មន្ត្រីដោះមីនពីរនាក់ស្លាប់ដោយសារការផ្ទុះគ្រាប់សល់ពីសម័យសង្គ្រាម
គ្រាប់កាំភ្លើងសល់ពីសម័យសង្គ្រាមបានផ្ទុះ កាលពីព្រឹកមិញ នៅក្នុងខេត្តកំពង់ស្ពឺ សម្លាប់មន្ត្រីដោះមីនចំនួនពីរនាក់ និងម្នាក់របួសធ្ងន់។ មន្ត្រីជំនាញសន្និដ្ឋានជាដំបូងថា ការផ្ទុះនេះគឺអាចបណ្ដាលមកពីគ្រាប់ធ្លាក់លើគ្នា ឬកកិតគ្នា នៅពេលមន្ត្រីដោះមីនរុះរើគ្រាប់ទាំងនេះនៅកន្លែងស្តុកទុក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
មន្ត្រីមជ្ឈមណ្ឌលកំចាត់មីនកម្ពុជា ហៅកាត់ថា (CMAC) ចំនួនពីរនាក់ បានបង់ជីវិត និងម្នាក់របួសធ្ងន់នៅក្នុងឧប្បត្តិហេតុផ្ទុះគ្រាប់កាំភ្លើងសល់ពីសម័យសង្គ្រាម នៅក្នុងក្រុងច្បារមន ខេត្តកំពង់ស្ពឺ កាលពីវេលាម៉ោង១០ព្រឹកមិញនេះ។
មន្ត្រី CMAC ម្នាក់ស្លាប់នៅនឹងកន្លែងកើតហេតុ ម្នាក់ទៀតបាត់បង់ជីវិត នៅពេលដឹកមកដល់មន្ទីរពេទ្យខេត្តកំពង់ស្ពឺ និងម្នាក់ទៀត ដែលស្ថិតនៅក្នុងស្ថានភាពធ្ងន់ធ្ងរ ត្រូវបានគេដឹកមកសង្គ្រោះបន្ទាន់ នៅក្នុងមន្ទីរពេទ្យទីក្រុងភ្នំពេញ។ នេះគឺជារបាយការណ៍ដែលផ្តល់ដោយស្នងការនគរបាលខេត្តកំពង់ស្ពឺ និងអគ្គនាយកមជ្ឈមណ្ឌលកំចាត់មីនកម្ពុជា (CMAC)។
លោក ហេង រតនា អគ្គនាយកមជ្ឈមណ្ឌលកំចាត់មីនកម្ពុជា (CMAC) បានបញ្ជាក់ប្រាប់តាមទូរស័ព្ទ នៅថ្ងៃសៅរ៍នេះ ក្រោយឧប្បត្តិហេតុបន្តិចថា តាមពិតអ្នកស្លាប់មានចំនួនតែពីរនាក់ទេ ពោលគឺ មិនមែន៣នាក់ដូចសេចក្តីរាយការណ៍ដំបូងនោះទេ។ មន្ត្រីទីបីដែលរងរបួសធ្ងន់ត្រូវបានគេជួយសង្គ្រោះនៅមន្ទីរពេទ្យទីក្រុងភ្នំពេញ។
លោក ហេង រតនា បានបញ្ជាក់ទៀតថា ការផ្ទុះនេះអាចបណ្ដាលមកពីគ្រាប់ចាស់ៗប៉ះទង្គិចគ្នា ឬកកិតគ្នា នៅពេលពួកគាត់បានលើកតម្រៀបដាក់លើគ្នា នៅក្នុងឃ្លាំងស្តុក ដើម្បីត្រៀមកំទេចចោលនាពេលខាងមុខនេះ។ នេះគ្រាន់តែការសន្និដ្ឋានបឋមនៅឡើយទេ រីឯការស៊ើបអង្កេតរកមូលហេតុពិតប្រាកដបានចាប់ផ្ដើមហើយ។
លោក កែវ ពិសី ស្នងការនគរបាលខេត្តកំពង់ស្ពឺបានបញ្ជាក់ប្រាប់នៅថ្ងៃនេះដែរថា នេះគឺជាការផ្ទុះចៃដន្យ ដែលបង្កឡើងដោយការធ្លាក់ ឬការប៉ះទង្គិចពេលមន្ត្រីទាំងនោះរៀបចំគ្រាប់ ពោលគឺ មិនមានការលួចដុត ឬទង្វើផ្ដេសផ្ដាសពីជនខិលខូចនោះទេ។ លោកស្នងការបានបន្តទៀតថា ការផ្ទុះបានកើតឡើងមួយរយៈខ្លីប៉ុណ្ណោះហើយក៏ត្រូវបានចប់ទៅវិញ។
នៅក្នុងប្រទេសកម្ពុជា ជារឿយៗ ប្រជាជនខ្មែរតែងតែរងគ្រោះដោយសារគ្រាប់មីន និងគ្រាប់មិនទាន់ផ្ទុះសល់ពីសម័យសង្គ្រាម។ ចាប់តាំងពីឆ្នាំ១៩៧៩មកដល់ពេលនេះ ប្រជាជនខ្មែរប្រមាណជា៦ម៉ឺននាក់បានទទួលរងរបួសនិងស្លាប់ដោយសារគ្រាប់មីន និងគ្រាប់មិនទាន់ផ្ទុះសល់ពីសម័យសង្គ្រាមស៊ីវិល។ ប្រទេសកម្ពុជានៅមានផ្ទៃដីប្រមាណជា ៦៤៨គីឡូម៉ែត្រក្រឡាទៀត ដែលគេសង្ស័យថានៅមានគ្រាប់មីនមិនទាន់ផ្ទុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ