មេទ័ពចិនទៅបំពេញទស្សនកិច្ចនៅអាមេរិកចំពេលកំពុងមានភាពតានតឹងនៅសមុទ្រចិនខាងត្បូង
ប្រមុខដឹកនាំកងទ័ពចិនចាប់ផ្តើមដំណើរទស្សនកិច្ចរយៈពេល ៤ថ្ងៃ នៅសហរដ្ឋអាមេរិក ដោយចាប់ផ្តើមពីថ្ងៃអង្គារនេះ។ ក្រសួងការពារជាតិអាមេរិកបានឲ្យដឹងថា ដំណើរទស្សនកិច្ចនេះ ធ្វើឡើងក្នុងគោលដៅពង្រឹងទំនាក់ទំនងយោធារវាងប្រទេសទាំងពីរ ក៏ប៉ុន្តែ គេឃើញថា ដំណើរទស្សនកិច្ចនេះកើតមានឡើង នៅចំពេលដែលអាមេរិក និងចិនកំពុងប៉ះពាក្យសម្តីគ្នា ជុំវិញជម្លោះ នៅក្នុងតំបន់សមុទ្រចិនខាងត្បូង។
ចុះផ្សាយនៅថ្ងៃ៖
ស្តាប់ - ០២:០០
ឧត្តមសេនីយ៍ ហ្វាង ហ្វេងហ៊ុយ (Fang Fenghui) នាយអគ្គសេនាធិការកងទ័ពចិន ចាប់ផ្តើមដំណើរទស្សនកិច្ច រយៈពេល ៤ថ្ងៃរបស់លោក ដោយធ្វើដំណើរទៅមូលដ្ឋានទ័ពជើងទឹកដ៏ធំមួយរបស់អាមេរិក ស្ថិតនៅទីក្រុង San Diego (កាលីហ្វ័រញ៉ា)។ មូលដ្ឋានទ័ព San Diego នេះ គឺជាផ្នែកមួយនៃកងទ័ពជើងទឹកអាមេរិកប្រចាំតំបន់ប៉ាស៊ីហ្វិក ដែលលោកអូបាម៉ាចង់ពង្រឹង ដើម្បីបង្កើនឥទ្ធិពលអាមេរិក នៅអាស៊ី។
នៅ San Diego ឧត្តមសេនីយ៍ ហ្វាង ហ្វេងហ៊ុយ នឹងចូលទៅមើលនាវាចម្បាំងទំនើបៗមួយចំនួនរបស់អាមេរិក ក្នុងនោះ ក៏រួមមានទាំង នាវាផ្ទុកយន្តហោះ Ronald Reagan ផងដែរ។ គួររំឭកថា លោក Chuck Hagel រដ្ឋមន្រ្តីក្រសួងការពារជាតិអាមេរិក ក៏ធ្លាប់បានធ្វើដំណើរទៅមើលនាវាផ្ទុកយន្តហោះចិន (Liaoning) ម្តងដែរ នៅពេលលោកទៅបំពេញទស្សនកិច្ច នៅក្នុងប្រទេសចិន កាលពីខែមេសាកន្លងទៅនេះ។
នៅថ្ងៃព្រហស្បតិ៍ ឧត្តមសេនីយ៍ ហ្វាង ហ្វេងហ៊ុយ នឹងត្រូវជួបជជែកជាមួយសមភាគីរបស់លោក គឺឧត្តមសេនីយ៍ Martin Dempsey នៅឯក្រសួងការពារជាតិអាមេរិក នៅវ៉ាស៊ីងតោន ដែលនៅទីនោះ ប្រមុខដឹកនាំកងទ័ពចិននឹងត្រូវគេរៀបចំពិធីទទួល ក្នុងកិត្តិយសដ៏ខ្ពង់ខ្ពស់បំផុត។
យោងតាមក្រសួងការពារជាតិអាមេរិក ដំណើរទស្សនកិច្ចរបស់ប្រមុខដឹកនាំកងទ័ពចិន នៅអាមេរិកពេលនេះ ធ្វើឡើងក្នុងគោលដៅពង្រឹងទំនាក់ទំនង រវាងកងទ័ពនៃប្រទេសទាំងពីរ។ ទំនាក់ទំនង ដែលកំពុងស្ថិតក្នុងភាពតានតឹង ក្រោយពីប្រទេសទាំងពីរបានប៉ះពាក្យសម្តីគ្នាខ្លាំង ជុំវិញជម្លោះ នៅសមុទ្រចិនខាងត្បូង។
នៅក្នុងកិច្ចសន្ទានាតាមទូរស័ព្ទ កាលពីថ្ងៃចន្ទម្សិលមិញ លោកចន ឃែរី រដ្ឋមន្រ្តីក្រសួងការបរទេសអាមេរិកបានប្រាប់ទៅសមភាគីចិន គឺលោក វ៉ាង អ៊ី (Wang Yi) ថា ការណ៍ដែលចិនបញ្ជូននាវាទៅខួងបូមប្រេងក្រោមបាតសមុទ្រ ក្នុងតំបន់ជាប់ជម្លោះជាមួយវៀតណាម វាគឺជា “ទង្វើបង្កហេតុ” ដែលគួរឲ្យព្រួយបារម្ភ ហើយបានជំរុញឲ្យភាគីជម្លោះ ស្វែងរកដំណោះស្រាយដោយសន្តិវិធី តាមរយៈការចរចា ដោយឈរលើច្បាប់អន្តរជាតិ។
ក៏ប៉ុន្តែ ចិនបានរិះគន់តបមកវិញថា ទង្វើបង្កហេតុ ពិតជាកើតមានមែន នៅសមុទ្រចិនខាងត្បូង តែមិនមែនមកពីខាងចិននោះទេ គឺមកពីភាគីជម្លោះផ្សេងទៀត ហើយថា វាគឺជាកំហុសរបស់សហរដ្ឋអាមេរិក ដែលជាអ្នកលើកទឹកចិត្តឲ្យសម្ព័ន្ធមិត្តរបស់ខ្លួនធ្វើសកម្មភាពបង្កហេតុអស់ទាំងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ