ឥណ្ឌាកោះហៅអ្នកការទូតអាមេរិក តវ៉ារឿងចារកិច្ចអាមេរិកលួចស្តាប់ការសន្ទនាគណបក្សកាន់អំណាចឥណ្ឌា
ក្រសួងការបរទេសឥណ្ឌាបានប្រកាសថ្ងៃពុធនេះថា ឥណ្ឌាបានកោះហៅអ្នកការទូតជាន់ខ្ពស់អាមេរិកមួយរូប នៃស្ថានទូតអាមេរិកប្រចាំក្រុងញូវដេល្លីអោយមកជួប ដើម្បីតវ៉ាប្រឆាំងនឹងផ្នែកចារកិច្ចអាមេរិកដែលបានលួចស្តាប់ការសន្ទនារបស់គណបក្សជាតិហិណ្ឌូ ជាបក្សកាន់អំណាចនៅឥណ្ឌា។ ឥណ្ឌាទាមទារអោយអាមេរិកផ្តល់ចម្លើយពិតប្រាកដទាក់ទងរឿងរ៉ាវនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
យោងតាមឯកសារដែលកាសែតវ៉ាស៊ីនតោនប៉ុស្តិ៍ទទួលបានពីលោក Edward Snowden ជាអតីតបុគ្គលិកទីភ្នាក់ងារសេអ៊ីអា និងទីភ្នាក់ងារសន្តិសុខជាតិអាមេរិក NSA ទីភ្នាក់ងារចារកិច្ចអាមេរិកNSAអាមេរិក បានទទួលការអនុញ្ញាតផ្លូវច្បាប់ កាលពីឆ្នាំ២០១០ អោយស៊ើបការណ៍ លួចស្តាប់ការ សន្ទនា ក្នុងរដ្ឋចំនួន១៩៣ ពិសេសត្រូវលួចស្តាប់ការសន្ទនារបស់គណបក្សកាន់អំណាចរបស់នាយករដ្ឋមន្ត្រីឥណ្ឌា ណារិនដ្រា ម៉ូឌី ដែលទើបឡើងគ្រប់គ្រងប្រទេស កាលពីចុងខែឧសភាកន្លងទៅ។
រដ្ឋាភិបាលឥណ្ឌាបានកោះហៅអ្នកការទូតអាមេរិកជាន់ខ្ពស់ នៃស្ថានទូតអាមេរិក ប្រចាំក្រុងញូវដេល្លី អោយមកបំភ្លឺរឿងរ៉ាវនេះ។ ឥណ្ឌាបានទាមទារអោយអាមេរិកចៀសវាង មិនអោយរឿងរ៉ាវនេះ កើតឡើងសាជាថ្មីទៀតនៅពេលខាងមុខ។ ឥណ្ឌាធ្លាប់តវ៉ាអាមេរិក២ដងហើយ ទាក់ទងរឿងលួចស្តាប់ការសន្ទនានេះ។ គឺកាលពីខែកក្កដា និងវិច្ឆិកាឆ្នាំ២០១៣ ក្រោយពេលទទួលព័ត៌មានថា អាមេរិកបានលួចស្តាប់ការសន្ទានារបស់ផ្នែកការទូតឥណ្ឌានៅអង្គការសហប្រជាជាតិ ក្រុងញូវយក។ ឥណ្ឌាចង់អោយរដ្ឋាភិបាលអាមេរិកផ្តល់ចម្លើយពិតប្រាកដ ព្រោះថា កន្លងមក ពេលឥណ្ឌាសួរ អាមេរិកតែងប្រាប់ថា អាចចែករំលែកព័ត៌មានទាក់ទងកម្មវិធីលួចស៊ើបការណ៍របស់អាមេរិក តែឥណ្ឌាមិនដែលបានទទួលព័ត៌មានអ្វីលើសពីនេះទេ។
ការប៉ះទង្គិចការទូតរវាងឥណ្ឌានិងអាមេរិកពេលនេះ កើតឡើងខណៈប្រមុខការទូតអាមេរិក ចន ឃែររី ត្រូវចុះមកទស្សនកិច្ចឥណ្ឌា ក្នុងពេលប៉ុន្មានខែខាងមុខនេះ ដើម្បីជួបពិភាក្សាជាមួយសមាជិករដ្ឋាភិបាលរបស់លោក ណារិនដ្រា ម៉ូឌី។
ពេលនេះ ក្នុងពេលស្ថានទូតអាមេរិក ប្រចាំក្រុងញូវដេល្លី កំពុងរង់ចាំឯកអគ្គរដ្ឋទូតថ្មី លោកស្រី kathleen stephens ខាធ្លីន ស្តេហ្វិន ជាអ្នកទទួលបន្ទុកកិច្ចការស្ថានទូតអាមេរិក។ ដូច្នេះ ស្ថានទូតអាមេរិកនៅក្រុងញូវដេល្លី នៅមិនទាន់អាចធ្វើអត្ថាធិប្បាយពីទំនាក់ទំនងការទូតទ្វេភាគីជាមួយឥណ្ឌាបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ