ប្រធានាធិបតីចិនចុះទៅទស្សនកិច្ចតំបន់ស្វ័យតស៊ីនជាំង
នៅល្ងាចថ្ងៃចន្ទ ម្សិលមិញ សារព័ត៌មានរដ្ឋចិនបានចុះផ្សាយពីដំណើរទស្សនកិច្ចរបស់ប្រធានាធិបតីចិន ស៊ី ជីនពីង នៅតំបន់ស្វ័យតស៊ីនជាំង ស្ថិតនៅភាគខាងលិចប្រទេសចិន។ នៅស៊ីនជាំង អាជ្ញាធរតែងចោទជនជាតិអ៊ុយហ្គួ កាន់សាសនាអ៊ីស្លាមថា បានបង្កហិង្សាផ្តាច់ទឹកដី។ក្នុងទស្សនកិច្ចនៅស៊ីនជាំង លោកស៊ី ជីនពីងបានសង្កត់ធ្ងន់លើតួនាទីរបស់ប៉ូលិសក្នុងការប្រយុទ្ធប្រឆាំងអំពើភេរវកម្ម និងសុំអោយប៉ូលិសចាត់វិធានការមានប្រសិទ្ធភាព ដើម្បីប្រយុទ្ធអំពើភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២១
ទស្សនកិច្ចនៅតំបន់ស្វ័យតស៊ីនជាំង ភាគខាងលិចប្រទេសចិន ជាទស្សនកិច្ចលើកទី១ របស់ប្រធានាធិបតី ស៊ី ជីនពីង គិតចាប់ពីពេលដែលគណៈកម្មាធិការមជ្ឈិមបក្សកុម្មុយនិស្តចិន បានសម្រេចចិត្តបង្កើតគណៈកម្មាធិការមួយ កាលពីខែវិច្ឆិកា ឆ្នាំ២០១៣ ដើម្បីប្រយុទ្ធនឹងការគំរាមកំហែងសន្តិសុខផ្ទៃក្នុង និងក្រៅប្រទេស។
ក្នុងដំណើរទស្សនកិច្ចនៅស៊ីនជាំង ប្រធានាធិបតីចិនបានសុំអោយប៉ូលិសចាត់វិធានការមានប្រសិទ្ធភាពដើម្បីប្រយុទ្ធអំពើភេរវកម្ម។ លោកស៊ី ជីនពីង លើកឡើងទៅកាន់ប៉ូលិសថា អ្នកទាំងអស់គ្នាត្រូវតែមានមធ្យោបាយដ៏មានប្រសិទ្ធភាពបំផុត ដើម្បីប្រឆាំងក្រុមភេរវជនឃោរឃៅ។
គួររំលឹកថា អាជ្ញាធរតំបន់ស្វ័យតស៊ីនជាំង តែងចោទជនជាតិភាគតិចកាន់សាសនាអ៊ីស្លាម អ៊ុយហ្គួ ថាបានបង្កហិង្សាផ្តាច់ទឹកដី។ កាលពីខែមិនា តំបន់ភាគខាងលិចបានរងអំពើហិង្សាគួរអោយកត់សម្គាល់។ នៅស្ថានីយរថភ្លើងមួយកន្លែង មនុស្សមួយក្រុមបានប្រើកាំបិត វាយប្រហារអ្នកដំណើរ សម្លាប់មនុស្ស២៩នាក់ និងធ្វើអោយរបួស១៤០នាក់។
នៅស៊ីនជាំង គិតមួយឆ្នាំមកនេះ ភាពចលាចលបានធ្វើអោយមនុស្សជាងមួយរយនាក់ ស្លាប់បាត់បង់ជីវិត។ រដ្ឋាភិបាលទំលាក់កំហុសទៅលើក្រុមអ្នកកាន់សាសនាអ៊ីស្លាមជនជាតិអ៊ុយហ្គួរ ផ្តាច់ទឹកដីនិយមនៅទីនោះ។ ជនជាតិអ៊ុយហ្គួរតែងចោទរដ្ឋាភិបាលចិនថាមិនបានរាប់បញ្ចូលពួកគេក្នុងទិសដៅអភិវឌ្ឍន៍សេដ្ឋកិច្ចក្នុងប្រទេស អោយបានដូចជាជនជាតិហានចិននោះទេ។
ដោយឡែក ក្នុងទស្សនកិច្ចនៅស៊ីនជាំង ប្រធានាធិបតីចិន ហាក់បានបង្ហាញបំណងផ្សះផ្សារួបរួមជាតិ ដោយបានជំរុញលើកទឹកចិត្តអោយនិស្សិតទាំងឡាយ រៀនពីរភាសា គឺភាសាជនជាតិអ៊ុយហ្គួ និងភាសាចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ