ទស្សនកិច្ចប្រមុខការពារជាតិអាមេរិក ឆាក់ ហាហ្កែល នៅឥណ្ឌា
នៅថ្ងៃសុក្រនេះ ប្រមុខការពារជាតិអាមេរិកឆាក់ ហាហ្កែល បានបំពេញទស្សនកិច្ច នៅឥណ្ឌា ជួបនាយករដ្ឋមន្ត្រីឥណ្ឌា ណារេនដ្រា ម៉ូឌី។ ទិសដៅនៃទស្សនកិច្ចរបស់លោកហាហ្កែល ផ្តោតលើអាវុធយុទ្ធភណ្ឌ និងកិច្ចសហប្រតិបត្តិការយោធារវាងអាមេរិកនិងឥណ្ឌា។
ចុះផ្សាយនៅថ្ងៃ៖
ស្តាប់ - ០១:៣៩
ទិសដៅនៃទស្សនកិច្ចរបស់ប្រមុខការពារជាតិអាមេរិក ឆាក់ ហាហ្កែល នៅឥណ្ឌា គឺដើម្បីធ្វើអោយអាមេរិកក្លាយជាដៃគូរបស់ឥណ្ឌា ក្នុងដំណើរការទំនើបភាវូបនីយកម្មកងទ័ពឥណ្ឌា។ ឥណ្ឌាត្រូវការពង្រឹងឧស្សាហកម្មយោធា ព្រោះសម្ភារៈយោធាឥណ្ឌាសព្វថ្ងៃ ជាសម្ភារៈតាំងពីជំនាន់សហភាពសូវៀត។ យោងតាមសារព័ត៌មានជាភាសាអង់គ្លេសឈ្មោះ Hindustan Times អាមេរិកចង់ស្នើអោយឥណ្ឌាព្រមធ្វើការផលិតនិងអភិវឌ្ឈន៍មីស៊ីលបាញ់រថក្រោះ រួមគ្នាជាមួយអាមេរិក ហើយពេលនេះ ឥណ្ឌាកំពុងចង់ទិញមីស៊ីលបាញ់រថក្រោះ ៣៦០០ដើម និងជើងទ្រមីស៊ីល ៩០០គ្រឿង ក្នុងទឹកប្រាក់៧០០លានដុល្លារ។
គួររំលឹកថា កន្លងមក កិច្ចព្រមព្រៀងយោធាមួយចំនួន រវាងអាមេរិកនិងឥណ្ឌា ត្រូវបានរាំងស្ទះ ដោយសារតែ ឥណ្ឌាជាប់សង្ស័យពីបទពុករលួយ សូកប៉ាន់។ អាមេរិកនិងឥណ្ឌាមានការឃ្នើសចិត្តនឹងគ្នា លើប្រធានបទទាក់ទងនុយក្លេអ៊ែរស៊ីវិល និងសេរីភាពផ្នែកពាណិជ្ជកម្ម។ ជាក់ស្តែង កាលពីឆ្នាំ២០០៨ អាមេរិកនិងឥណ្ឌាបានចុះកិច្ចព្រមព្រៀងផ្នែកនុយក្លេអ៊ែរជាមួយគ្នា។ ប៉ុន្តែ កិច្ចព្រមព្រៀងនេះមិនត្រូវបានអនុវត្តទេ ព្រោះច្បាប់ឥណ្ឌាបានដាក់កំហិតអោយផ្នែកសាងសង់មជ្ឈមណ្ឌលនុយក្លេអ៊ែរ បង់ប្រាក់ពិន័យធ្ងន់ធ្ងរ ករណីមានគ្រោះថ្នាក់ក្នុងដំណើរការសាងសង់។ អាមេរិកមិនយល់ស្របច្បាប់នេះទេ។
កាលពីថ្ងៃព្រហស្បតិ៍ រដ្ឋាភិបាលឥណ្ឌាបានបន្ធូរបន្ថយច្បាប់និងបទបញ្ជាផ្សេងៗក្នុងផ្នែកឧស្សាហកម្មការពារជាតិ ដើម្បីទាក់ទាញនិងជួយអ្នកវិនិយោគបរទេស។
ប៉ុន្មានឆ្នាំចុងក្រោយនេះ អាមេរិកនិងឥណ្ឌា បានប្រញាប់សហប្រតិបត្តិការយោធានឹងគ្នាឡើងវិញ ទោះជាមិនសូវត្រូវរ៉ូវគ្នាកន្លងមកក្តី។ ក្នុងពេលឆាប់ៗខាងមុខ ឥណ្ឌានឹងទទួលបានឧទ្ធម្ភាគចក្រចំបាំងពីអាមេរិកយ៉ាងហោច២២គ្រឿង ប្រភេទ Apache និងឧទ្ធម្ភាគចក្រដឹកជញ្ជូនយោធាប្រភេទChinook ១៥គ្រឿង។ ឧទ្ធម្ភាគចក្រទាំងអស់នេះ មានតម្លៃជាទឹកប្រាក់ ១ពាន់៤រយលានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ