គណបក្សប្រជាធិបតេយ្យបើកសមាជតែងតាំងលោកស្រី Hillary Clinton
ចុះផ្សាយនៅថ្ងៃ៖
ស្តាប់ - ០៤:១៩
បន្ទាប់ពីសមាជគណបក្សសាធារណរដ្ឋ នាសប្តាហ៍នេះ ក្រសែភែ្នកពិភពលោកទាំងមូលនឹងផ្តោតលើសមាជគណបក្សប្រជាធិបតេយ្យ។ សមាជនេះប្រព្រឹត្តទៅចាប់ពីថ្ងៃទី ២៥ ដល់ទី ២៨ កក្កដានេះនៅទីក្រុង Philadelphia នៃរដ្ឋ Pennsylvania។ លោកស្រី Hillary Clinton នឹងត្រូវតែងតាំងជាបេក្ខនារីប្រធានាធិបតីផ្លូវការតំណាងឲ្យគណបក្សប្រជាធិបតេយ្យ សំរាប់ប្រកួតប្រជែងការបោះឆ្នោតប្រធានាធិបតីនាថ្ងៃទី ៨ វិច្ឆិការខាងមុខនេះ។ គាប់ជួនពេលគ្នានេះផងដែរ វេបសាយ៍ Wikileaks ទើបទម្លាយឯកសារសំងាត់ផ្ទៃក្នុងរបស់គណបក្សប្រជាធិបតេយ្យ។ ឯកសារនោះលាតត្រដាងពីភាពលំអៀងកាន់ជើងលោកស្រី Hillary Clinton ពីសំណាក់ថ្នាក់ដឹកនាំជាន់ខ្ពស់បក្ស។ រឿងអាស្រូវថ្មីនេះកើតឡើងតែប៉ុន្មានថ្ងៃប៉ុណ្ណោះមុនការបើកសមាជគណបក្សប្រជា ធិបតេយ្យ។
សមាជគណបក្សប្រជាធិបតេយ្យចាប់ផ្តើមនៅថ្ងៃច័ន្ទនេះហើយ។ បើប្រៀបធៀបគ្នានឹងសមាជគណបក្សសាធារណរដ្ឋកាលពីសប្តាហ៍មុន យើងឃើញថាសមាជគណបក្សប្រជាធិបតេយ្យខុសគ្នាស្រឡះ។ ខុសគ្នាត្រង់សមាជតែងតាំងលោកស្រី Hillary Clinton ស្ថិតក្រោមរូបភាពសាមគ្គីឯកភាពផ្ទៃក្នុងបក្ស។ ផ្ទុយទៅវិញ ការតែងតាំងបេក្ខជនដ៏មហាចម្រូងចម្រាស់ គឺលោក Donald Trump បានបង្កឲ្យមានភាពចលាចលបះបោរក្នុងបក្ស ជាពិសេសពីសំណាក់អ្នកដែលមិនពេញចិត្តមួយចំនួន។
បីថ្ងៃមុនការបើកសមាជបក្សនេះ លោកស្រី Hillary Clinton បានបង្ហាញអត្តសញ្ញាណបេក្ខជនអនុប្រធានាធិបតី គឺលោក Tim Kaine ក្នុងករណីដែលលោកស្រីឈ្នះឆ្នោតនាខែវិចិ្ឆការខាងមុខនេះ។ អ្នកទាំងពីរបានបង្ហាញមុខរួមគ្នាជាលើកតំបូងនាជំនួបជាមួយអ្នកគាំទ្រ ដែលបានប្រព្រឹត្តទៅនៅសាកលវិទ្យាល័យអន្តរជាតិរដ្ឋ Florida ស្ថិតក្នុងទីក្រុង Miami។
នាជំនួបនោះ នៅលើវេទិការ លោកស្រី Hillary Clinton អាយុ ៦៨ ឆ្នាំឈរនៅពីមុខ ហើយលោកស្រីថ្លែងសុន្ទរកថាទៅកាន់អ្នកគាំទ្រ។ ចំណែកលោក Tim Kaine អាយុ ៥៨ ឆ្នាំឈរនៅពីក្រោយស្តាប់ពាក្យពេចន៍របស់លោកស្រី Clinton ក្រោមសំរែកគាំទ្រពីហ្វូងមហាជន។ ជាការគួរឲ្យកត់សំគាល់ លោកស្រី Hillary Clinton បានមានប្រសាន៍ថា សមាជគណបក្សប្រជាធិបតេយ្យក្នុងសប្តាហ៍នេះនឹងបង្ហាញពីចក្ខុវិស័យថ្មីមួយរបស់សហរដ្ឋអាមេរិក។ វាខុសពីអ្វីដែលបានកើតឡើងកាលពីសប្តាហ៍មុន។ សមាជនេះនឹងធ្វើជាស្ពានចម្លងផ្លូវ តែមិនមែនធ្វើជាជញ្ជាំងបិទបាំងទេ។ សមាជនេះនឹងលើកតំកើងភាពរស់នៅចំរុះជាតិសាសន៍ និងការរស់នៅជាមួយគ្នានៅសហរដ្ឋអាមេរិក ដែលបានធ្វើឲ្យប្រទេសនេះរីកធំធាត់។
នៅក្នុងកម្មវិធី ស្រ្តីទីមួយសហរដ្ឋអាមេរិក គឺលោកស្រី Michelle Obama នឹងឡើងថ្លែងសុន្ទរកថាបើកសម្ពោធសមាជដ៏អធិកអធមនេះ។ លោកប្រធានាធិបតីបច្ចុប្បន្ន គឺលោក បារ៉ាក់ អូបាម៉ានិងលោកអតីតៈប្រធានាធិបតី គឺលោក Bill Clinton ក៏នឹងឡើងថ្លែងសារទៅកាន់អ្នកចូលរួមផងដែរ។ សូម្បីតែលោក Bernie Sanders គូប្រជែងក្នុងបក្សរបស់លោកស្រី Hillary Clinton ក៏នឹងមានកិត្តិយសត្រូវឡើងបញ្ចេញពាក្យពេចន៍ផងដែរ។
សូមបញ្ជាក់ថា លោក Sanders បានប្រកួតប្រជែងរហូតដល់វគ្គចុងបញ្ចប់នៃការបោះឆ្នោតជ្រើសរើសបេក្ខជនតំណាងឲ្យបក្ស។ លោកបានចរចារកម្មវិធីនយោបាយមួយចំនួនជាមួយលោកស្រី Hillary Clinton។ ហើយរហូតដល់ថ្ងៃទី ១២ ខែកក្កដានេះទើបលោកសុខចិត្តប្រកាសទទួលស្គាល់បរាជ័យ ហើយគាំទ្របេក្ខភាពលោកស្រី Hillary Clinton។
ឯកសារបែកធ្លាយដ៏គួរឲ្យរំខាន
ជាមួយសាមគ្គីផ្ទៃក្នុងបក្សនេះ ដំណឹងមួយក៏កំពុងធ្វើឲ្យគណបក្សប្រជាធិបតេយ្យរំជើបរំជួលផងដែរ។នាចុងសប្តាហ៍នេះ វេបសាយ៍ Wikileaks បានផ្សព្វផ្សាយសារឆ្លើយឆ្លងតាមរយៈអ៊ីម៊ែលចំនួន ២ ម៉ឺនឯកសារ។ គឺជាឯកសារផ្ទៃក្នុងគណបក្សប្រជាធិបតេយ្យរបស់បុគ្គលសំខាន់ៗមួយចំនួននៅក្នុងជួរបក្ស។ បើតាមការប៉ាន់ស្មានជាបឋម ខ្លឹមសារនៃការឆ្លើយឆ្លងខ្លះអាចឆ្លុះបញ្ចាំងឲ្យដឹងពីភាពលំអៀងនៅក្នុងបក្ស ដែលក្រុមអ្នកទទួលខុសត្រូវជាន់ខ្ពស់រួមផ្សំគំនិតគ្នាជួយជ្រោមជ្រែងលោកស្រី Hillary Clinton ក្នុងកំឡុងពេលយុទ្ធនាការឃោសនាបោះឆ្នោតជ្រើសរើសបេក្ខជនផ្លូវការតំណាងបក្សនារយៈពេលប៉ុន្មានខែកន្លងមកនេះ។
កន្លងមក គូប្រជែង គឺលោក Bernie Sanders ក៏ធ្លាប់បានថ្អូញថ្អែរពីបញ្ហានេះផងដែរ។ គិតមកដល់ពេលនេះ លោក Bernie Sanders នៅពុំទាន់សំដែងប្រតិកម្មឡើយជុំវិញការលាតត្រដាងឯកសារសំម្ងាត់នេះ។ បើទោះបីជាវេបសាយ៍ Wikileaks ពុំបានបង្ហាញអត្តសញ្ញាណប្រភពអ្នកបញ្ចេញឯកសារសម្ងាត់នោះក៏ដោយ ប៉ុន្តែ គេជឿជាក់ថាក្រុមចោរលួចទិន្នន័យតាមអ៊ិនធើណេត ឬគេហៅ hacker ទំនងជាមានប្រភពមកពីប្រទេសរុស្សី។
គួរកត់សំគាល់ផងដែរថា បើយោងតាមសារព័ត៌មានបារាំង Le Monde កាលពីខែមិថុនាកន្លងទៅនេះ ស៊ែរវើ (serveur) ផ្ទុកទិន្ន័យរបស់គណៈកម្មាធិការជាតិគណបក្សប្រជាធិបតេយ្យ (CND) ត្រូវបានក្រុមចោរមកពីរុស្សីវាយលុកចូល។ ជាដំណាក់កាលបឋម ក្រុមចោរបានផ្សព្វផ្សាយឯកសារផ្ទៃក្នុងបក្សប្រជាធិបតេយ្យ ដែលរៀបរាប់អំពីយុទ្ធសាស្រ្តក្នុងការដឹកនាំយុទ្ធនាការប្រឆាំងគូបដិបក្ខសាធារណរដ្ឋ គឺលោក Donald Trump។
ហើយការលាតត្រដាងឯកសារដំណាក់កាលទីពីរនេះ គឺគ្មានព័ត៌មានអ្វីដែលសំខាន់អស្ចារ្យឡើយ ក្រៅតែពីឯកសារឆ្លើយឆ្លងសាមញ្ញរបស់ថ្នាក់ដឹកនាំបក្ស។ នៅក្នុងចំណោមឯកសារបែកធ្លាយទាំងនោះ មានសារមួយរបស់លោក Bard Marshall នាយកផ្នែកហិរញ្ញវត្ថុរបស់គណបក្សប្រជាធិបតេយ្យ។ ដោយមិននិយាយសំដៅចំឈ្មោះលោក Bernie Sanders ឡើយ លោក Marshall បានសរសេរសារ ទៅកាន់គ្នីគ្នាក្នុងបក្សថា គូប្រជែងរបស់លោកស្រី Hillary Clinton គឺមានដើមកំណើតជ្វីស ហើយមិនជឿសាសនាឡើយ។ លោកស្នើឲ្យគេលើកយកចំណុចនេះសំរាប់វាយប្រហារគូបដិបក្ខនោះ។ យុទ្ធសាស្រ្តនេះនឹងធ្វើឲ្យលោកស្រី Hillary Clinton អាចទទួលបានសម្លេងគាំទ្រពីសហគមន៍ជនជាតិជ្វីស ដែលគោរពជំនឿសាសនា។
វេបសាយ៍ Vox ជំនាញផែ្នកវិភាគនយោបាយអាមេរិកក៏បានយល់ឃើញផងដែរថា ការបែកធ្លាយឯកសារថ្មីនេះកំពុងតែធ្វើឲ្យក្រុមអ្នកគាំទ្រលោក Bernie Sanders ខឹងសម្បារចំពោះក្រុមថ្នាក់ដឹកនាំជាន់ខ្ពស់គណបក្សប្រជាធិបតេយ្យ។
ប៉ុន្តែ ចង់មិនចង់ ក្រុមអ្នកគាំទ្រលោក Sanders ក៏បានគ្រោងធ្វើបាតុកម្មទុកជាមុនរួចទៅហើយ។ នោះគឺ បាតុកម្មដើម្បីទាមទារការតំឡើងប្រាក់ឈ្នួលកម្មករអប្បបរមាឲ្យបាន ១៥ ដុល្លារក្នុងមួយម៉ោង, ការប្រឆាំងការបូមប្រេងក្រោមដីតាមរយៈការបំលែងសារជាតិគីមីលាយជាមួយទឹក និងជាពិសេស គឺការទាមទារធ្វើកំណែទម្រង់គណបក្សប្រជាធិបតេយ្យ ដោយត្រូវកាត់បន្ថយចំនួនគណៈប្រតិភូជាន់ខ្ពស់បក្ស ក្នុងដំណើរការតែងតាំងបេក្ខជនប្រធានាធិបតី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ