សមាជបក្សប្រជាធិបតេយ្យអាមេរិកគ្របដណ្តប់ដោយរឿងអាស្រូវ
ថ្ងៃចន្ទ២៥កក្កដានេះ នៅក្រុងPhiladelphie រដ្ឋ Pennsylvanie សហរដ្ឋអាមេរិក បក្សប្រជាធិបតេយ្យ បើកសមាជរយៈពេល៤ថ្ងៃ ដើម្បីតែងតាំងលោកស្រីហ៊ីលឡារី គ្លីនតុន ជាផ្លូវការ ជាបេក្ខជនប្រធានាធិបតី សម្រាប់ការបោះឆ្នោតប្រធានាធិបតីខាងមុខ។ មិនទាន់បើកសមាជផង ថ្ងៃអាទិត្យម្សិលមិញ ប្រធានបក្សប្រជាធិបតេយ្យបានលាចុះពីតំណែងរួចទៅហើយ។
ចុះផ្សាយនៅថ្ងៃ៖ កែប្រែថ្ងៃទី៖
រឿងអាស្រូវបានវាយប្រហារបក្សប្រជាធិបតេយ្យអាមេរិក តាំងពីថ្ងៃអាទិត្យម្សិលមិញ ធ្វើអោយប្រធានបក្សប្រជាធិបតេយ្យលោកស្រី ឌែបប៊ី វ៉ាសឺមែន ស្ហ៊ូល Debbie Wasserman Schultz បង្ខំចិត្តលាចុះពីតំណែងប្រធានបក្ស។ រឿងអាស្រូវនេះទាក់ទងនឹងការបែកធ្លាយសារប្រមាណ២ម៉ឺនច្បាប់ ជាសារអ៊ីមែលផ្ទៃក្នុងរបស់ក្រុមមន្ត្រីជាន់ខ្ពស់ក្នុងគណបក្សប្រជាធិបតេយ្យ។ អ៊ីមែលទាំងនេះ ត្រូវបានសារព័ត៌មានWikileaks យកទៅចុះផ្សាយ។
ក្នុងចំណោមអ៊ីមែលទាំងនេះ មានអ៊ីមែលមួយចំនួនបង្ហាញថា ក្នុងការបោះឆ្នោតបឋម រើសបេក្ខជនប្រធានាធិបតីតំណាងបក្ស តាំងតែពីដំបូងទីមក មន្ត្រីធំំៗក្នុងបក្សប្រជាធិបតេយ្យបានលំអៀងទៅខាង លោកស្រីហ៊ីលឡារី គ្លីនតុន រួចទៅហើយ។ ប្រហែលដូច្នេះហើយ ទើបលោកប៊ែរនី សាន់ដឺ មកពីរដ្ឋវែរម៉ុង ដែលជាគូប្រជែងរបស់លោកស្រីគ្លីនតុន បានសម្រេចចិត្តបោះបង់ចោលការប្រកួត ក្នុងពេលកន្លងមក។
ម្សិលមិញ មនុស្សរាប់ពាន់នាក់ មានសកម្មជនគាំទ្របរិស្ថាន ក៏ដូចជាអ្នកគាំទ្រលោកសាន់ដឺ បាននាំគ្នាបាតុកម្មនៅក្រុង Philadelphie។ សកម្មជនគាំទ្រលោកសាន់ដឺ សំដែងការខកចិត្តពេលដែលទទួលព័ត៌មានទាក់ទងរឿងអាស្រូវនេះ ព្រោះវាដូចអ្វីដែលពួកគេសង្ស័យពីដំបូងមកមែន។ ម្សិលមិញដែរ លោកសាន់ដឺបានរិះគន់ជាថ្មីម្តងទៀត ចំពោះភាពលំអៀង និងភាពអយុត្តិធម៌របស់បក្សប្រជាធិបតេយ្យ ក្នុងការបោះឆ្នោតបឋមជ្រើសរើសបេក្ខជនប្រធានាធិបតី។
ដោយឡែក អ្នកគាំទ្រលោកស្រីគ្លីនតុន យល់ថា ចោរបច្ចេកវិទ្យាព័ត៌មានរុស្ស៊ី ប្រហែលបានលួចយកអ៊ីមែលទាំងនេះ ធ្វើអោយបែកធ្លាយរឿងនេះឡើង ដើម្បីជួយលោកដូណាល់ ត្រាំ ដែលជាបេក្ខជនប្រធានាធិបតីរបស់បក្សសាធារណរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ