ថៃព្យួរលទ្ធិប្រជាធិបតេយ្យដើម្បីវិលទៅរករបបផ្តាច់ការ?
ប្រមុខដឹកនាំចលនាបាតុកម្មថៃ លោក ស៊ូថេប ថងស៊ូបាន ត្រូវជួបពិភាក្សាជាមួយនឹងអគ្គមេបញ្ជាការកងទ័ព នៅថ្ងៃសៅរ៍នេះ ដើម្បីបញ្ចុះបញ្ចូលស្ថាប័នយោធាដែលធ្លាប់ធ្វើរដ្ឋប្រហារជាញយដងទម្លាក់រដ្ឋាភិបាលប្រសូតចេញពីការបោះឆ្នោត ឱ្យមកគាំទ្រគំនិតផ្តួចផ្តើមរបស់ខ្លួន ដែលចង់ផ្អាកដំណើរការប្រជាធិបតេយ្យ ដោយងាកមកបង្កើត “ក្រុមប្រឹក្សាប្រជាជន” សម្រាប់ជ្រើសរើសថ្នាក់ដឹកនាំប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
សេចក្តីសម្រេចចិត្តរំលាយសភា និងរៀបចំការបោះឆ្នោតមុនអាណត្តិរបស់លោកស្រីនាយករដ្ឋមន្ត្រី យីងឡាក់ ស៊ីណាវ៉ាត់ មិនបានធ្វើឱ្យក្រុមប្រឆាំងស្ងប់អារម្មណ៍ទេ បើទោះបីជាចលនាតាមដងផ្លូវហាក់ស្ងប់ក៏ដោយ។
តាំងពីយប់មិញមក លោកស៊ូថេប ថងស៊ូបាន បានបង្ហើបបង្ហាញផែនការ ចង់បង្កើតរដ្ឋាភិបាលបណ្តោះអាសន្នមួយ មានបេសកកម្មពិសេសធ្វើកំណែទម្រង់នយោបាយ កែច្បាប់បោះឆ្នោត និងការគ្រប់គ្រងបក្សនយោបាយ ធ្វើយ៉ាងណាបិទបញ្ចប់ការទិញសំឡេង និងលួចបន្លំសន្លឹកឆ្នោត ព្រមទាំងនយោបាយប្រជាពិថុតិ ដែលជាផ្លូវនាំទៅរកអំពើពុករលួយ។ ហើយនៅថ្ងៃនេះទៀត ក្នុងវេទិកាសាធារណៈ លោកស៊ូថេប ថងស៊ូបាន បានប្រកាសថារដ្ឋាភិបាលលោកស្រី យីងឡាក់ គ្មានភាពស្របច្បាប់សម្រាប់ដឹកនាំប្រទេសទៀតទេ។ ថៃពេលនេះ គ្មានរដ្ឋាភិបាល និងគ្មានសភា !
សម្រាប់ប្រមុខដឹកនាំចលនាប្រឆាំងរូបនេះ ថៃត្រូវតែផ្អាករាល់សកម្មភាពស្របតាមបែបលទ្ធិប្រជាធិបតេយ្យ ដើម្បីគាស់រំលើងត្រកូល ស៊ីណាវ៉ាត់ ឱ្យចេញផុតពីផ្ទៃនៃនយោបាយថៃ។ ដើម្បីអាចសម្រេចកម្មវត្ថុនេះ បាន គេត្រូវបង្កើតជាក្រុមប្រឹក្សាប្រជាជនមួយ ជាអ្នកសម្រេចជ្រើសរើសមេដឹកនាំប្រទេស មិនមែនដោយការបោះឆ្នោតទេ។
ប៉ុន្តែបើតាមអ្នកវិភាគនយោបាយថៃម្នាក់ ជំនួបរវាងប្រមុខបក្សប្រឆាំងនិងយោធា ទំនងជាគ្មានលទ្ធផលអ្វី ជាដុំកំភួនទេ ព្រោះប្រព្រឹត្តទៅជាលក្ខណៈសាធារណៈ។ ចំណែកយោធាដែលមានប្រវត្តិធ្វើ និងប៉ុនប៉ងធ្វើរដ្ឋប្រហារ ដល់ទៅ១៨ដងក្នុងរយៈពេល៨០ឆ្នាំ ចុងក្រោយនេះ បានស្នើខ្លួនជាអន្តរការី និងតាំងខ្លួនឱ្យនៅឆ្ងាយពីវិបត្តិនាពេលនេះ។ ម្យ៉ាងវិញទៀត កងទ័ពថៃដឹងខ្លួនថាមិនអាចប្រកាន់ជំហរឬបក្សពួក ដូចអតីតកាលបានទេ ព្រោះសហគមន៍អន្តរជាតិ តាមដានយ៉ាងកៀកកិតស្ថានភាពនយោបាយថៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ