អាកាសធាតុត្រជាក់ខ្លាំងធ្វើឲ្យជនជាតិអឺរ៉ុបស្លាប់ជិត៣០០នាក់
អាកាសធាតុត្រជាក់ខ្លាំងនៅប្រទេសបារាំងចាប់តាំងពីមួយសប្តាហ៍មកហើយនោះ បានបណ្តាលឲ្យមនុស្សស្លាប់ចំនួន៤នាក់ក្នុងចំណោមនោះមានជនឥតលំនៅឋានម្នាក់បានស្លាប់កាលពីថ្ងៃសៅរ៍ចុងសប្តាហ៍កន្លងទៅនេះ ដោយហេតុសីតុណ្ហភាពក្នុងសព៌ាង្គកាយស្រុតចុះក្រោមកំរិតធម្មតាគឺ៣៧អង្សា។ សីតុណ្ហភាពត្រជាក់នេះទំនងជាបានអន់បន្តិចមកវិញនៅព្រឹកថ្ងៃចន្ទ៦កុម្ភៈ ហើយឥឡូវនេះ មានតែខេត្តខ័ណ្ឌចំនួន៣៩ប៉ុណ្ណោះដែលត្រូវបានប្រកាសដាក់ក្នុងកំរិតភាពអាសន្នធម្មតាទល់នឹងចំនួន ៤៣ កាលពីប៉ុន្មានម៉ោងមុននេះ៕
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
នៅប្រទេសបារាំង តំបន់ មួយចំនួនធំ និង ខេត្តខ័ណ្ឌផ្សេងៗទៀត ត្រូវបានប្រកាសដាក់ក្នុងកំរិតភាពអាសន្នធម្មតា ។
យោងតាម ក្រសួងឧតុនិយមបារាំង នៅខេត្តខ័ណ្ឌទាំងអស់ដែលត្រូវបានប្រកាសដាក់ក្នុងភាពប្រុងប្រយ័ត្នអាកាសធាតុត្រជាក់ខ្លាំងបំផុត សីតុណ្ហភាពនៅតែស្រុតចុះយ៉ាងខ្លាំងនៅចុងសប្តាហ៍កន្លងទៅនេះ គឺ ពីចន្លោះ ១៩ ទៅ ១៥ អង្សា ក្រោមសូន្យ ថែមទាំងមានខ្យល់ត្រជាក់បក់មកជាមួយផង។
នៅយប់ថ្ងៃចន្ទ៦កុម្ភៈឆ្លងទៅថ្ងៃអង្គារ៧កុម្ភៈស្អែក អាកាសធាតុត្រជាក់ខ្លាំងបំផុតនឹង មានជាថ្មីឡើងវិញ ដូចតាមការបញ្ជាក់ច្បាស់លាស់នៃក្រសួងឧតុនិយមបារាំងដែរ ដែលបន្តការប្រកាសដាក់កំរិតភាពអាសន្នធម្មតា នៅក្នុងអំឡុងពេលប៉ុន្មានថ្ងៃខាងមុខទៀត។
អាកាសធាតុត្រជាក់ខ្លាំងនៅប្រទេសបារាំងនេះ បានបណ្តាលឲ្យស្លាប់មនុស្សចំនួន ៤នាក់ ក្នុងនោះ ជនឥតលំនៅឋាន២នាក់ ( ម្នាក់នៅតំបន់ Val-de-Marne) និង(ម្នាក់ទៀតនៅតំបន់ Oise) ដោយគាំងបេះដូង បណ្តាលមកពីសីតុណ្ហភាពក្នុងសព៌ាង្គកាយស្រុតចុះក្រោមកំរិតធម្មតាគឺ៣៧អង្សាក៏ព្រមទាំងកុមារម្នាក់អាយុ១១ឆ្នាំ (Voges) ដោយហេតុបានរត់លេងលើបឹងទឹកកកមួយដែលបានបាក់ស្រុត។
នៅថ្ងៃនេះ ការដឹកជញ្ជូនសិស្សានុសិស្ស ដោយរថយន្តធំៗ និងរថយន្តក្រុងត្រូវផ្អាកសកម្មភាពនៅតំបន់មួយភាគធំក្នុងភាគខាងលិចប្រទេសបារាំង ចាប់តាំងពី តំបន់ Aquitaineទៅ Pas-de-Calais រហូតដល់ Yvelinesក៏ព្រមទាំងតំបន់ Midi –Pyrénées និងតំបន់ Audeផងដែរ។
នៅអឺរ៉ុប ខាងកើត អាកាសធាតុត្រជាក់ ធ្លាក់ចុះ យ៉ាងខ្លាំង ក្នុងកំរិត៣០អង្សាក្រោមសូន្យនៅ អ៊ុយក្រែន និង២២ អង្សាក្រោមសូន្យនៅប៉ូឡូញ ។នៅ ទីក្រុងធំៗ ជាច្រើន សកម្មភាពទូទៅជាច្រើន ត្រូវរាំងស្ទះ ដោយហេតុទឹកភ្លៀងនិងទឹកកកសំឡីធ្លាក់យ៉ាងខ្លាំង។ ចំណែក ជនរងគ្រោះនៅអឺរ៉ុបដោយ ហេតុ អាកាសធាតុ ត្រជាក់ខ្លាំង មានជិត ៣០០នាក់ ក្នុងនោះ ១៨៤នាក់នៅអ៊ុយក្រែននិងប៉ូឡូញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ