អំពើហិង្សាប្រឆាំងចិននៅវៀតណាមរាលដាលខ្លាំងរហូតដល់មានអ្នកស្លាប់និងរបួស
ចុះផ្សាយនៅថ្ងៃ៖
ស្តាប់ - ០៥:១៣
ចលនាបាតុកម្មប្រឆាំងចិននៅវៀតណាម កំពុងតែរីករាលដាលកាន់តែធំមិនធ្លាប់មាន។ រោងចក្រជាច្រើនកន្លែងត្រូវដុតបំផ្លាញ ហើយជនជាតិចិន ដែលធ្វើការនៅក្នុងប្រទេសវៀតណាមត្រូវស្លាប់ របួស ហើយរាប់រយនាក់ត្រូវបង្ខំចិត្តរត់ភៀសខ្លួនចេញពីវៀតណាម ចូលមកក្នុងប្រទេសកម្ពុជា។ អាជ្ញាធរវៀតណាមដែលបើកឲ្យមានបាតុកម្មប្រឆាំងចិន កាលពីចុងសប្តាហ៍ ត្រូវប្រឈមមុខនឹងស្ថានការណ៍ដែលពិបាកគ្រប់គ្រង។
អ្វីដែលកំពុងកើតឡើងនៅវៀតណាម នៅពេលនេះ ជាការបង្ហាញឲ្យឃើញកាន់តែច្បាស់ថា ប្រសិនបើមិនមានការប្រយ័ត្នប្រយែងទេ ចលនាជាតិនិយមងាយនឹងរាលដាលទៅជាអំពើហិង្សា គ្រប់គ្រងលែងជាប់។ វាជាអ្វីដែលយើងធ្លាប់ឃើញ នៅក្នុងប្រទេសកម្ពុជា កាលពីឆ្នាំ២០០៣ ដែលចលនាបាតុកម្មប្រឆាំងថៃ រាលដាលទៅជាអំពើហិង្សាដុតទូតថៃ និងក្រុមហ៊ុនថៃ។
បរិបទនៃនយោបាយក្នុងស្រុក គឺជាកត្តាសំខាន់មួយទៀត បន្ថែមពីលើសន្ទុះនៃចលនាជាតិនិយម។ ជាទូទៅ គេសង្កេតឃើញថា នៅវៀតណាម រាល់ការបញ្ចេញមតិតាមគ្រប់រូបភាពទាំងអស់ ទាំងតាមរយៈការនិយាយស្តី ការសរសេរ និងការជួបជុំធ្វើបាតុកម្ម តែងតែត្រូវអាជ្ញាធរហាមឃាត់ជានិច្ច។ នៅពេលដែលអាជ្ញាធរកាន់តែបិទខ្ទប់ ចំណង់របស់ប្រជាជនកាន់តែមានសន្ទុះកាន់តែខ្លាំង រង់ចាំតែនឹងថ្ងៃផ្ទុះចេញមកក្រៅ។
អំពើហិង្សាប្រឆាំងចិន នៅពេលនេះ កំពុងតែធ្វើឲ្យរដ្ឋាភិបាលវៀតណាមត្រូវប្រឈមមុខនឹងបញ្ហា ដែលអាចបង្កផលប៉ះពាល់ទាំងផ្នែកសេដ្ឋកិច្ច និងទាំងខាងនយោបាយ។
ចលនាបាតុកម្មប្រឆាំងចិននេះមិនមែនធ្វើការវាយប្រហារតែទៅលើរោងចក្រចិនទេ តែទៅលើស្ទើរតែគ្រប់រោងចក្រ ដែលមានស្លាកសញ្ញា ឬអក្សរចិន រួមមានទាំង រោងចក្រចិនដីគោក ចិនតៃវ៉ាន់ កូរ៉េ និងសិង្ហបុរី ជាដើម។ រោងចក្រដែលមិនទទួលរងការវាយប្រហារក៏ត្រូវបង្ខំចិត្តបិទទ្វារជាបណ្តោះអាសន្ន ដោយសារតែម្ចាស់រោងចក្របារម្ភ អំពីសុវត្ថិភាពបុគ្គលិករបស់ខ្លួន។ ទាំងនេះវាអាចបង្កផលអវិជ្ជមានចំពោះវិស័យវិនិយោគ នៅវៀតណាម ដែលបច្ចុប្បន្ននេះ កំពុងតែប្រឈមមុខនឹងបញ្ហាសេដ្ឋកិច្ចស្រាប់។
បញ្ហាធំមួយទៀត ដែលរដ្ឋាភិបាលវៀតណាមត្រូវប្រឈម គឺបញ្ហានយោបាយ។ យើងឃើញស្រាប់ហើយថា នៅក្នុងចលនាបាតុកម្មប្រឆាំងចិននេះ ភាគច្រើនគឺយុវជនក្មេងៗ និងជាក្រុមកម្មកររោងចក្រ។ ដូច្នេះ ចលនាបាតុកម្មប្រឆាំងចិននេះវាអាចជាឆ្នួនមួយ ដែលអាចដុតបញ្ឆេះឲ្យទៅជាចលនាប្រឆាំងនឹងនយោបាយក្នុងស្រុក ដូចជា ការទាមទារដំឡើងប្រាក់ខែ ឬចលនាប្រឆាំងនឹងរបបកុម្មុយនិស្ត ក៏អាចថាបាន។
គួររំឭកឡើងវិញថា ចលនាបាតុកម្មប្រឆាំងចិននៅវៀតណាមពេលនេះ បានផ្ទុះឡើង ក្រោយពីចិនបានបញ្ជូននាវាចូលទៅខួងរកប្រេងក្រោមបាតសមុទ្រ នៅក្នុងតំបន់សមុទ្រជាប់ជម្លោះ ក្បែរប្រជុំកោះ Paracel។
ថ្វីដ្បិតតែកន្លងមក ចិនធ្លាប់បានចូលទៅធ្វើសកម្មភាព នៅក្នុងតំបន់សមុទ្រជាប់ជម្លោះ ក៏ប៉ុន្តែ នេះជាលើកទីមួយ ដែលចិនចូលទៅខួងរកប្រេង ដែលជាបញ្ហារសើបសម្រាប់រដ្ឋាភិបាល ក៏ដូចជាសាធារណមតិវៀតណាម។ ម្យ៉ាង ប្រេង គឺជាធនធានធម្មជាតិ ដែលប្រទេសណាក៏ដូចជាប្រទេសណា តែងតែចាត់ទុកជាធនធានដ៏មានតម្លៃ និងជាប្រភពថាមពលជាយុទ្ធសាស្រ្ត សម្រាប់ប្រទេស។
ម្យ៉ាងទៀត សកម្មភាពខួងរកប្រេង ដែលចិនកំពុងធ្វើនៅពេលនេះ គឺជាប្រតិបត្តិការទ្រង់ទ្រាយធំ ដោយមានទាំងគ្រឿងចក្រសម្រាប់ខួងរកប្រេង និងមានទាំងនាវាតូចធំរាប់សិប ចូលមកក្នុងតំបន់ជម្លោះ ដើម្បីការពារប្រតិបត្តិការបូមប្រេង។ ចិនថែមទាំងបានប្រកាសកំណត់តំបន់រាប់គីឡូម៉ែត្រជុំវិញទីតាំងខួងរកប្រេងនេះជាតំបន់ហាមឃាត់ទៀតផង ដោយមិនឲ្យអ្នកណាចូលទៅជិត។
សកម្មភាពខួងរកប្រេងនេះក៏ជាសកម្មភាពដែលអាចមានលក្ខណៈយូរអង្វែងផងដែរ។ តាមគម្រោងរបស់ចិន ប្រតិបត្តិការខួងរកប្រេង នៅក្នុងតំបន់ជាប់ជម្លោះជាមួយវៀតណាមនេះ ត្រូវធ្វើយ៉ាងតិច រហូតដល់ថ្ងៃទី១៥សីហា។ រដ្ឋាភិបាលវៀតណាមប្រហែលជាបារម្ភថា បើខ្លួនមិនបញ្ចេញប្រតិកម្មប្រឆាំងខ្លាំងៗទេ ចិនអាចនឹងនៅបន្តសកម្មភាពខួងរកប្រេងនេះ នៅក្នុងរយៈពេលវែង ក្រោយពីថ្ងៃ១៥សីហានេះទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ