានបញ្ជាអោយកងកម្លាំងវៀតណាមប្រកាន់ជំហរដាច់ខាត ទប់ស្កាត់មិនអោយមានភាពចលាចលក្នុងស្រុក។ ទោះយ៉ាងនេះក្តី ចិនមិនអាចរង់ចាំរហូតដល់វៀតណាមដោះស្រាយចប់សព្វគ្រប់នូវបញ្ហាបាតុកម្មប្រឆាំងចិន ក្នុងស្រុកទេ។ ចិនត្រូវតែលេងមួយដៃអោយធ្ងន់បែបនេះហើយ ដើម្បីជំរុញរដ្ឋាភិបាលវៀតណាមអោយប្រុងប្រយ័ត្នខ្ពស់ករណីមានសកម្មភាព រឺទង្វើថ្មីណាមួយប្រឆាំងចិនទៀត។ ក្រុងប៉េកាំងដឹងច្បាស់ណាស់ថា ការអភិវឌ្ឍន៍ និងសេដ្ឋកិច្ចវៀតណាមពឹងផ្អែកខ្លាំងលើការវិនិយោគរបស់បរទេស ពឹងលើសហគ្រាសបរទេស។ ថ្មីៗនេះ ចិនទើបតែបានក្លាយខ្លួនជាប្រទេសមហាអំណាចសេដ្ឋកិច្ចពិភពលោកទី១ ដូច្នេះ ចិនមានអំណាចខ្ពស់ក្នុងការជំរុញអោយមានការដោះស្រាយបញ្ហាបង្កឡើងដោយបាតុកម្មហិង្សាប្រឆាំងចិននៅវៀតណាម។
ម្យ៉ាងទៀត តាមរយៈការសម្រេចព្យួរចោលនូវផែនការផ្តោះប្តូរពាណិជ្ជកម្មទ្វេភាគីមួយចំនួនជាមួយវៀតណាម ថ្ងៃនេះ ក្រុងប៉េកាំងក៏ប្រហែលចង់ប្រាប់ទៅអាមេរិក ដែលជាដៃគូយោធារបស់វៀតណាមក្នុងរយៈពេលប៉ុន្មានឆ្នាំចុងក្រោយនេះដែរថា ដើម្បីដោះស្រាយបញ្ហា ក្រៅពីវិធានការប្រើកម្លាំងបាយដណ្តើមបូរណភាពនៅសមុទ្រចិន ចិនក៏មិនខ្លាចនឹងប្រើវិធានការផ្សេងទៀត បែបសន្តិវិធី ដូចជាតាមផ្លូវពាណិជ្ជកម្ម រឺក៏អាចថាតាមបែបទំនាក់ទំនងការទូតផ្សេងៗនោះដែរ។
បើមើលហេតុការណ៍ជាក់ស្តែង បាតុកម្មប្រឆាំងចិនបានរាលដាលរហូតដល់២២ខេត្ត ក្នុងចំណោមខេត្តសរុប៦៣នៅវៀតណាម និងបានសម្លាប់មនុស្ស និងបង្កអោយមានមនុស្សរបួស១៤០នាក់។ ក្នុងនោះក៏មានជនជាតិចិនស្លាប់ដែរ។ បញ្ហាសំខាន់ពេលនេះ គឺសុវត្ថិភាព និងសន្តិសុខប្រជាជនចិន។ ការធានាសន្តិសុខនេះ ជាជម្រើសទី១របស់រដ្ឋាភិបាលចិន។ ដូច្នេះ ចិនត្រូវតែជម្លៀសប្រជាជនខ្លួន បូករួមផ្សំនឹងការព្យួរផែនការផ្តោះប្តូរពាណិជ្ជកម្ម ដែលជាទណ្ឌកម្មពាណិជ្ជកម្មលើវៀតណាមនេះ ដើម្បីរុញវៀតណាមអោយទ័លច្រក បញ្ឈប់ហិង្សាតែម្តង។ យើងអាចថា នេះជាវិធានការដ៏មានប្រសិទ្ធភាពសម្រាប់ក្រុងប៉េកាំងបាន។
ទោះជាចិនប្រកាសបន្តសកម្មភាពខួងរកប្រេង ក្នុងតំបន់ជាប់ជម្លោះ ក្បែរប្រជុំកោះប៉ារ៉ាសែល រដ្ឋាភិបាលវៀតណាមសម្រេចប្រើជំហរដាច់ខាតទប់ស្កាត់បាតុកម្ម ចៀសវាងមិនអោយអ្នកវិនិយោគបរទេសដកទំនុកចិត្តពីវៀតណាម
រដ្ឋាភិបាលក្រុងហាណូយមិនអាចបណ្តែតបណ្តោយអោយបាតុកម្មប្រឆាំងចិន រាលដាលទៀតឡើយ។ ក្នុងសប្តាហ៍នេះ ក្រុមបាតុករក៏បានវាយប្រហាររោងចក្របរទេសផ្សេងទៀត ដូចជារោងចក្រចិនតៃវ៉ាន់ រឺក៏សិង្ហបុរីដែលបានរងប៉ះពាល់ខ្លាំង។ រោងចក្រតៃវ៉ាន់ជាង៥០០ បានរងការខូចខាតដោយសារបាតុកម្មហិង្សា។ សិង្ហបុរីបានសំដែងការតវ៉ាប្រឆាំងនឹងបាតុកម្មបំផ្លាញរោងចក្រខ្លួន។ តាមរយៈបាតុកម្មហិង្សានេះ វៀតណាមកំពុងបាក់មុខ នៅចំពោះមុខអ្នកវិនិយោគបរទេសនានា។ ដូច្នេះ បើរដ្ឋាភិបាលវៀតណាមប្រហែសខ្លួន គឺសេដ្ឋកិច្ច និងការអភិវឌ្ឈន៍ក្នុងស្រុកឯណោះទេ ដែលអាចរងការប៉ះពាល់ធ្ងន់ធ្ងរបាន។ ដោយសារបាតុកម្មប្រឆាំងចិន វៀតណាមអាចនឹងត្រូវសងការខូចខាតដល់ក្រុមហ៊ុនបរទេសនានា ដែលមានរោងចក្ររងការខូចខាត។
ចុះញ៉មចិន រឺក៏មិនចុះញ៉មចិន រដ្ឋាភិបាលវៀតណាមត្រូវតែបន្ថយឥរិយាបថសិន ដើម្បីស្រោចស្រង់មុខមាត់វៀតណាមឡើងវិញ។
ម្យ៉ាងទៀត វៀតណាមមិនដឹងថា តើចិនអាចនឹងប្រើកម្លាំងបាយរឺយ៉ាងណាទេ ប្រសិនបើជម្លោះបូរណភាពនៅសមុទ្រចិន នៅតែបន្តពុះកញ្ជ្រោលនោះ។ គួររំលឹកថា កន្លងមក ចិនធ្លាប់វាយប្រហារវៀតណាមច្រើនដងហើយដែរ។ កាលពីឆ្នាំ១៩៧៩ ពេលវៀតណាមចូលរំដោះកម្ពុជា បណ្តេញខ្មែរក្រហមដែលជាសម្ព័ន្ធមិត្តចិន ចេញពីកម្ពុជា ចិនខឹងសម្បារនិងបានសម្រចធ្វើសង្គ្រាមជាមួយវៀតណាម។ មួយទៀត កាលពីឆ្នាំ១៩៨៨ ចិននិងវៀតណាមក៏បានប្រយុទ្ធគ្នាដោយសារជម្លោះកោះSpratleys ធ្វើអោយមានមនុស្សស្លាប់ជិត២០០នាក់ដែរ។
ប្រឈមនឹងចិន វៀតណាមក៏កំពុងប្រឈមនឹងបាតុកម្មក្នុងស្រុក ដែលអាចរាលដាលទៅជាបាតុកម្មប្រឆាំងរដ្ឋាភិបាលកុម្មុយនិស្តខ្លួនឯងវិញ ក៏ថាបាន។ ម្យ៉ាងទៀត ទោះជាអាមេរិកចោទចិនថា បានធ្វើសកម្មភាពខួងបូមប្រេង បង្កការផ្គើនក៏ដោយចុះ អាមេរិកក៏បានសុំអោយវៀតណាម និងចិនអោយស្ងប់ស្ងាត់ នឹងគ្នាដែរ។
ដូច្នេះ ពេលនេះអ្នកដែលអាចបាត់បង់ប្រយោជន៍ធំគឺវៀតណាម ហើយអ្នកដែលមានឥទ្ធិពលខ្ពស់ គឺមហាអំណាចសេដ្ឋកិច្ចចិន។ ចង់មិនចង់ វៀតណាមត្រូវតែចាត់វិធានការបញ្ចប់បាតុកម្មហិង្សាប្រឆាំងចិន ដើម្បីស្រោចស្រង់មុខមាត់ខ្លួនឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ