ផ្ទុះគ្រាប់បែកនៅស្ថានីយរថភ្លើង ក្រុងUrumqi តំបន់ស្វ័យតស៊ីនជាំង
សារព័ត៌មានចិនថ្មី នៅចុះផ្សាយនៅថ្ងៃពុធនេះ ថាមានការផ្ទុះគ្រាប់បែកមួយនៅស្ថានីយរថភ្លើង ក្រុងUrumqi ស្ថិតក្នុងតំបន់ស្វ័យតស៊ីនជាំង ភាគខាងលិច បណ្តាលអោយមានមនុស្សរងរបួស ប៉ុន្តែក្នុងចំនួនតិចតួច។ ការផ្ទុះនេះកើតឡើងចំពេលដែលប្រធានាធិបតីចិន ស៊ី ជីនពីង បិទបញ្ចប់ទស្សនកិច្ចរបស់លោកនៅតំបន់ស៊ីនជាំង។ ជាទស្សនកិច្ចគាំទ្រប៉ូលិសក្នុងយុទ្ធនាការប្រឆាំងអំពើភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៧
វេបសៃត៍ចិន Weibo បានបង្ហាញរូបភាពឈាម វ៉ាលីស និងកំទេចកំទីជាច្រើន នៅពីមុខស្ថានីយរថភ្លើង ដែលរងការផ្ទុះគ្រាប់បែក ថ្ងៃពុធនេះ នៅស្ថានីយរថភ្លើង ក្រុងUrumqi ក្នុងតំបន់ស្វ័យតស៊ីនជាំង ភាគខាងលិចប្រទេសចិន។ ការផ្ទុះនេះ កើតឡើងចំពេលដែលប្រធានាធិបតីចិន ស៊ី ជីនពីង បញ្ចប់ទស្សនកិច្ចរយៈពេល៤ថ្ងៃរបស់លោក ក្នុងតំបន់។ ក្នុងទស្សនកិច្ចនេះ លោកស៊ី ជីនពីងបានសុំអោយប៉ូលិស ចាត់វិធានការប្រយុទ្ធអំពើភេរវកម្មអោយមានប្រសិទ្ធភាពខ្លាំងក្លា។
នេះមិនមែនជាលើកទី១នោះទេ ដែលតំបន់ស្វ័យតស៊ីនជាំងភាគខាងលិចប្រទេសចិន រងអំពើហិង្សា និងភាពចលាចល។ ក្នុងខែមិនាកន្លងទៅ ស្ថានីយរថភ្លើងមួយកន្លែងនៅគុនមីង បានរងការវាយប្រហារដោយក្រុមប្រដាប់អាវុធ ដែលបានចូលទៅចាក់សម្លាប់អ្នកដំណើរ ធ្វើអោយមានមនុស្សស្លាប់២៩នាក់ និងរបួស១៤០នាក់ផងដែរ។ ជាង១ឆ្នាំមកនេះ អំពើហិង្សាក្នុងតំបន់ស៊ីនជាំង បានសម្លាប់មនុស្សរាប់រយនាក់។ រដ្ឋាភិបាលចិនតែងទំលាក់កំហុសនៃអំពើហិង្សាទាំងនេះ លើសកម្មជនផ្តាច់ទឹកដីនិយមកាន់សាសនាអ៊ីស្លាម ជនជាតិអ៊ុយហ្គួ។ យោងតាមអង្គការសិទ្ធិមនុស្សនានា ភាពចលាចលក្នុងតំបន់ ភាគច្រើនគឺបង្កឡើងដោយសារតែរដ្ឋាភិបាលបានដាក់នយោបាយតឹងរ៉ឹងប្រឆាំងជនជាតិអ៊ុយហ្គួ។ ជនជាតិអ៊ុយហ្គួ តែងចោទរដ្ឋាភិបាលចិនថា បានគាបសង្កត់វប្បធម៌ ប្រពៃណី និងសាសនារបស់ពួកគេ។
ក្រោយអំពើហិង្សាសម្លាប់មនុស្សនៅស្ថានីយរថភ្លើងនៅគុនមីង និងហេតុការណ៍រថយន្តបើកបុកទីលានធានអានមេន ក្រុងប៉េកាំង ក្នុងខែតុលា ឆ្នាំ២០១៣ អាជ្ញាធរចិនបានធ្វើការពង្រឹងសន្តិសុខយ៉ាងតឹងរ៉ឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ