បញ្ហាចម្រូងចម្រាសនៅអាមេរិកជុំវិញវិធានការទប់ស្កាត់មេរោគអេបូឡា
ចុះផ្សាយនៅថ្ងៃ៖
ស្តាប់ - ០៥:០៤
នៅសហរដ្ឋអាមេរិក បញ្ហាចម្រូងចម្រាសបានកើតឡើងតាំងពីប៉ុន្មានថ្ងៃមកហើយ ជុំវិញវិធានការតឹងរ៉ឹងរបស់រដ្ឋមួយចំនួន ទៅលើអ្នកធ្វើដំណើរមកពីតំបន់អាហ្វ្រិកខាងលិច ជាពិសេសបុគ្គលិកពេទ្យ ដែលវិលត្រឡប់ពីជួយព្យាបាលអ្នកជំងឺអេបូឡា។ រដ្ឋខ្លះបានបន្ធូរបន្ថយវិធានការនេះវិញ ក្រោយពីទទួលរងនូវការរិះគន់ និងការដាក់សម្ពាធពីសំណាក់សេតវិមាន។
វិធានការដ៏តឹងរ៉ឹង ដាក់ចេញដោយអភិបាលរដ្ឋចំនួន New York រដ្ឋ New Jersey និងរដ្ឋ Illinois ហើយដែលចាប់អនុវត្តតាំងពីថ្ងៃសុក្រ ២៤តុលាកន្លងទៅនេះ ត្រូវធ្វើទៅលើអ្នកដំណើរពីតំបន់អាហ្វ្រិកខាងលិច ដែលមេរោគអេបូឡាកំពុងតែរីករាលដាលខ្លាំង។ យោងតាមបទបញ្ជារបស់អភិបាលរដ្ឋទាំង ៣ នេះ គ្រប់អ្នកដំណើរទាំងអស់ ពីអាហ្វ្រិកខាងលិច នឹងត្រូវគេចាំស្ទាក់ចាប់ នៅព្រលានយន្តហោះ រួចហើយដាក់ឲ្យដាច់ពីគេ ក្នុងរយៈពេល ២១ថ្ងៃ បើទោះបីជាអ្នកនោះមាន ឬគ្មានរោគសញ្ញាដែលនាំឲ្យគេសង្ស័យថាឆ្លងមេរោគអេបូឡាក៏ដោយ។
វិធានការនេះធ្វើឲ្យមានការរិះគន់យ៉ាងខ្លាំង ទាំងពីសំណាក់អ្នកជំនាញខាងមេរោគអេបូឡា ក៏ដូចជា ពីសំណាក់រដ្ឋាភិបាលរបស់លោកអូបាម៉ា។
អ្នករិះគន់បានលើកឡើងថា វិធានការចាប់បង្ខំគ្រប់អ្នកដំណើរពីតំបន់មានមេរោគអេបូឡា សូម្បីតែអ្នកគ្មានរោគសញ្ញាសង្ស័យ ដាក់ឲ្យនៅដាច់តែឯងរយៈពេល ២១ថ្ងៃ គឺជាការធ្វើជ្រុលហួសហេតុ ហើយជាវិធានការដែលធ្វើទៅតាមអារម្មណ៍ភ័យខ្លាចជាជាងផ្អែកទៅលើវេជ្ជសាស្រ្ត។ យោងតាមអ្នកជំនាញខាងមេរោគអេបូឡា អ្នកជំងឺដែលមិនទាន់ចេញរោគសញ្ញាមិនទាន់អាចចម្លងមេរោគអេបូឡាទៅអ្នកដទៃបាននោះទេ។ ម្យ៉ាងទៀត មេរោគអេបូឡាក៏មិនមែនអាចឆ្លងងាយៗដែរ ពោលគឺ ទាល់តែមានការប៉ះពាល់អ្នកជំងឺដោយផ្ទាល់ទើបអាចឆ្លង។
រដ្ឋាភិបាលរបស់លោកអូបាម៉ាវិញបានបង្ហាញនូវក្តីបារម្ភថា វិធានការដាក់ចេញដោយរដ្ឋ ទាំង ៣ខាងលើនេះ អាចនឹងធ្វើឲ្យប៉ះពាល់ដល់បុគ្គលិកពេទ្យ ដែលបានប្រថុយនឹងគ្រោះថ្នាក់ ស្ម័គ្រចិត្តទៅជួយប្រទេសមានមេរោគអេបូឡា ក៏ប៉ុន្តែ នៅពេលដែលវិលត្រឡប់មកអាមេរិកវិញ បែរជាត្រូវគេចាប់ទុកឲ្យនៅដាច់ពីគេដល់ទៅ ៣សប្តាហ៍ សូម្បីតែពួកគេគ្មានរោគសញ្ញាអេបូឡាសោះ។ វិធានការដ៏តឹងរ៉ឹងនេះអាចនឹងធ្វើឲ្យបុគ្គលិកពេទ្យស្ម័គ្រចិត្តទៅអាហ្វ្រិកអាចនឹងត្រូវថយចុះ នៅក្នុងពេលដែលគេកំពុងតែត្រូវការពួកគេខ្លាំង។
បញ្ហាចម្រូងចម្រាសបានកើតមានឡើងកាន់តែខ្លាំង ក្រោយពីបុគ្គលិកពេទ្យម្នាក់ ឈ្មោះ Kaci Hickox ដែលទើបនឹងមកពីធ្វើការនៅអាហ្វ្រិកខាងលិច ហើយត្រូវអាជ្ញាធររដ្ឋ New Jersey ចាប់ដាក់ឲ្យនៅដាច់តែឯង កាលពីថ្ងៃសុក្រ បានធ្វើការតវ៉ាជុំវិញលក្ខខណ្ឌនៃការ “ឃុំខ្លួន” គាត់ថា អាជ្ញាធរធ្វើមកលើលោកស្រីធ្វើមើលតែធ្វើទៅលើឧក្រិដ្ឋជន។ មេធាវីរបស់លោកស្រីបានប្រកាសគ្រោងនឹងប្តឹងទៅតុលាការសហព័ន្ធអាមេរិក ដើម្បីប្រឆាំងនឹងចំណាត់ការរបស់អាជ្ញាធរ ដែលគាត់ចាត់ទុកថាជាការរំលោភលើសិទ្ធិសេរីភាពជាមូលដ្ឋាន ដែលមានចែងក្នុងរដ្ឋធម្មនុញ្ញអាមេរិក។
ក្រោយពីដោយសារតែមានការរិះគន់ និងមានសម្ពាធពីសេតវិមាន អភិបាលរដ្ឋ New York និងរដ្ឋ New Jersey ទើបនឹងបានសម្រេចបន្ធូរបន្ថយវិធានការមកវិញបន្តិច ដោយធ្វើការបែងចែកជាពីរករណី។ អ្នកដំណើរពីអាហ្វ្រិកខាងលិច ដែលគ្មានរោគសញ្ញាសង្ស័យ ហើយដែលធ្លាប់មានការប៉ះពាល់ដោយផ្ទាល់ជាមួយអ្នកជំងឺអេបូឡា នឹងមិនត្រូវចាប់ដាក់ឲ្យនៅដាច់ពីគេនោះទេ ដោយគ្រាន់តែមានគ្រូពេទ្យឲ្យទៅពិនិត្យដល់ផ្ទះ មួយថ្ងៃ ២ដង ដើម្បីតាមដានមើល។ អ្នកដំណើរពីអាហ្វ្រិកខាងលិច ដែលគ្មានរោគសញ្ញាសង្ស័យ ក៏ប៉ុន្តែ ធ្លាប់បានប៉ះពាល់អ្នកជំងឺអេបូឡា ក៏ត្រូវអនុញ្ញាតឲ្យទៅផ្ទះវិញបានដែរ ប៉ុន្តែ ត្រូវស្ថិតនៅក្នុងផ្ទះ ដោយមិនឲ្យចេញទៅក្រៅ រយៈពេល ២១ថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ