តុលាការសម្រេចមិនចាត់ការលើបណ្តឹងប្រឆាំងលោកនាយករដ្ឋមន្ត្រីហ៊ុន សែន រឿងកោះពេជ្រ
ព្រះរាជអាជ្ញារង អមតុលាការសាលាដំបូងរាជធានីភ្នំពេញ លោក មាស ច័ន្ទពិសិដ្ឋ នៅថ្ងៃទី១៩ធ្នូនេះ បានចេញដីកា សម្រេចតម្កល់សំណុំរឿង មិនចាត់ការលើពាក្យបណ្តឹងប្រឆាំងលោកនាយករដ្ឋមន្ត្រី ហ៊ុន សែន ក្នុងរឿងមនុស្សស្លាប់នៅកោះពេជ្រ នៅយប់បង្ហើយពិធីបុណ្យអុំទូក កាលពីថ្ងៃទី២២វិច្ឆិកា ឆ្នាំ២០១០។
ចុះផ្សាយនៅថ្ងៃ៖
ដីកាសម្រេចនោះ ត្រូវបានបញ្ជូនភ្លាមៗ ទៅកាន់ដើមបណ្តឹង លោក សួង សុភ័ណ្ឌ ដែលជាប្រធានចលនាយុវជនគណបក្សសមរង្ស៊ី។
លោក សួង សុភ័ណ្ឌ បានចាត់ទុកការសម្រេចរបស់តុលាការដូច្នេះ ថាស្ថិតក្រោមគំនាបពីលោកនាយករដ្ឋមន្ត្រី ហើយលោកនឹងដាក់ពាក្យបណ្តឹងបន្តទៅកាន់តុលាការសាលាឧទ្ធរណ៍។
សូមរម្លឹកថា កាលពីថ្ងៃទី៣០ ខែវិច្ឆិកា ឆ្នាំ២០១២ ប្រធានចលនាយុវជនគណបក្ស សម រង្ស៊ី លោក សួង សុភ័ណ្ឌ បានដាក់ពាក្យបណ្តឹង ទៅកាន់តុលាការសាលាដំបូងរាជធានីភ្នំពេញ ប្តឹងលោកនាយករដ្ឋមន្ត្រី ហ៊ុន សែន ពីបទ មនុស្សឃាតគិតទុកជាមុន តាមរយៈព្រឹត្តិការណ៍មនុស្សជាន់គ្នាស្លាប់ នៅលើស្ពានពេជ្រ នៅកោះពេជ្រ កាលពីយប់ថ្ងៃបង្ហើយ នៃពិធីបុណ្យអុំទូក ថ្ងៃទី២២ ខែវិច្ឆិកា ឆ្នាំ២០១០។
ក៏ប៉ុន្តែភ្លាមៗនោះ កាលពីថ្ងៃទី២ ខែធ្នូ ឆ្នាំ២០១២ លោកនាយករដ្ឋមន្ត្រី ហ៊ុន សែន បានប្រកាសថា បើសិនជាតុលាការ រកមិនឃើញកំហុសរបស់លោកទេ នោះលោកនឹងដាក់ពាក្យបណ្តឹងប្រឆាំងតប ដើម្បីការពារកិត្តិយស និងសេចក្តីថ្លៃថ្នូររបស់លោក និងរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ