ថៃ៖ គណបក្សប្រឆំាងប្រកាសធ្វើពហិការមិនចូលរួមបោះឆ្នោតតាមសំណើលោកស្រីយីងឡាក់
នៅក្នុងប្រទេសថៃ គណបក្សប្រឆំាងរបស់លោកអាប់ភីសិត គឺគណបក្សប្រជាធិបតេយ្យបានប្រកាសកាលពីថ្ងៃសៅរិ៍ ទី២១ ធ្នូថា គណបក្សរបស់លោកនឹងមិនចូលរួមបោះឆ្នោតមុនកាលកំណត់ដែលគ្រោងនឹងរៀបចំនៅថ្ងៃទី២ កុម្ភៈខាងមុខនេះទេ។ សេចក្តីប្រកាសនេះបានធ្វើឡើង ជិត ២សប្តាហ៍ក្រោយពីលោកស្រីនាយករដ្ឋមន្រ្តីយីងឡាក់ប្រកាសរំលាយសភា និងថ្ងៃបោះឆ្នោតមុនកាលកំណត់នៅថ្ងៃទី២ កុម្ភៈ។ មួយវិញទៀត ការបដិសេធមិនចូលរួមរបស់បក្សប្រឆំាងពេលនេះបានកើតមានឡើង ចំពេលដែលក្រុមអាវលឿងកំពុងត្រៀមចុះផ្លូវធ្វើបាតុកម្មជាថ្មីក្នុងថ្ងៃអាទិត្យនេះ។
ចុះផ្សាយនៅថ្ងៃ៖
ស្តាប់ - ០១:៤១
ថ្លែងនៅក្រោយកិច្ចប្រជុំគណបក្ស លោកអតីតនាយរដ្ឋមន្រ្តីអាប់ភីសិតបានប្រកាសឲ្យដឹងថា គណបក្សប្រជាធិបតេយ្យរបស់លោកនឹងមិនបញ្ជូនបេក្ខជនឲ្យទៅឈរឈ្មោះបោះឆ្នោតនៅថ្ងៃទី២ កុម្ភៈខាងមុខទេ។ ចម្លើយបដិសេធយ៉ាងដាច់អហង្ការរបៀបនេះត្រូវបានលោកអាប់ភីសិតផ្តល់ហេតុផលថា ការបោះឆ្នោតនោះនៅតែមិនអាចដោះស្រាយវិបត្តិផ្ទែក្នុងរបស់ប្រទេសតែដដែល ហើយថា វាក៏នឹងមិនអាចជួយធ្វើកំណែទម្រង់អ្វីដែលជាក្តីសង្ឃឹមចង់បានរបស់ប្រជារាស្រ្តដែរ។ ទន្ទឹមគ្នានេះ លោកអាប់ភីសិតក៏បានព្យាយាមលើកឡើងនូវវិបត្តិដែលបង្កឡើងដោយរដ្ឋាភិបាលរបស់លោកស្រីយីងឡាក់ និងថា អ្វីដែលក្រុមបាតុករចង់បាននាពេលនេះ គឺការលាចុះចេញពីមុខតំណែងរបស់លោកស្រីយីងឡាក់
អ្វីជាការកត់សម្គាល់ ការប្រកាសធ្វើពហិការមិនចូលរួមបោះឆ្នោតនៅថ្ងៃខាងមុខរបស់បក្សប្រឆំាងពេលនេះបានធ្វើឡើង ចំពេលដែលក្រុមបាតុករអាវលឿងកំពុងត្រៀមខ្លួនចុះផ្លូវធ្វើបាតុកម្មជាថ្មីក្នុងថ្ងៃនេះ។ ក្រុមបាតុករដែលចង់ឃើញលោកស្រីយីងឡាក់ចុះចេញពីតំណែង ព្រោះពួកគេយល់ថា លោកស្រីគ្រាន់តែជាមនុស្សតុក្កតាធ្វើអ្វីតាមតែលោកថាក់ស៊ីនដែលជាបងប្រុសញាក់ពីក្រោយ។ លោកថាក់ស៊ីនដែលត្រូវបានគេទម្លាក់ពីអំណាចដោយរដ្ឋប្រហារយោធាកាលពីឆ្នំា ២០០៦ និងដែលកំពុងភាសខ្លួនរស់នៅឯបរទេសមកដល់សព្វថ្ងៃ។
សូមរម្លឹកជូនថា គឺមហាក្បួនបាតុកម្មរបស់ក្រុមអាវលឿងក្នុងរយៈពេលជាង ១ខែកន្លងទៅនេះឯងដែលបានបង្ខំឲ្យលោកស្រីយីងឡាក់ប្រកាសរំលាយសភា និងរៀបចំបោះឆ្នោតជាថ្មីដែលគ្រោងធ្វើនៅដើមខែកុម្ភៈឆ្នំា ២០១៤។ តែការបដិសេធមិនចូលរួមរបស់គណបក្សប្រឆំាងពេលនេះត្រូវបានគេចាត់ទុកថា គឺជាឆន្ទៈរបស់បក្សប្រឆំាងដែលចង់ឲ្យវិបត្តិនយោបាយផ្ទៃក្នុងថៃអូសបន្លាយកាន់តែយូរ រហូតដល់ធ្វើឲ្យកងទ័ពចេញមុខធ្វើអន្តរាគមន៍ដូចនៅក្នុងវិបត្តិកាលពីឆ្នំា ២០០៦ ទម្លាក់លោកថាក់ស៊ីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ